S isch wider emol aine vo dääne Herbschtdääg gsi, wo dr Fäährymaa
sy Bruef gliebt het: D Sunne het zwische de gääle Bletter vo de Plataane
an dr untere Rhyygass gschpienzlet und dr Rhyy het luschtyg vor sich aane-
grällelet.
Uffem Fäähryschtääg hän zwai kuurlygy Gselle uf s Schiffli gwartet.
Vom Ussgseh här hän sy dr Fäährymaa an zwai Komiker uss dr Schwarzwyss-Film-Zyt
erinneret, woby em Kapytään scho klar gsi isch, dass dä Verglyych e weeneli
doof und gar z digg ufftraage gsi isch.
Wo die baide Gleezy uffem Bänggli gsässe sin und sich ins Grossbasel hän
fahre losse, het dr Glainer vo de Baide gmaint, sy miesste no immene Fasnachtskäller
d Sache fir dr Oobe go richte. Sy haige drum ihre Jubyleeumsaaloss. Dr Dig…eh Greeser
het no dr Fäährymaa gfrogt, ebb är denn nid au welly kho?!
Dä het sofort zuegsait und sich gfrait uff e gediige Feschtli.
Zum Gligg hets am näggschte Daag gräägnet wie veruggt! Denn esoo isch s nid ufgfalle,
dass dr Fäährymaa vo lutter „Fasnacht vo unde“ e digge Grind kha het und zimmlig
doof dryygluegt het…esoone riise Balaary het är nämmlig scho lang nimmy haimdrait gha.