Hansheini Kaufmann und Lily Baumann

Wär bittescheen duet s’Baslerlied scheener und lyydeschaftligger intoniere wie dr Hansheini und s’Lily? Die beide mache „Basler Lieder mit Härz und Seel“, und das uff jedere Zyyle und bi jedem Toon, eso ass dr Swing Cats Club am Riechering eso richtig gracht und d’Stimmig scho fasch iibere Rhyy schwappt (setti säll meeglig syy). Bi dene baide swingt Basel no, es wird danzt und gschittlet und gschwunge was me hett, amigs au gschungglet, es zwiggt aim in de Bai und de khasch fasch nit andersch, dasch no Muusig wo mit Liebi gmacht isch und nit eso-n-e eleggtronische Stampfguggus ussem Riehrbächr ... und me frogt sich worum me naime-n-andersch in Usgang goht wo’s ämmel eso Attraggtioone hett in unsrer scheene Stadt.
Abr vo vorne: Agfange hett d’Gschicht vo däm Duo im 1997, und zwor – Fasnächtler achtig! – am Charivari. S’Lily hett Piaf Lieder gsunge und dr Hansheini hett d’Vaterfiguur gäh in dr Gschicht vo dr Familie Mangold, wo an dr Fäldbärgstrooss gwohnt hett. Das hett die baide animiert, zämme ihre erschte Hit z’komponiere: „Fäldbärgstrooss“. s’Lily isch drnoo no zwai Johr mit em Broadway Theater vom David Schönauer uff Tournee, abr im 2000 hänn dr Hansheini und s’Lily ihre erschte Uffdritt gwogt, numme mit Gitarre und ohni Mikrophoon. Und nodisnoo hänn si sich witrentwigglet, Country, Blues, abr au e stargge Yschlaag vo chansons françaises (und em Spatz vo Paris) prääge ihre Musikstiil. Im Novämber 2002 isch die erschti CD uff e Märt kho, “I mecht z'Basel läbe”, mit de zwai Grosserfolg “Fäldbärgstrooss” und “I mecht wieder z'Basel läbe”, und die CD hett sich bis hitte satti 5’500 mol vrkauft (also aigentligg 5’501, wemme die brennti Kopie drzuezellt wo dr Däni zem letschte Brzeldaag vommene anonyme Kolleg ibrkho hett – abr ehrligg wie Waggis halt sinn, wird är das korrigiere und vo de baide bi nägschtr Gläägehait e veritabli (signierti) CD boschte). Die zwaiti Produgtioon (“Das git's nur z Basel”, 2005) isch 2’000 mol ibr e Laadetisch und die dritti CD (“Zell iber Basel d'Stärnli”) isch 2009 uusekho. Musikalisch sinn die beidi in vyylne Branche dehaime: Country, Blues, Schlaagr, amigs fasch e chli rockig untrwägs, Balaade, und fasch immr mitere Portioon Synthesizer und eleggtrischer Gitarre.
Dr Hansheini und s’Lily hänn alli Melodiee und Text sälbr gschriibe, abr händ ihr en Idee wär ene e weneli untr d’Ärm griffe hett? Dr Schorsch wo in dr erschte Staffle vo Hand uffs Härz drbyy gsi isch... und mer gläre mit em Hansheini no ai wichige Punggt vor dr nägschte Fasnacht, will mer mache-n-ys scho e chli Soorge; noch synere Antwoort 11 frooge mer ys ärnschthaft, wie mir mit unsrem Wäägeli ibr die grieni Gränze an d’Fasnacht kemme. Und ys Waggis isch au nit ganz glar worum Basel bittescheen kei Wältstadt kha syy womer Hypograss und Läggerli im Bluet hänn?
Abr isch alles schnoorz: Ton ab - machet eych startglar, hänget y bi dr Tischnochbere und los goht’s …


1. Was isch dy ydriggligschti Fasnachtserinnerig?
HANSHEINI:  Dr erscht Morgestraich als Pfyffer. Zwei Stund pfyffe denn bi ich grangg gsi
LILY: Morgestraich, Dunggel, Druggete

2. Was ka dy an dr Fasnacht närve?
HANSHEINI: Waggis wo nimm kenne intrigiere
LILY: e Druggete wo nimm use kunnsch

3. Welli drey Wörtr falle dir zem Begriff „Waggis“ spontan ii?
HANSHEINI:  grossi Nase, guete Schnurre und e bitzeli Durscht
LILY: langi Nase, grosse Kopf und grossi Mähne

4. Sell d’Waggis-Naaselengi vom Fasnachts-Comité reguliert wärde? (falls jo, uff wie lang maximal?)
HANSHEINI:  Nai uff kei Fall
LILY: Nai wieso ?

5. Basel ohni Fasnacht isch wie …. ?
HANSHEINI:  Unseri Lieder ohne Musig
LILY: Franggryych ohni Chansons

6. Was bringt di so richtig uff’d Palme?
HANSHEINI:  Dr Nyyd und Missgunscht an dr Fasnacht und au sunscht
LILY: Tierli mitnäh an d'Fasnacht do drzue gheere au d'Ross

7. … und ibr was kasch dy eso richtig froie?
HANSHEINI:  Iber e guet glunges nois Lied über Basel
LILY: iber jede Dag wo irgend eppis scheens passiert

8. E liebs Familiemitgliid schänggt dir zem Geburtsdaag e FCZ-Saisonabo – was machsch?
HANSHEINI:  Ich kenn kai so liebs Familiemitglied
LILY: ich weiss nid wär dr FCZ isch

9. Wenn Ziiri ‚Downtown Switzerland’ isch, denn isch Basel… ?
HANSHEINI:  Basel near to heaven
LILY: Basel la plus belle ville du monde

10. Was isch fir di dr scheenschti Ort z’Basel?
HANSHEINI:  Petersplatz
LILY: Andreasplatz

11. Was wurdsch an Basel - odr an dr Schwiz - sofort ändere?
HANSHEINI:  weniger Lyt iineloo
LILY: underem Joohr glichvyl Toleranz wie an dr Fasnacht

12. Mit wellem Mensch (ob lebändig odr nit) wottsch du gärn emol znacht ässe?
HANSHEINI:  Johann Peter Hebel
LILY: Yves Montant

13. … und was wurdsch du die Person ganz sicher frooge?
HANSHEINI:  wie är Basel vo damals duet beurteile
LILY: wohär sini Idee ko sin fir alli sini Lieder

14. Was isch fir di dr Maximallohn wo-n-e Mensch pro Johr derft verdiene, egal wo und wievyyl är/sie schafft?
HANSHEINI:  nid mehr als 100 x dr Lohn vom schlächtisch bezahlte Mitarbeiter
LILY: Maximal Sfr. 300000.---

15. Was nimmsch mit uff e-n-ainsami Insle?
HANSHEINI:  d'Lily, Guitarre und Papier und Bleistift zum noie Lieder z'schrybe
LILY: dr Hansheini und e huffe Biecher

16. Wär odr was bringt di sofort zem lache?
HANSHEINI:  wenn e Waggis e wirgglig guete Spruch uselooht
LILY: dr Hansheini wenn är duet handwärggle

17. Letschti Froog, Hand uff’s Härz: wäm wurdsch du die Frooge am liebschte zem beantworte gäh?
HANSHEINI:  dr Hanspeter "Büxe" Bürgin vo dr VKB dasch e glatte Siech
LILY: Silvia Wessang ehemooligs Mitglied vom Ensemble Charivari