(e speziells Joor: s Sujet isch vo de 70 Dailnähmr am Balaari-Special 2014 bestumme woorde. In Sujet Workshops hänn si miesse Ideee entwiggle und drnoo die beschti vorstelle und abstimme. Ass es das woorde isch... jä, als Waggis bisch halt en armi Sau.

Und bim Zeedel hämmr massivi Ufflaage ibrkho: alli Sujetvorschleeg yschaffe und drzue no d Hauptaggteure vom Special - wirggt entweder 1) dadaistisch, odr 2) stoggbsoffe).

Abr ains noch em andere:

Fifty Shades of Fasnacht

 

Noch dr Fasnacht 2014 (letschte Ruggbligg!) isch doch aigentligg d Froog was bessr isch, krangg in dr Sunne odr gsund im Rääge? Aifachi Antwort: gsund in dr Sunne.

 

Also, was het s alles gäh an dere Fasnacht, wo jo ganz im Zaiche vom V. Jubileeum gstande-n-isch? Wo ihr alli (JÄ AU DU!!!) uns das goppeloni drümmlige Sujet “Meh Männr ans Pole-Dancing” uff s Aug druggt hänn? Wo mr (am Mäntig) mit Stange uff d Gass sinn? Und als Casanova Waggisene mit XXL Obrwyyti 2 Dääg 50 Shades of Grey-mässig Männr bezirzt hänn? Nit eso aifach, ABR: mr vrsueche s.

 

Shades of Fasnacht 2015 isch…

 

… d Premiere vo de “Bâlaari-Mysli”: zem V. Jubileeum simmr wie akündigt z fimft uff d Gass (am Mäntig); dangge an d Regina vom Bläsiring, dr Caroline (atypisch firnähm) und em unvrwieschtlige Räppli Remo (dä wurd glaub hüt no im Baslerdybli Källr abhänge!)…

… au dr Luxus, ammene Fasnachtsmäntig Nomidaag bis am 3 im Gundeli z käffele - will s schifft…

… odr zoobe en Architeggturbüro zem Kochstudio umzfunggtioniere und dört immene dänggmolgschitzte Huus mit Gashärd z hantiere – hejo will s schifft…

… en alti Dante wo-n-ys Mimösli wott filze und sich als Caro entpuppt…

… Ohregribler, Dail 1: dr Däni tschalpt de Ohregribler widr zmits in d Formation und flirtet mit em Robi am Sousaphon…

… dr Räppli Remo, wo die halbi Basler Frauewält mit syne Gummi-Artefaggt beglüggt (“läng emol dryy, Maitli”)…

… Männr wo uffem Theodorskirchplatz hemmigslos anere Stange danze…

… s Kommando Frauepower 2015, wo-n-ys abr e ganz digge Apero organisiert hett (MERCI eych allne - und dr anonyme Spändere drzue)…

… e ruhige Zyschtig wo d Bâlaari ainewääg in dr Freye Stross zämmefyehrt: dr Däni S. und dr Laarve-Kuttle mit de Binggis, dr Beni als passyve Gniessr…

… e klassischs Umgehe vo allne Sichrhaitskontrolle fiehrt dr Däni S. widr diräggt und stinggfräch in d Saffere (aadie Karli)… und mr gratuliere de Antiquierte zem 30.! isse vollgeil Mario im Fall…

… e wundrbärligs Ohregribler-Platzkonzärt im Lohnhoof…

… dr C.T. mit sym gigantische Fundus an Gadgets…

… e spontaans Revival mit alte Balggebieger-Compagnonnes in dr Gärbrgass…

… e m C.T. sy neyi Hupi wo waisch wie tschätteret – wo kunnt jetz dä kaibe-Waage?...

… e Gschänggli vo de Schlyffstai, wo ihr 10-jöhrigs hänn…

… Ohregribler, Dail II: dr Robi rächt sich und sprayt em Däni S. am Mittwuch also gopfridstutz s oberbilligschte Parfüm zmitts uff d Bluuse - s nägscht mol mugg dr dy Sousaphon, du Grüsel, khasch sichr syy…

… öbbe 200 Männr wo-n-ys Waggisene 50 Shades-mässig in d Bluuse gaffe odr zuegryffe (muesch au emol erläbt ha, Fazyt: mir Männr sinn scho aifach gstriggti Glämmerlisegg)…

… dr C.T. wo-n-e akute Lachgrampf bekunnt…

… e 22-jöörigi Studäntin, wo nägscht Joor au wott drbyy syy (Uffleesig folgt)…

 

Es gäbti no vyyl meh zem brichte, abr s isch scho guet jetz. Es isch e lessigi Fasnacht vo unde gsi, mr dangge allne wo drzue bydrait hänn.

 

Ci vediamo 2016!

 

 speziell dra isch ass alli fette Usdrügg Vorgaabe sinn: s Ergäbnis vom Sujet-Workshop 2015 und alli Hauptdailnähmr vom Special 2015 im Schööne Huus.

 

Fimf Joor Balaari – simmr no jung odr scho alt...

Mir fyhre UNS doch nit, hesch s gschnallt?

Mr jubilyere normal wie immr uff dr Brugg

und luege fiire, niemols zrugg.

 

Mr hänn en Uffdraag gfasst das Joor,

e Sujet uffdruggt, druurig abr wohr.

Dä Zeedel isch fir di vyllicht Nonsens,

abr Fördr-Club Zoggelifraggtion-Konsens.

 

Am Special hann s ys welle schelle,

und sinn e glatte Zeedel kho go bstelle.

Drnoo hann s gmaint, die schlaue,

mr miesse jedes fette Wort ybaue.

 

... und glacht, ass bekamte mr das nit zamme,

ab ins Schööne Huus zem eych go schämme!

Derte git s Bangg, Kategoryy „schuurig“,

antiquarysch uffbereitet, waisch wie druurig.

 

Dr Hansjörg findet s gar nit glatt,

was findet in sym Källr do au statt?

Wär kunnt im Sujet dasjoor draa?

Nai Sii, die Tschumpel wänn e Stange haa!

 

Bi eyrem Sujet goht dr Morää grad go pfuuse,

em Häbse jagt s d Protheese uuse,

maint troch: mir schlumpfe wyter,

(hett är letscht Joor scho gseit, s isch schytter.)

 

s Mimösli im Fall, jä das Mimösli ♬♩♫

s isch mol digg gsi, mr mainte fasch: famöösli.

Jetz wo si alti Rahmestiggli dien reziklyere

wurde si vo Männr-Poledancing richtig profityere.

 

Usländr, heersch, sinn allewyyl e Schand –

kai Shaqiri und nie meh -itsch fir unsr Land.

E Schwyzr Nati ohni Schwyzr, jä gopf,

ohni uns gwünnet ihr kai Bluemetopf!

 

Wie dr Shiva Mike dien mir wohrtsaagere:

Noch fette Joor kemme allewyyl die maagere.

Nit numme Suchtinfo.ch duet s vrschreye:

Hesch gsoilet – also Schluss mit Sauereie!

 

Gian und Giachen in Formation,

parat zer harmonischen Intrigation.

Drnoo gohsch in di und an Bach no aabe

liebr lengr baade als im Rhyy go graabe.

 

Mir fordere, und mache drzue e Wälle,

zämme mit de Buebe und au de Forälle,

zem die hoorigi Wohret grad betoone:

meh Mannr mien in Pol-Positioone!

 

......................................✄✄✄✄ ......................................

 

gege Abgoob vo däm Bon git s im Stammlokal

vom Fördr-Club Zoggelifraggtion

am Spaalebuggl gratis Grälleliwassr.

Glyych ob ab Stange odr nit - e scheeni Fasnacht!