2014: Baiz-opoly am mym Rhyy
Das wär si gsi, unseri NOW Fasnacht (Neocitran, Otrivin, Wick MediNait)!
Dr Petrus wird Basler Ehrebürgr, abr was bringt eim e Summr im Meerze wenn d Bâlaari havariert sinn und quaasi uff Drooge in d Zoggeli mien – dr CT het am Zyschdig sogar wäge Krangget miesse ussetze.
Agfange hett das ganze unter keim guete Stärn:
Dr Larvebauer isch nit eso zwääg und mr bekömme d Larve ersch dray Dääg vor de drey scheenschte Dääg...
am Sunntig goht ys d Hupi kaputt und vor lutr schnäädere mit de Nochbere bim Warte uffs Drämmli vrgässe mr fasch unseri Larve. En energische Spurt hett das grad no könne rette.
Henu, abr au am Mäntig und Mittwuch hett s vyyli spezielli Momänt gäh, zem Byspyyl:
Am Mäntig:
e härzlig Widrseh mit dr Lisbeth vo Zumikon...
d e Güete Bonjour Glygge schnappt ys dr Platz an dr Schiffländi ewägg – es git einewäg en Apero wo jedes Joor grössr und au e chli heggtischr wird, scho schaad ass mr eso weni mit euch allne könne schwätze...
d Gryysel (e bi Goscht wilde Bangg – pax vobiscum, Digge!) mache näbe-n-ys halt, und wie s halt eso isch mit de Bâlaari und de Schnitzlbängglr – noch zway Fläsche Wysse bikemme mr als Bhaltis e Helge gschänggt! ... (Baustell)
uffem Märtplatz git s im Restaurant zem schiefe Waggis “Würschtli und Röschti“...
mr „gwünne“ s goldyge Räppli für dr schöönscht Waage – dumm numme, ass mr d Handschrift kenne...
Am Zyschtig:
Erholt sich dr CT während dr Däni S. ...
... Kindrfasnacht macht mitere Multi-Kulti-Binggisglygge, em unvrwieschtlige Larve Kuttle und emmene ex-Stainlemer wo eso alt isch ass är zoobe nüm an d Fasnacht kunnt (Arsenal schuttet und am 10i isch es z kalt)...
... uffem Minschtrplatz vomene Schnitzelbangg entfiehrt wird (WAGGISNAPPING sait me däm), mitere Schärpe usstaffiert und haimlifaismässig an Striggedeball in d Saffere vrschleppt wird, wo-n-är Himmel hilf e Gaschtuffdritt mit emmene Bangg absolviert und es zuemene Widrseh mit em Striggede-Karli kunnt (Fasnacht 2013!). Gschwätzt hämmr nit, abr es hett e segge Umarmig gäh. Mr hänn ys widr gärn und är kunt sichre mol zu uns.
Am Mittwuch:
... die grandioosi Ufferstehig vom CT!
... zway armi halbvrdurschteti Stainlemerwürschtli (Namme dr Red. bikannt) sinn ganz uffgleest will si ihre Zug vrloore hänn. D Bâlaari tröschte se mit Bier und emmene Klappstuehl-Platz in dr erschte Reihe, wo uff s mol dr Zug vorene stoht und si vo ihre eigene Mitwürschtli uspeitscht wärde. Sorry he – abr kai Mitlaid!
... e mega-lessige Nomidaag mit vyylne Begegnige mit vyyle liebe alte und neue Bikannte!
... dr Däni S. tschalpt de Ohregribler eifach in d Formation zem mit em Robi am Susaphon schnäädere – kunnt nit grad superguet a, abr as Waggis dörfsch halt alles!
... zem Znacht spendiert dr Vossi e rundi Entrecôte vor em Club de Bâle und e Fläschli Château Petrus drzue – wenn scho dekadänt, drnoo richtig und mit Stil!
... e Sponti-Bsuech vommene Rambasse-Landrot!
... und zem guete Schluss mache mir no e Bsuech bi de Stäbli Waggis uffem Claraplatz.
Drnoo Flasche leer, d Bâlaari sinn platt und erlääbe dr Ändstraich mitere halbe Apithek im Ranze.
No e baar Zahle:
47 (Dutzend Komplimänt für em CT sy Waage)
38 (Afrooge wäge Foti, picture please, etc.)
17 (Zeedel deluxe wo mr no hänn)
15 (völlig baffi Ohregribler – was macht dä kaibe Waggis in unserer Formation?)
10 (Stutz wo dr Däni S. an dr ganze Fasnacht usgäh hett – für zway Kääskiechli am Lindebärg)
5 (geniaali Stund an dr Schiffländi)
1 (Uffdritt mit emmene Schnitzelbangg)
0 (Azahl bsuechti Källr)
und s Schlusswort gämmr em Giuseppe, wo-n-ys noch dr Fasnacht en Email schiggt:
“Dir zwei sind eifach MEGA-GEILI-SIECHE!!! Dangge villmol!!!”
Und das lömmr eso stoh.
und do wär no dr Zeedel:
10.-12. Meerze 2014: Menu à disparaison
Wär hett ys au die Baize gno?
So vyyl sinn unter e Hammer kho.
Druff kemme Wohnyge juschtamänt,
(wär s glaubt) im mittlere Bryyssegmänt.
Die alte Spunte mien ewägg
fir Starbucks, Döner und dr Mägg.
Mr hänn die Stange noni gleert,
isch d Baiz scho wägg, es isch jo gschteert.
Ändgnutzt odr au wäg dr Rendyte,
mit Zahle khasch jo du nit strytte.
Und die wo vo däm ganze profitiere
interessiert nit ass d Miete-n-explodiere.
Alti Basler Baizkultur, wär glaubt no dra?
Mir Waggis glopfe-n-uff dr Tisch – c’est ça!
Und s druurige: wo isch das Gschrey
ab all däm Baize-Ainhaitsbrey?
Vor em Paddy Reilly stehn sy stunde-n-a,
fir gspunne-dyyri Whiskies us den USA.
Was interessiert die scho en alti Knille
wenn sy im Usgang mega wänn go tschille?
Dr Charaggtr goht, und d Gschicht grad mit,
die Pubs und Grill hänn beides nit.
Lääbrli und Röschti khasch vrgässe,
die muesch jetz au scho z Lörrach frässe.
Im Gourmet-Tämpl derfsch drfir dinyere,
Schnägge-n-us Mongolye deguschtyere.
Waisch wie ligt s ys uffem Maage
wenn de nimm derfsch „FROLLEIN ZAHLE“ saage!
Kai Koch schreyt us dr Kuchi uuse,
an kaim Disch Alkis wo dien pfuuse
kai Neonlyecht me wo flaggere duet -
do bekunnsch doch grad e kaibe-Wuet.
S isch alles klinysch suubr kontrolliert,
gnormt, aiteenig, dyschtinguiert.
Fir all die wo ihr neys Imidsch wänn betoone:
Gaschtfrindschaft khasch halt nit kloone.
Baizr khasch nit wärde, säll hesch im Bluet,
statt Business Blään bruchsch Härz und Muet.
Wo sell s Fränzi mit em Wurzegrabr ahne?
Das isch en Unikat - nit vo dr Stange, nundefahne.
Und goht s Schoofegg no, als letschti Baschtion,
no mache mr derte, grad zem Hohn,
e grosses Monumänt, das sell dert syy -
fir all die Baize wo bachab sinn am mym Rhyy.