Beni Salvioli

Dr Bâlaari isch 2005 noch vyylne Johre im Usland widr haime uff Basel koh und är hett aifach widr uff e Waage miesse - Waggis muesch syy, Waggis kasch nit wäärde. Und drnoo sinn vo allne Megligkaite numme die domolige Balggebieger in Froog koh. Und das hett e guete Grund kah: dr Beni Salvioli.

Dr Beni isch e Waggis wie-n-är im Buech stoht (au wenn er jede rächte Waggis zer Wyssgluet bringt will är, druurig abr wohr, jederzyt e Cola Zero emmene Bier odr Wysse vorzieht). Dr Beni isch e geniaale Handwärgger wo mit vyyl Härzbluet dr Waagechef gmacht hett. Scho legendär isch sy Ufftritt vor dr Fasnacht 2003, wo-n-är die ganzi Clique verdonneret hett, dr Waage nomol ney z’dekoriere wyl ihm nit passt hett was in synere Abwäsehait baschtlet worde-n-isch. Und wenn är an dr Fasnacht mit Rastalogge im Cliquekäller zem Danz yglaade hett no isch kai Aug drogge blyybe, Fasnacht mit eso vyyl Italianità hett’s no nie gäh…

Noch em Zämmebruch vo de Balggebieger ha-n-y dr Kontaggt mit em Beni e chli vrloore; laidr hett är syni Zoggeli an Nagel ghänggt und widmet sich jetzt synere zwaite Liebi: em Catenaccio. Är macht d’Ussbildig zem Fuessballtrainer. Sy Mannschaft hett uffem erschte Rang ibrwinteret und jetz drugg ych ihm ganz fescht d’Duume ass är dr Uffstig in die 6. Liga das Johr scho schafft. Und au wenn’s jetzt zersch emol kaini drey scheenschte Dääg mit em Beni meh gitt, e Härz fir d’Frau Fasnacht hett är immr no und fir dr Bâlaari luegt är nomol zrugg uff die glohrryyche Zyyte.

(und ybrigens: au wenn är eso usgseeht, är isch NIT em Almi sy Salvi).

 

 

1. Was isch dy ydriggligschti Fasnachtserinnerig?

Das isch gsi vor mänge Johre wo ich s’erschtmol uff emmene Waagiswaage ha dörfe die scheenschte drey Dääg gniesse

 

2. Was ka dy an dr Fasnacht närve?

Giggsendi Girls am Waggis-Waage wo sich benämme wie ammene Take That Konzärt oder e alti Frau wo di vom Wettsteiplatz bis an Märtplatz verfolgt numme wäge emmene Mimöösli

 

3. Welli drey Wörtr falle dir zem Begriff “Waggis“ spontan y?

E geile Siech…

 

4. Sell d’Waggis-Naaselengi vom Fasnachts-Comité reguliert wärde? (falls jo, uff wie lang maximal?)

Jede söll sini Lengi sälber eruiere,

s’Comité het do nüt z’reguliere.

 

5. Basel ohni Fasnacht isch wie …. ?

Züri ohni dr Böög, Luzärn ohni Kappelbrugg, Bärn ohni dr Bär, St. Galle ohni OlmaWURSCHT, Fribourg ohni Gruyère, Tessin ohni Risotto, Schaffhuuse ohni Rhyyfall, d’Schwiz ohni Fondue, Schoggi, Bärge und Uhre

 

6. Was bringt di so richtig uff’d Palme?

E Leitere ….bi jo kei Aff

 

7. … und ibr was kasch dy eso richtig froie?

Uf die Zyt knapp vor dr Fasnacht – will Vorfreyd isch die greschti Freyd

 

8. E liebs Familiemitgliid schänggt dir zem Geburtsdaag e FCZ-Saisonabo – was machsch?

Ha doch keini Ziircher in dr Familie - was isch das für e Frog !!!!

 

9. Wenn Ziiri ‚Downtown Switzerland’ isch, no isch Basel… ?

S’bescht wo’s je hett’s gits

 

10. Was isch fir di dr scheenschti Ort z’Basel?

Z'Basel am mym Rhyy,
jo, dört möcht i syy!
Wäiht nit d'Luft so mild und lau,
und der Himmel isch so blau,
an mym liebe,
an mym liebe Rhyy.

In der Münschterschuel
uf mym herte Stuehl
mag i zwor jetzt nüt meh ha;
d'Tööpli stöhn mer nümmen a
in der Basler,
in der Basler Schuel.

Aber uf der Pfalz
alle Lüte gfallt's.
O, wie wechsle Berg und Tal,
Land und Wasser überal,
vor der Basler,
vor der Basler Pfalz!

 

11. Was wurdsch an Basel - odr an dr Schwiz - sofort ändere?

Dass I wieder chönt durch d’Steine bloche mit mim Alfa Sud

 

12. Mit wellem Mensch (ob lebändig odr nit) wottsch du gärn emol znacht ässe?  

Mit em Malefyz Balaari – würd dä schampar gärn mol kennelehre

 

13. … und was wurdsch du die Person ganz sicher frooge?

wie isch es gsi in Südafrika mit dr Nati?

 

14. Was isch fir di dr Maximallohn wo-n-e Mensch pro Johr derft verdiene, egal wo und wievyyl är/sie schafft?
mit oder ohni Abzüg?

 

15. Was nimmsch mit uff e-n-ainsami Insle?

Mini liebschti (will die wüsst scho wie mir wieder vo dere Insle würde wägg cho … wenn mir denn gnueg hätte)

 

16. Wär odr was bringt di sofort zem lache?

Em Malefyz Balaari sini Homepage (bsunders dr Teil über si WM Usflug)

 

17. Letschti Froog, Hand uff’s Härz: wäm wurdsch du die Frooge am liebschte zem beantworte gäh?

Mim Waagis-Bruder vo de ehemalige Balggebieger: em Däni Schreier