Johann Wanner

Stolz uff sy Kolleggtioon "W": dr Johann Wanner
Stolz uff sy Kolleggtioon "W": dr Johann Wanner

Dr Spaalebärg isch e Hort vo Seeligkait in unsrer Stadt. Laufsch en derab, no gsehsch nit numme Huetlääde, Modällyysebähnli und allewyyl glaini Lädeli wo me no Zyt hett fir die wärti Kundschaft (me kennt sich), au s’Fauteuil, Teeläädeli und e Antigwaar, haimeligi Baize (wemmer emol vom Spärbr abgsehn) … und drnoo dr wältwyt greeschti Härstellr vo handgmachtem Wiehnachtsschmugg. Wie bitte? Nomol! Dr wältwyt greeschti Härstellr und Händlr vo handgmachtem Wiehnachtsschmugg: s’Ainzeluntrnähme Johann Wanner Weihnachtshaus. Und Hand uffs Härz, wär wurd das scho dängge wemme in däm haimelig, wundrbärligg dekorierte Laade stoht, munzig und s’ganz Johr Wiehnachtsambiance, e global player? Abr es isch wohr. Dr Johann Wanner beliferet nit numme Tout Bâle (wär ebbis wott gälte in unsrer Stadt lot sich vom Herr Wanner PER-SEEN-LIGG beroote) abr au die ganzi Wält (was fir mänggi Basler jo s’glyche isch). Und wie es sich fir e Grand Seigneur gheert, isch d’Lischte vo de treye Kunde prominänt und rächt disgreet – mer hänn numme grad in Erfahrig kenne bringe ass d’Lady Diana Spencer, d’Grimaldis, s’Huus von Hohenzollern, dr Jean Tinguely und dr Michael Jackson ihri Chrischtbaumkugele exgglusiv vom Johann Wanner bezooge hänn (und friehneri amerikanischi Presidänte au), drzue hett är 1998 dr Wiehnachtsbaum vom Vatikaan uffem Petersblatz dekoriert (753 grossi Silbr- und Goldkuugele!), dr Schmugg fir dr National Christmas Tree im Wysse Huus z’Washington gliiferet und das Johr dr Wiehnachtsbaum uffem Minschtrplatz, etc etc.

Agfange hett das ganz beschaide. Dr Johann isch anno 1939 (struubi Zyte) z’Basel uff d’Wält kho. Nochere kaufmännische Usbildig isch är drnoo ab in Oriänt, Afghanistan, Irak und Egypte; retour am mym Rhyy hett är e Antigwaarlaade z’Basel ereffnet, zersch im St Johann und drnoo am Spaalebärg. Kunde hänn in de 60er Johre sy Interässi fir Wiehnachtsschmugg gweggt und är hett agfange, blooseni und bemoolti Glaaskuugele z’sammle und z’vrkaufe. Wo das zooge hett, isch dr Johann in die domooligi DDR uff Thüringe, s’Glasbleesermekka innere wirtschaftlige Depressioon, und hett erfolgryych mit dr DDR Regierig ibr e Import („licence to buy“) vrhandlet (e riskant Abentyyr wo sich glohnt hett; mit mängge Bedriib schafft är no hitte zämme, au wemme in d’Tschechei und noch Poole expandiert hett). Und dä Schmugg isch dr grossi Rennr worde, eso gross ass s’glaine Wiehnachtshuus vom Spaalebärg wältwyyt zer Nummere 1 uffgstiige isch. Hitte fiehrt dr Laade s’ganz Johr e riisig Sortimänt: Papyyr, Schmugg, Gleggli, Kaländr, Ängeli – abr kaini Krippefiguure, will dr Johann Wanner als glaibige Christ s’Christkindli nit als Dekoratioonsobäkt mechti abiete. Drzue isch är au e Trendsetter; es wird traditionnels vrkauft und neys fir d’Dekobranche kreiert. So wird nit numme e ender konservativi Nochfrog erfillt abr au e neye Märt geffnet und erschlosse - und das wurd au ergläre worum me dr Johann als gar nit wiehnachtligg uff synere Harley Davidson gseht ummerausche odr in sym Rolls Royce – wo kai Nummere hett drfyy aifach numme WANNER (und ihm scho e baar Buesse bescheert hett, nit numme an Wiehnachte).

Blibt ys zem Schluss numme die lapidaari Amergigg ass wenn d’Bâlaari ihr Boschtscheggkonto ruume, d’Ynaahme vom Jassturnier 2012 und vo de Bâlaa-B-Qs 2013, 2014 und 2015 pfände, ihri Hoosesegg leere und ammene Samschdignomidaag im Dezämbr e Rundi geehn go singe in dr Staine – no kennt’s ys Waggis au emol fir ai Wiehnachtsbaumkugele vom Wanner länge…

 

 

1. Was isch dy ydriggligschti Fasnachtserinnerig?

Dr erschti Morgestraich nach em Krieg, uf em Rugge vo mim Babbi, i glaub s isch 1946 gsi.

 

2. Was ka dy an dr Fasnacht närve?

Die organisierte Orangesammler

 

3. Welli drey Wörtr falle dir zem Begriff “Waggis“ spontan ii?

Fräch und gschyyd intrigiere (isch sälte worde)

 

4. Sell d’Waggis-Naaselengi vom Fasnachts-Comité reguliert wärde? (falls jo, uff wie lang maximal?)

S Comitee reklamiert däwääg scho z viel - dorum hani d Kinderfasnacht am liebschte am Zyschtig Nomidaag

 

5. Basel ohni Fasnacht isch wie …. ?

Wiehnacht ohni Kerze und ohni Gschänk

 

6. Was bringt di so richtig uff’d Palme?

Faadeschiinigi Usrede

 

7. … und ibr was kasch dy eso richtig froie?

Nach em Apéro Riche, e Klöpfer, Brot und e Glas Wyy

 

8. E liebs Familiemitgliid schänggt dir zem Geburtsdaag e FCZ-Saisonabo – was machsch?

I würd mr überlege, obi e zweits Mol in mim Lääbe an e Fuessballmatch gieng

 

9. Wenn Ziiri ‚Downtown Switzerland’ isch, no isch Basel… ?

Uptown Culture

 

10. Was isch fir di dr scheenschti Ort z’Basel?

dr Sankt Leonhards-Kirchplatz

 

11. Was wurdsch an Basel - odr an dr Schwiz - sofort ändere?

eigentlig nyd, vor allem aber nid sofort - s sich jo alles scho gänderet

 

12. Mit wellem Mensch (ob lebändig odr nit) wottsch du gärn emol znacht ässe?  

i ha scho fascht mit allne mir wichtige Lüt gässe, mit em Ramses em 2te hätti no Spass

 

13. … und was wurdsch du die Person ganz sicher frooge?

ob d Oberägypter au Stüüre zahle

 

14. Was isch fir di dr Maximallohn wo-n-e Mensch pro Johr derft verdiene, egal wo und wievyyl är/sie schafft?

er dörf so viel verdiene wie me nem nochschiesst

 

15. Was nimmsch mit uff e-n-ainsami Insle?

Badhoose

 

16. Wär odr was bringt di sofort zem lache?

e Politiker vor de Wahle

 

17. Letschti Froog, Hand uff’s Härz: wäm wurdsch du die Frooge am liebschte zem beantworte gäh?

mim Hoofnarr, aber i machs sälber, s isch ehrlicher