Roger Thiriet

 

1. Was isch dy ydriggligschti Fasnachtserinnerig?

An mym erschte Morgeschtraich in der Junge Garde vo de Schnurebegge hänn no Guggemuusige mitgschränzt.

 

2. Was ka dy an dr Fasnacht närve?

Ändloosi Guggemuusig-Uffdritt (drey Schtügg à 6 Minute, zweiehalb drvo ohni Larve) in Schnitzelbangg-Beize.

 

3. Welli drey Wörte falle dir zem Begriff „Waggis“ spontan ii? Gärnli, Elsass, Daniel (my Brueder, ex-Süürkrütt- und Schälle-Waggis).

 

4. Sell d’Waggis-Naaselengi vom Fasnachts-Comité reguliert wärde? (falls jo, uff wie lang maximal?)

Umkehrt: d'Waggis solle d'Naaselengi vom Comité reguliere, mit Vorteil so, ass es sy nümm überall kha dryschtegge.

 

5. Basel ohni Fasnacht isch wie …. ?

... Tattoo ohni René Häfliger.

 

6. Was bringt di so richtig uff’d Palme?

E Fasnachtsquerschnitt vom SRF TV.

 

7. … und ibr was kasch dy eso richtig froie?

's Guggekonzärt uf em Barfi.

 

8. Beschryyb ys bitte emol d’Fasnacht in dyne schlimmschte Alpträum.

Halb so vyl Clique, dopplet so vyyl Gugge, dreymool so vyyl Wääge.

 

9. Was wär dr Menschheit verloore gange wenn’s di nit gäbti?

200 Folge vo dr Färnseh-Sitcom "Café Bâle" uf SF 2.

 

10. … und was bitte wär dr Menschheit erspaart woorde wenn’s di nit gäbti?

25 schriftdütschi Cortège-Diräggtreportage uf em 3sat-Färnseh.

 

11. Was wurdsch an Basel - oder an dr Schwyz - sofort ändere?

Basel mit Baselland und d'Schwyz mit der EU fusioniere.

 

12. Mit wellem Mensch (ob lebändig odr nit) wottsch du gärn emol znacht ässe?

Em Bundesroot Ueli Muurer.

 

13. … und was wurdsch du die Person ganz sicher frooge?

"Isch dr dä Schyssdrägg noni verleidet?"

 

14. Was isch fir di dr Maximallohn wo-n-e Mensch pro Johr derft verdiene, egal wo und wievyyl är/sie schafft?

Das isch mr glyych, solang är oder sii 's verdient. 1 : 12 by Apple wär lächerlig.

 

15. Worum sött e Waggis Stadtpresidänt wäärde?

Wäge dr Amtszytbeschränggig uf drey Dääg.

 

16. Wär odr was bringt di sofort zem lache?

Myni Änggel Lionel (5) und Cyrano (2).

 

17. Letschti Froog, Hand uff’s Härz: wäm wurdsch du die Frooge am liebschte zem beantworte gäh?

Em Willy Surbeck, Chefredaktor vo Telebasel.