Anita Lachenmeier

Es gitt mänggi wo saage Bolytiggr haige-n-e so vyyl Schaarm und menschliggi Wermi wie-n-e Yyskaschte in dr Antarggtis; kasch dängge, Nägeli, ihr kennet d’Anita Lachenmeier nit! Immr mit emmene Lächle uffem Gsicht, allewyyl lüpfig und uffgstellt – wemme d’Anita eso aluegt kha me sich bi Goscht nit vorstelle ass Bolytigg nit kennti Fraid mache. Abr uffbasst!!! Goht's um d’Beschnydig vom ÖV no vrstoht si ibrhaupt kai Spass, bi dr Sydumfahrig au nit und erscht rächt nit bim Transport vo radioaggtive Abfäll duur Wohnquartier (duur’s Glaibasel niemols, duur’s Grossbasel … also wenn’s unbedingt miessti syy, abr numme untr greeschte Sichrhaitsvorkehrige) und wehe Bärn nimmt syni Randregioone nit ärnscht. Und juscht richtig gsotte wird si wenn dr Bund, zem e chli spaare odr dr Finanzusglyych akurble, d’Hauptboscht z’Basel numme no vom 11.30 bis am halbr 12i wott off ha odr dr Oriäntexpress numme no im 34 Minute-Taggt richtig Kasärne söll fahre – wär das mit dr ere wott diskutiere, bittscheen, abr es kha niemer saage me syg nit gwarnt woorde.

D’Anita isch uss dr griene Basler Bolytigg nit ewägg z’dängge, e Bildrbuechkarriere au wenn si e kai Blatt vor’s Muul nimmt (au die Bolytiggr gitt’s). S’erschte mol bolytisiert hett si bi dr Debatte um d’Kasärne, drnoo isch se Presidäntin vo de VCS beider Basel worde, 1995 nationaals Vorstandsmitgliid vo de Griene Schweiz, 1997 im Basler Grosse Root und Vorsitzendi vo de Griene Basel-Stadt, wo si in wichtige Kommissioone gsi isch (Vrkehrskommissioon, Bau- und Ruumplanigskommissioon, Usschussmitgliid vom BVB-Verwaltigsroot). 2007 drnoo dr grossi Höhepunggt und d’Wahl in Nationalroot (und z’Bundesbärn in dr Kommissioon für Vrkehr und Fernmäldewäääse und dr Sichrhaitsbolytische Kommissioon). Und als wär das nit alles scho gnue isch d’Anita au no Textil-, Wärgg- und Religionslehrere annere Primarschuel im Glaibasel.

Abr no bivoor mer ihre jetz s’Woort gänn wämmer, mer sinn halt Waggis, e glains Ghaimnis vroote. D’Anita isch au im Privaatlääbe schampaar gmeegig und ugffgstellt, abr ains kha se fuggse: wenn am Remo sym jeehrlige Jassturnier dr Maa vor ihre blatziert isch, do vrgoht au ihre s’lache. Abr dr Christoph kha dr Familiefriide nullkommabletzligg widr härstelle mitere professionelle Parodie vom – abr Stopp, mer gryffe scho vor uff ihri Antwoort 16...

 

 

1. Was isch dy ydriggligschti Fasnachtserinnerig?

Wo ni mit mine Johrgängler im 78 vo Ettige nach em Fasnachtsfüür direkt an Morgestraich gange bi.

 

2. Was ka dy an dr Fasnacht närve?

Nüt..

 

3. Welli drey Wörtr falle dir zem Begriff „Waggis“ spontan y?

Orange, grossi Schnurre, Zoggeli

 

4. Sell d’Waggis-Naaselengi vom Fasnachts-Comité reguliert wärde? (falls jo, uff wie lang maximal?)

Nei, wenn e Waggis uf d’Naase keie wöt, isch das si Sach…

 

5. Basel ohni Fasnacht isch wie …. ?

Weihnacht ohni Weihnachtsbaum

 

6. Was bringt di so richtig uff’d Palme?

Dass viel Lüt nit über ihre Nasespitze usedängge, dorum bruchts viellicht längeri Waggisnase….

 

7. … und ibr was kasch dy eso richtig froie?

Übr e sunnige Daag, wo jeti un pleti mit em Velo oder z’Fuess gmütlich am Rhy unterwägs isch

 

8. E liebs Familiemitgliid schänggt dir zem Geburtsdaag e FCZ-Saisonabo – was machsch?

Das isch usgschlosse, dorum muess ich mir keine Gedangge drüber mache.

 

9. Wenn Ziiri ‚Downtown Switzerland’ isch, no isch Basel… ?

… s’Härz vo Europa

 

10. Was isch fir di dr scheenschti Ort z’Basel?

Dr Florabeach bi Sunneuntergang (Rhystäge bi dr Florastroos)

 

11. Was wurdsch an Basel - odr an dr Schwiz - sofort ändere?

Basel: 365 Dääg s’Verkehrsregime vo dä 3 schönschte Däg

Schwiz: Im Februar e Fasnachts-Cortège und jede Monet e Konzärt-, Theater- und Happening-Dag uf dr Autobahn

 

12. Mit wellem Mensch (ob lebändig odr nit) wottsch du gärn emol znacht ässe?

Barack Obama

 

13. … und was wurdsch du die Person ganz sicher frooge?

Was Amerika gege d’Klimaerwärmig macht.

 

14. Was isch fir di dr Maximallohn wo-n-e Mensch pro Johr derft verdiene, egal wo und wievyyl är/sie schafft?

Meh als e Million ka au öbber, wo 365 x 24 Std. schafft, nit verdiene.

 

15. Was nimmsch mit uff e-n-ainsami Insle?

Mi Maa, dr Christoph

 

16. Wär odr was bringt di sofort zem lache?

Dr Christoph, wenn er dr Läppli nochemacht.

 

17. Letschti Froog, Hand uff’s Härz: wäm wurdsch du die Frooge am liebschte zem beantworte gäh?

Sabine Horvath, e integrierte Zürcherin