Zeedel 2019

 

‚s isch zem hyyle!’

 

Willkomme z Basel, dere wundrbaare Stadt!

Mr hänn Fasnacht, feschte, d Lyt hänn s glatt.

s wird gsoffe bis zem letschte Huuch

ass wär s en alte Fasnachtsbruuch.

 

Wär s nit truurig, miesstisch lache.

Fasnacht isch nit do zem Party mache.

Au wenn als wie weniger das verstöhn:

Si läbt vo iire fyyne Döön.

 

Das ganze keibe letsche Joor,

kunnt ys als Gläbbergässli vor.

Was lätz gloffe isch uff dere Wält,

fasch hätti s letsche Gleggli gschällt.

 

In Amerika macht e gföhnte Egomaan

Wältpolitygg als Business Plaan.

Machsch e Deal? No schlömmr y!

Mach was y wott, susch schlohn y dryy!

 

z Brasilie macht s ein glyych,

e sinischtre Schurggestryych.

Wär anders dänggt, dä muess in d Kischte,

kei Platz me dört für Pazifischte.

 

Im grosse Kanton kunnt d AFD

differenziere duet dört keine meh.

Meinigsfreyheit hänn hit die Rächte

Faschismus khasch so guet vrfächte.

 

s brutaale isch: schnäll gwöhnsch di dra,

vrdränge muesch es allem Aschyyn a.

Jä dänggt bi all däm Grössewahn

ächtsch öbber no an Erdogan?

 

e heisse Summer, d Gletscher schwinde

Klimawandel vorne hinde.

Probleem und Differänze Schritt und Tritt,

aber mit em Kopf im Sand, do gsehsch se nit.

 

Meinsch z Basel sygi d Wält no in dr Ornig

zem mindschte fir drey Dääg im Hornig?

leider kryyselet s au do am Rhyy ...

(das gäbt e zweite Zeedel, lömmer s syy.)

.

- dä ganz normali Wahnsinn nimmsch no hi

und dänggsch: isch s jemols anders gsi?

Was ys am meischte trifft isch s Wüsse

ass mr e liebe Mensch hit dien vrmisse.

d Frau Fasnacht nimmt ys drey Dääg d Rueh,

us em Himmel luegt e Waggis zue.

 

R.I.P. Hampe

In unsre Härze machsch wytr Fasnacht.