Wo wohnt dr Petrus z Basel, Jan Eitel?

Wie kunnt me als Basler uff e Zirchr Dach?

Ganz eifach, me studiert in Basel Geoumweltwüsseschafte und legt denn nachem Grundstudium dr Schwerpunkt uf Meteorologie. Drnoch gosch uf Jobsuechi wie jede Absolvent und denn bewirbsch di für die infrogkommende Stelle. I muess aber scho sage, nachdem dr Thomas Bucheli mir aglüte het und gmeint het - kumm mir probieres doch mol zämme - do han y immer no im Ernscht glaubt, i könnt hinter dr Kamera bzw. fern vo Mikrofons schaffe. Hänu, es isch natürlig anderscht ko. Leider ka me sich dr Arbetsplatz nid immer ussueche, so bin i halt Pendler worde.

Hesch du bim Wättr e Mitbestimmigsrächt?

S Wätter ka i leider nid direkt beiflusse, aber immerhin mach I mini Wetterprognose selbstständig. Bi jedem Schichtbeginn isch me zerscht emol e gueti Stund mit dr Analyse vo Wättermodell. Denn hoggt me mit de andere Meteorologe im Büro zämme und bringt die jewielige Kenntnis uf ei Nenner bzw. uf ei SRF Meteo Produkt. Nid das dr einti vo 15 Grad in Basel redet und dr anderi vo 17 Grad. Bi de legendäre “Wetterbesprächige” gwünnt dä mit de beschte Argument und s Produkt gsehnd ihr denn im TV oder höhred ihr im Radio.

Mir hätte gärn emol e Bâlaari-Tief - könne mr dä Namme diräggt bi dir beadraage?

Nid direkt bi mir, aber uf dr Hompage (www.met.fu-berlin.de/wetterpate/) vo de Berliner Wätterfrösch a dr Uni. Die verkaufe Namme für Hoch und Tief. Im Joor 2015 si die männliche Namme für Tief und wieblichi Namme für Hochdrucksyschtem vorgseh. Das heisst, ihr könned tatsächlich e Balaari-Tief in dem Joor kaufe. Dr Pries liegt bi 199 Euro für e Tiefbenennig und d Hochs si mit 299 Euro türer. Dr Grund, Hochs si uf dr Wätterkarte seltener als Tiefs.

Isch s Elsass eso wichtig, ass es uns allewyyl s Wättr schiggt?

Grundsätzlich ka s Wätter vo allne Himmelsrichtige ko. Trotzdem bringt dr Jetstream hüfig weschtlichi Wind bi uns. Dr Jetstream isch e starks Weschtwindband in 7 bis 10 km Höchi, wo als Förderband vo de Tiefs fungiert. Das bedütet, s Wätter kummt hüfig vom Jura (SW-Wind), vo dr Burgunderpforte (W-Wind) oder ebbe vom Elsass (NW-Wind). Bi Biselage kunnts Wätter hingege vo Oscht bis Nordoscht, also vom Fricktal bis Süddütschland.

Worum git s kai Mallorca-Hoch?

Die planetarischi Windzirkulation bringt e ständig höchere Luftdruck im Gebiet vo de Azore. Mir rede do in dr Meteorologie vomene stationäre Hoch. Das stationäre Hoch ka sich vor allem im Summer bis nach Mitteleuropa usdehne. In dem Zämmehang hört me immer wieder s Azorehoch. Alli andere Hochs bi uns si dynamisch und könne sich irgendwo bilde. So z.B. au über Mallorca. Denn heisst aber im Wetterbricht: E Hoch über Mallorca oder e Hoch mit Kern über Mallorca etc. Übrigens au bi de Tiefs gits e hüfig tiefere Luftdruck bi Island, also e stationärs Tiefdruckgebiet. Alli andere Tief bi uns si hingege wieder dynamisch und werde meischt vom Jetstream bewegt.

Isch es woor ass dr Petrus e Basler isch - und wohnt är wirgligg an dr Hammerstross?

Soviel i weiss het er grad letschtens in d Sperrstross zügled. Nei, aber im Ernscht, im Verglych zum Mittelland oder au Fricktal hän mir z Basel würklig viel weniger Näbeldäg. Schuld dra isch dr sogenannti Möhlin-Jet. Kurzerklärig: Wenn im Winterhalbjoor d Mittelland-Badwanne sich mit kalter, schwerer Bergluft füllt, bildet sich e Näbelmeer im Mittelland. Die kalti Nebelluft verhaltet sich wie Wasser, es fliesst dörte wo dr Jura tiefer isch, also bi dr Region Bötzberg über dr Badwannerand. Dodrby stürzt die schweri Nebelluft in Richtig Möhlinerfeld und erwärmt sich wie bi Föhn. Aber no viel wichtiger isch, dass bim Abestürze vo dere Luft drocheni und wärmeri Luft vo oberhalb vom Näbelmeer mit ine gmischt wird. Genau wege dene 2 Vorgäng löst sich dr Näbel überem Möhliner Feld uf und dr drocheni Wind strömt bis nach Basel witer. Im Lymetal und Laufetal hingege ka s aber glychzytig Näbel ha, do dr Möhlin-Jet dörte nid ane kunnt.

23.-25. Hornig 2015: wie bitte wird s Wättr am mym Rhyy?

I beantworte euri Frog efang Endi Januar… Ich halt nüd vo Langfrischtprognose. D Atmosphäre het eifach zviel Freiheitsgrad. All die Parameter in d Zuekunft z rechne verhebt je nach Grosswätterlag für 3 bis 10 Däg. Wettermodell rechne bis allerhöchschtens 14 Däg vorus. Aber weisch was, s Wätter kunnt scho guet ;-) Kasch mache was de wötsch, es blybt bi de 3 schönschte Dääg.

...odr no vyyl wichtigr: uff dr Wettstaibrugg, wo mir am Nomidaag stöhn.

Was I us hütiger Sicht ka sage. Entweder hets kei Wind, sunscht aber ziemlig sicher Südoschtwind oder Nordwind. S Rhybecki leitet dr Wind nämlig. Rein statistisch kummt dr Wind uf dr Wettstaibrugg zu öbe 70 % us Südoscht.

Was de aber kasch mache, frog mi doch e paar Däg vor dr Fasnacht nomol zur Wätterprognose.