Dimitri

Byhni frey fir e ganz spezielle Gascht, ain wo me vyllicht nit zwingend do erwartet hätt (und wo uff e ganz spezielli Art zu Hand uff Härz kho isch): dr Dimitri.

 

„Der Clown ist ein ewig Suchender. Er sucht nach Glück, nach Heiterkeit, nach Einfalt - ein Typ, der die Allüren eines Kräutersuchers hätte, wenn die Wahrheit eine Blume wäre. Er ist auch ein ewiger Hofnarr, der auf seine Weise die Leute zum Lachen bringen, unterhalten und ihnen einen Teil seiner selbst schenken möchte.“ (dr Dimitri immene Interview)

 

Jetz kennti me vyyl philosphiere ibr Parallele zwische Waggis und Gleen (verglaide, vrschideni Figuure spiile, uff Lüt zuegoh, zem Lache bringe odr au zem Studiere, Improvisiere…) abr he, ibrdryybe wämmer nadyrligg nit.

Dr Dimitri isch ain vo de bikanntischte Schwizr ibrhaupt, aine vo de greeschte Gleen wo’s je gäh hett, ebber wo e jede Saal kha fille, egal ob z’Titterte, z’Paris odr z’San Francisco, wo s’schafft Grossi und Binggis mitenandr in e Wunderland z’entfiehre und e Lächle uff e jeds Gsicht z’zaubere. Mit synere Magie, synere Poesie und unerschepfligr Mymik und Geschtik hett är Generatioone in sy Bann zooge; ellai uff dr Byhni, ohni Kulisse und mit ganz wenig Reggwisite, solo – so kennt me ihn uff dr ganze Wält.

Geboore 1935 z’Ascona als Dimitri Jakob Müller hett är ibr 50 Johr Byhnierfahrig uffem Buggel; mit 7 Johr hett dr Dimitri scho gwüsst ass är wott Gloon wärde. Är hett drnoo sy pantomymischi Ussbildig bim Etienne Decroux absolviert und in dr Truppe vom legendääre Marcel Marceau z’Paris mitgwirggt. Und dr Räscht isch Gschicht; erschts Soloprogramm 1959, Toure in dr Schwiz (unter anderem drey mol im Zirkus Knie) und uff dr ganze Wält, Gründig vom Teatro Dimitri z’Verscio (1971), Theaterschuel (1975) und Compagnia Teatro Dimitri (1978). Är isch vyylfach fir sy Schaffe uszaichnet woorde: dr Grock-Bryys, dr Hans-Reinhart-Ring, dr Ehre-Prix Walo, dr Swiss Society Award und vyyl meh, drzue isch är syt 1995 in dr Clown Hall of Fame (USA).

Was abr ganz wenig wisse: Dr Dimitri hett au scho Fasnacht gmacht (wie und wo verzellt är do; laidr nit als Waggis: obwohl, s’Talänt hätt er jo…). Und wie är zu Hand uffs Härz kho isch isch au e spezielli Gschicht: gwunsche worde-n-isch dr Dimitri vom … Christoph Blocher, bekennende Gloon-Fan, wo sy Wunsch abr grad relativiert hett mit de Wort „Em Dimitri, de redt ja nöd.“ Hey Christoph, nadyrligg schwätzt (pardon: redt) dr Dimitri, und wie guet gseht me do … und d’Moraal vo däm ganze? Die halbi Schwiz mag vorem Blocher zittere, abr ganz sichr nit e Allianz vo Gloon und Waggis. Zämme kenne die sogar hiib- und stichfescht nochewyyse ass au e Christoph Blocher kha waisch wie falsch ligge … nobody’s perfect, sorry :-)

 

Abr jetze Liecht a und Byhni frey fir dr Dimitri: 

1. Was isch dy ydriggligschti Fasnachtserinnerig?

Als Chind am Carnevale in Ascona hani mi vor allem über de Gratisrisotto und d' Bandella gfreut. Natürlich hani mi au denn scho gärn verkleidet.

 

2. Was ka dy an dr Fasnacht närve?

Luuti Tonbandmusig, kitschigi Gummimaske und vulgäri Scherz.

 

3. Welli drey Wörtr falle dir zem Begriff „Waggis“ spontan y?

Wag' is? Waggle. Weggli.

 

4. Sell d’Waggis-Naaselengi vom Fasnachts-Comité reguliert wärde?

(falls jo, uff wie lang maximal?)

Klar. Höchschtens so lang, das er zu jedere Beizetür inechunnt.

 

5. Basel ohni Fasnacht isch wie …. ?

Polenta ohni Salz.

 

6. Was bringt di so richtig uff’d Palme?

E Kokosnuss.

 

7. … und ibr was kasch dy eso richtig froie?

Es Chinderlache.

 

8. E liebs Familiemitgliid schänggt dir zem Geburtsdaag e FCZ- e Saisonabo – was machsch?

S'Cheminée Aafüüre.

 

9. Wenn Ziiri ‚Downtown Switzerland’ isch, no isch Basel… ?

Uptown Switzerland.

 

10. Was isch fir di dr scheenschti Ort z’Basel?

Ds Fauteuil.

 

11. Was wurdsch an Basel - odr an dr Schwiz - sofort ändere?

Sofort Verändere Potztonner

 

12. Mit wellem Mensch (ob lebändig odr nit) wottsch du gärn emol znacht ässe?

Peter Brook

 

13. ... und was wurdsch du die Person ganz sicher frooge?

Gits i 100 Jahr no Theater?

 

14. Was isch fir di dr Maximallohn wo-n-e Mensch pro Johr derft verdiene, egal wo und wievyyl är/sie schafft?

So vil er will, wenn er d'Helfti für Kultur und Wohltätigkeit uusgit.

 

15. Was nimmsch mit uff e-n-ainsami Insle?

D'Espresso-Maschine.

 

16. Wär odr was bringt di sofort zem lache?

Es jungs Büseli.

 

17. Letschti Froog, Hand uff’s Härz: wäm wurdsch du die Frooge am liebschte zem beantworte gäh?

Am "PapaRazzi" (Papst Benedikt XVI./Ratzinger)

 

[Amerggig vo dr Redaggtioon: das wird hart]

 

 

"Der Clown ist ein aufrichtiges Wesen, rein in seinen Gefühlen, das sich absichtlich in den Zustand der Kindheit zurück versetzt und seine komische Begabung spielen lässt. Im Grunde kann er sich alles erlauben, vorausgesetzt, dass es clownesk ist ... Der Clown ist ein ewig Suchender. Er sucht nach Glück, nach Heiterkeit, nach Einfalt." (Dimitri)

 

Meh Informatioone ibr dr Dimitri gitt’s uff

http://www.clowndimitri.ch/