mjps: s'Räppli

Kurz vor dr Fasnacht isch dr Fäährymaa wider emol draa gange, s Schtyyrhyysli uuse z fääge.

Mit em Saggmässer, vo sym Groossbabbe säälyg , isch är au d Zwischeryym vo de Boodebrätter go butze. S het nämmlig allewyl noonem Winter Stainli drin gha, wo d Lyt vo de Schtroosse yynegschlaift hän.

Won är fascht fertyg gsi isch, het är im hinterschte Egge au e rosaroots Räppli uss dr Ritze bykho.

Är hets syyferli in d Hand gnoh und isch uff s Bänggli gsässe. S isch em nämmlig e glatty Gschicht in Sinn kho, won är emol vomene Waggis verzellt bykho het. In dääre Gschicht het e Jumpfere Anneröös e baarne Waggis miesse erklääre, wie me z Basel richtyg Fasnacht mache duet. D Räppli hän e zentraaly Rolle gschpilt in däre Legände.

Wie dr Fäährymaa eso uff das Räppli luegt, kunnt är au ins Sinniere: Es dunggt en, dass es doch scho interessant syygy, ass esoone glai Papyyr-Fetzeli s Gligg an dr Fasnacht kha ussmache! Hejo, e Fasnacht ohny Räppli, wär jo wie dr Läppli ohny Schnauz.

E glai unschyynbar Papyyrli mit eme soone groose Yyfluss uff s Wältgschee!

Mänggmool liggt ebbe s Gligg vo de Mensche innere ganz wunzyge Glainygkait.

Är hett das Räppli fascht fyyrlig in Rhyy danze loh und isch zfriide und mitere heerlige innere Rueh haimeszue zottlet.



mjps (April 2012)

(alli Rächt obliige em Autoor, diend em mjps sy Copyright bitte reschpeggtiere.

Kaufet drfiir syni "Fährymaa-Gschichte", e literaarisch Bijou wo in kaim Basler Biechergstell fähle derf, und die sinn ersch no fir e guete Zwägg). Danggerscheen.