René Häfliger

Wär dr FCB syt Joore vrfolgt könnt e halbs Buech schryybe übr dr René. Mache mr nit, abr e ganzes Kapitel goht an syni legendääre Pauseintrviews:

 

... do wäre mol e Duschi uff dr Maladière, wo zmitts im Gspröch 2 Meter nääbe ihm dr Raasesprängr agange-n-isch...

... syni phänomenaale Kenntnis in Mathematik: „Wär 20 Joor immr an Matsch goht, gwünnt im Pausespiil garantiert emol en Uhr.“ (Achtyg, Rechnen mit René: 34 Heimspiil pro Johr mol 20 = 680; und was bitte isch mit de andre 23'000 Naase)

... wenn en Fans inere Tapas Beiz z’Barcelona spontaan fyyhre wänn („merci, abr jetz würd ych gärn ässe“)

... syni legendääre Gspröch mit Kindr: „ wär gwünnt hüt?“ „dr FCB dängg!“ „und wie goht’s us?“ „1-1“ - „ah jä... und wär schiesst’s Goal?“ „dr Yakin“ „abr dä schuttet jo gar nüm bim FCB“ - „Doch!“

... odr wir wär’s mit Schwyzr Geographyy? „Do hätte mr dr Fredi vo Grossdottikon – sag emol, Fredi, wo zum Geier isch Grossdottikon?“ „Grad nääbe Niedermurpfelbach.“

... und au sy metaphysischi Natur isch ys e Mäldig wärt: „es isch Pause und dr FCB isch virtuelle Tabällefiehrer!!“ (macht dr Däni duubedänzig im Fall)

 

Für’s Rahmeteggschtli hämmr ys abr für öbbis ganz anders entschiide – öbbis wo alles in Schatte stellt wo mr je vo-n-em gseh hänn und wo me abr au gar kei Woort me vrliere muess:

 

„Dr Matsch isch fertig und me kha’s gar nit glaube dr FCB unsere FC Basel stoht in dr nägschte Rundi vo dr Champions League und schloot s’grosse Manchester United me wott gar nüm uffwache es isch wie-n-e Traum und unsri rotblaue Härze schlöön wie vrruggt – 2:1 y weiss fasch nit was saage y pfätz my abr es isch eso vrruggt y glaub y träum luege mr ys d’Gool nomol a jä vo dene kha me nit gnueg bekho noch 9 Minute dr erschti Volldräffr Flangge vom Shaqiri däm gleine Zauberzwärg genau in d’Mitti zwei ManU Vrteidigr behindere sich und am hindere Pfoschte stoht dr Marco Streller unsre Captain goldrichtig und knallt dr Ball rächts unde flach ins Netz GOOOOOOAAAAAAAAL und Einsnull für unsre FCB es isch nit zem glaube wär das e Sensatioon und es kunnt no bessr in dr 84. Minute widr dr Shaqiri vo rächts dä gleini Kraftwürfl was hett da alles gleischtet hüt zoobe är gseht dr Alex Frei frey hinde und lüpft dr Ball übr dr Ferdinand als wär’s e Wegglibueb und hinde stoht unsre Goalgetter richtig und macht’s ZWEINULL GOOOOOOAAAAAAAAL ManU macht’s nomol spannend s’Aschlussgool kunnt abr dr z’spoot und drnoo die 93. Minute dr Schiri pfyfft ab mir sinn gwalifiziert 2-1 für dr FC Basel 2-1 für UNSERE FC BASEL Rotblau gwünnt mir sinn e Rundi wytr mir hänn s’grosse MANCHESTER UNITED gschlaage mr sinn duure Europa mir kömme das isch jo goppeloni dr Hammr y glaub’s no gar nit.“

(René Häfliger, 7. Dezämbr 2011, 22.41h)

 

____

 

 

1. Was isch dy ydriggligschti Fasnachtserinnerig?
Syt i ka dängge hani jedes Johr vom Mäntig am Morge am vieri bis zum Ändstraich nur die yydriggligschte und schönschte Erinnerige. Mit einere einzige negative Usnahm: Wenn eim dr früsch renovierti und äggstra uf d Fasnacht rächtzytig neu ufgmachti und randvolli Bruuni Mutz am Fasnachtszyschtig am halber zwai am Morge uusekeit und zue macht.

2. Was ka dy an dr Fasnacht närve?
Wenn si im Bruune Mutz am halb zwai am Morge uffestuehle.

3. Welli drey Wörtr falle dir zem Begriff „Waggis“ spontan ii?
Glatti Sieche, langi Nase und heiseri Stimme.

4. Sell d’Waggis-Naaselengi vom Fasnachts-Comité reguliert wärde? (falls jo, uff wie lang maximal?)
Unbedingt! Und zwar individuell im Verhältnis zum Körpergwicht.

5. Basel ohni Fasnacht isch wie …. ?
Dr Thunersee ohni Thunfisch

6. Was bringt di so richtig uff’d Palme?
Wie isch jetz das nomol gsy mit em Bruune Mutz???

7. … und ibr was kasch dy eso richtig froie?
Wenn d Termin vo de Champions-League-Spiel nit uf d Fasnachtsdäg falle

8. E liebs Familiemitgliid schänggt dir zem Geburtsdaag e FCZ-Saisonabo – was machsch?
I frog unter mine liebe Zürcher Fründe, ob öbber e Freud het dra und rächne drmit, dass das nit dr Fall wird sy...

9. Wenn Ziiri ‚Downtown Switzerland’ isch, no isch Basel… ?
Ganz unabhängig vo Züri isch Basel die Stadt, wo im Verhältnis zu ihrer Grössi wältwyt wohrschynlig am meischte z biete het. (Museumsdichti, Baselworld, FCB, Roger Federer, Basel Tattoo, Swiss Indoors, Fondation Beyeler, Art, AVO Session, etc...) Isch me sich däm z Basel eigendlig wirgglig bewusst??

10. Was isch fir di dr scheenschti Ort z’Basel?
Im Juli dr Hof vo dr Kasärne, während de Mätsch s Joggeli und an dr Fasnacht s Bermudadrei- und s Schofegg!

11. Was wurdsch an Basel - odr an dr Schwiz - sofort ändere?
Ich würd lieber hüt als erscht Morn zwingend dr Kanton Basel mit Ybezug vo dr Agglomeration Nordweschtschwyz yyfiehre. Flieg emol über d Stadt und stell Dr vor, wo d Kantonsgränze zwüsche Basel-Stadt- und Basel-Landschaft duuregoht. Bispiel Steinbühlallee etc... Sone Absurdheit gits wältwyt ebe au nur ei Mol!

12. Mit wellem Mensch (ob lebändig odr nit) wottsch du gärn emol znacht ässe?
Mit em Thomas Mächler

13. ... und was wurdsch du die Person ganz sicher frooge?
Ob är das wirgglig Ärnscht meint mit sym Verhinderigsbegehre vom Basel Tattoo und was es ihm git, wenn är sich mit somene Vorstoss bimene Grossteil vo dr Bevölkerig lächerlig macht.

14. Was isch fir di dr Maximallohn wo-n-e Mensch pro Johr derft verdiene, egal wo und wievyyl är/sie schafft?
Jede dörf eso vyl griege wiener verdient. Aber e Mänge verdient nit eso vyl wiener griegt...

15. Was nimmsch mit uff e-n-ainsami Insle?
S Piccolo dängg!

16. Wär odr was bringt di sofort zem lache?
Die baar lutstarke Aawohner in minere diräkte Nochberschaft wo finde, s Grilliere am Untere Rhywäg miesi verbote wärde.

17. Letschti Froog, Hand uff’s Härz: wäm wurdsch du die Frooge am liebschte zem beantworte gäh?
Mim lieblings-Fasnachtsmarschkomponischt Michael Robertson.