S isch vor langer Zyt gsi, wo dr Fäährymaa uff sym Beetli ghoggt isch.
Unter dr Pfalz sin e baar Lyt zuegschtiige zum ins mindereBasel gfiehrt z wärde.
Wäährend dr Faahrt het e glaine – nimmy so junge - Maa de andere Lyt verzellt, dass är vor Joohre unter dr Schtadt het derfe ammene Alphorn-Konzärt dailnäh.
D Fäährygescht hän sehr unterschiidlig reagiert!
Ai Daame het gmaint, dass jo s Alkoholikerhaim vo dr Hailsarmee nimmy wyt syygy... En andere Gascht, aine immene Aazug, het gfunde, dass är im Notfall vyly Kolleege in dr Psychiatrie wurd haa...
Und e Frau ussem Daygg het dä Maa aagschnautzt: „Verzell Du das im Fäährymaa!“.
Numme e halbwiggsyge Teeny het dä ältery Heer schtuunend aagluegt und gmaint: „E Alphornkonzärt unter dr Schtadt? Waisch wie abgfaahre! Voll gail!.... Das isch sicher en Idee vo de Malefizze gsi!“
Dass dr Fäährymaa lyyslig vor sich aanegrinst het, isch kaim vo allne uffgfalle.
Aber ains isch em Fäährymaa klar worde: „S isch Nyt unmeeglig!“
und hert verschtoohle sy Alphornmundschtigg im Hoosesagg in d Hand gnoh!