Zu däm Sujet git s nüt meh z saage: Trump als US Presidänt, Kranggekassepräämie ab duur s Dach, dr Eric Wäber als Grossroot, jeedes Kind het ADHS und jeede Erwaggsene sy Therapyy, unsere Lieblingsstadtpresidänt und -aperöler Morin Guy isch widr Huusarzt ... nadürlig simmr do drey Dääg  als Chefärzt, Prof. Dr. Ruedi Glämmerlisagg und Prof. Dr. Guy Duggemyser, uff dr Gass gsi und hänn ys das ganze Chaos erkläre loo.

Ass das in d Hoose gange isch, vrstoht sich vo sälbr ...

 

an Cortège het s dasjoor nit glängt,

mr hänn halt z fescht dr Rahme gsprängt.

s Wartezimmer isch für uns jetz d Gass

d Patiänte wo mr do hänn – krass!

 

e Maa isch kho, är syg so glai,

är kämi nit ans Schlüsselloch dehai.

dä ermschti kha me nit benyyde,

är duet an Baschi-Dürritis lyyde.

 

dr Heusler isch ganz depremiert,

für syni Aggtie haig är nüt kassiert.

zem sich Feerie laischte git s Plan B:

är übrnimmt s Catering bim EHC.

 

in dr Regierig hett en keine gfunde,

dr Ängelbärger isch ... vrschwunde.

gseh khasch dä nit, will glar:

wär farblos isch, blybt unsichtbar.

 

dr Morin hörsch jetz nümmi grööle,

jä fettig isch mit aperööle.

ass Huusarzt isch är juschtamänt

mit sym Latin au dört am Änd.

 

dr Doggter FMH, Si, dasch d Parodyy,

vom Bangg woner emol hett wölle syy.

mir misse d Schwöschtr Erika -

die neui miesst Rezäptpflicht ha.

 

dr Trump duet lutstargg fabuliere:

mr sölle, SO BAD, d Meedie therapiere.

do hilft nur eins bi sym Getwitter:

dä Typ muess sofort hinter Gitter.

 

dr Ümit, letscht Joor no mit ys uff dr Pischte,

hoggt jetz am Bosporus in dr Kischte.

dr Erdogan macht kai Fääderlääse

(är het glaub unsere Zeedel glääse)

 

... und so kha d Wält nur öbbis syy:

sehr lukrativ für d Therapyy.

d Frau Fasnacht kha do nümmi lache:

„Aadie zämme, ihr sinn jo nit ganz bache.“

 

 

Packigsbylaag

 

Vor em Lääse vo däm Zeedel und em Konsumiere

vo sämtlige do vrdeilte Medikamänt und Hueschtesirüpli

konsultiere Sy bitte ihre Arzt oder ihri medizinischi Fachpersoon.

 

ACHTYG: das Joor gänn sich ehemooligi Polytygger

als Huusärzt us. Mit ihrem Kukidänt 3 Phaase Lächle sinn si

- vor allem für elteri Fraue und Trottoirschwalbe -

nit immr als Kurpfuscher und Quacksalber z erkenne.

 

D Kranggekasse erkenne die Leischtige nit a,

dien Sy söttigi Lüt am beschte eifach ignoriere.

Bitte ruhig wytrgoh und sofort die nägschti Klapsmühli informiere. Dangge für ihre wärte Bydraag zur Fasnachts-Psychohygiene.

 

 

......................................$$$$ ......................................

 

gege Abgoob vo däm Bon git s in unsrer Praxis

e gratis Räpplitherapyy für zwai Persoone.

 

malefyz-balaari@gmx.ch