Felix Rudolf von Rohr

Dr Felix Rudolf von Rohr hett d’“Hand uff’s Härz“ Frooge am erschte Jänner 2011 beantwortet, als „erschti Amtshandligg im neye Johr“, zuemene Zytpunggt wo vyyli anderi no e, jo saage mer emol, wohlverdient Mittagsschleefli ghalte hänn. Das zaigt ains: Fasnacht isch ihm eso-n-e Härzensaglägehait ass är sich sogar amene Fyyrtig Zyt nimmt fir e – syge mer ehrligg - unbedytende glaine Waggis. Und das sait aigentligg scho alles ibr em Felix sy Bedytig fir unseri Fasnacht.

Dr „FRvR“ (Name isch Programm) isch 1944 z’Basel gebore und hett drnoo fasch 40 Johr in de Beryych Wärbig und Effentligkaitsarbet bi divärse Bangge gschafft. Bikannt isch är worde duur sy politische Ysatz und au s’Engagement innere Zumft. 1987 isch är drnoo Mitglid worde bim FCB (Fasnachts-Comité Basel, natyrligg – was susch?) und hett 7 Johr als Obmaa gamtet (unter anderem bim 100-Johr Jubiläum 2010). E pikant Detail: fir ihn hett's Comité en Usnahm gmacht und er hett zwai Johr lengr dörfe walte wie in de Statute vorgseh.

Herr und Frau Basler kenne dr FRvR beschtens als dr schwarzglaidet Maa vom Stainebärg, immer schigg agleggt und mit  Maniere comme il faut will är dä isch wo allbott dr Huet lipft (und ych mi immr gfrogt ha ob är dr Cortège ohni Tennisarm duurestoht). Fir sy Engagement isch är 2010 zem Ehrenspalebärglemer ernennt worde.

Was e aifach gstriggte Waggis wie mi e chli kurlig dunggt isch ass är sich, bi all syne Merite, sälbr als „miserable Pfyffer“ bezaichnet hett (Regioaktuell 2010) und y frog mi was do ächtsch schief gloffe-n-isch. Also, liebe Felix, wenn’s di emol juggt und de in dym wohlverdiente Ruhestand no neyi Uufer wottsch asträäbe, no kasch di jederzyt vertrauensvoll an mi wände (und y bhalt’s natyrligg ghaim ass mer zämme uff d’Gass gönn, grooooooooooooosses Waggisehrewort).

Abr gnueg gsirmlet. Ring frey fir aine däm alli mit Fraid an dr Fasnacht wirkligg vyyl z’verdangge hänn.

 

 

1. Was isch dy ydriggligschti Fasnachtserinnerig?

Laider dr druurig Unfall von 2007.

 

2. Was ka dy an dr Fasnacht närve?

Bsoffeni Turischte.

 

3. Welli drey Wörtr falle dir zem Begriff „Waggis“ spontan y?

Noochber, Alemann und Frind (i main dermit nadyrlig die ächte Waggis…)

 

4. Sell d’Waggis-Naaselengi vom Fasnachts-Comité reguliert wärde? (falls jo, uff wie lang maximal?)

Unbedingt: Uff die Lengi, dass me no iber dr Naasespitz uuse ka dängge.

 

5. Basel ohni Fasnacht isch wie …. ?

Faasnacht ooni Baasel.

 

6. Was bringt di so richtig uff’d Palme?

Langwyyler.

 

7. … und ibr was kasch dy eso richtig froie?

Iber my Famyylie.

8. E liebs Familiemitgliid schänggt dir zem Geburtsdaag e FCZ-Saisonabo –was machsch?

I schängg s wyter.

 

9. Wenn Ziiri ‚Downtown Switzerland’ isch, denn isch Basel… ?

…aifach Baasel, dasch gnueg!

 

10. Was isch fir di dr scheenschti Ort z’Basel?

Das kann i jetz nit saage; doo gits z vyyl.

 

11. Was wurdsch an Basel - odr an dr Schwiz - sofort ändere?

I wuurd e Gsetz erloo, dass mit jeedem neie Gsetz zwyi alti mien abgschafft wäärde.

 

12. Mit wellem Mensch (ob lebändig odr nit) wottsch du gärn emol znacht ässe?

Usser dr Famyylie: Mit em Dalai Lama.

 

13. … und was wurdsch du die Person ganz sicher frooge?

Was i kenn bidraage an en oordligi Wält.

 

14. Was isch fir di dr Maximallohn wo-n-e Mensch pro Johr derft verdiene, egal wo und wievyyl är/sie schafft?

Nit me als me vernimftig ka bruuche.

 

15. Was nimmsch mit uff e-n-ainsami Insle?

E Retour-Byyljee.

 

16. Wär odr was bringt di sofort zem lache?

E guete Schnitzelbangg.

 

17. Letschti Froog, Hand uff’s Härz: wäm wurdsch du die Frooge am liebschte zem beantworte gäh?

Nadyyrlig au myynere Famyylie; die kennt mi dängg am beschte.