2012: "Hilfe, rettet's schwache Gschlächt!"

E Fasnacht zem Yrahme, me muesch gar nit saage. Dr Petrus isch widr emol ain vo uns gsi, d’Stadt gstopft mit Passyve und seelige Aggtyve, e Speggtaggel wo alles zämme kho isch und abr au gar nyt glemmt hett (ussr s’Fasnachts-Comité, abr das isch allewyyl e laidigi Gschicht).

Mer luege nomol zrugg uff unsri perseenligi Fasnacht 2012:

 

... und föhn grad mit de Flops a:

 

- dr Sex Koffer zum Intrigiere zoobe hätt’s nit bruucht (mr hänn en juscht aimol usspaggt)...

- mr hänn am Mäntig zoobe e Blatte gfasst, will ys so-n-e hyperaggtive Vordräbler s’Bâlaarimobil ans Trottoir druggt hett (und dr Beni hett am Zyschtig brutaal rotiert zem dä widr repariere)... die Schärbe uff dr Gass sinn im Fall e Schand!;

- d’Idee, d’Brugg fir eych abzsperre hett nit so gfägt – amigs mien halt au mir mit em Stroom schwimme;

- die wo-n-ys azunde hänn, das syg jo kai Goschdym – und sälbr Waggis gsi sinn, wo – WAISCH WIE ORIGINELL – usgseh hänn wie alli andere (e Syydefragg, waisch wie glatt)...

- vrgässligi Bâlaari I; am Mittwuch hett dr Beni syni Zoggeli dehaim ligge loh und dr Däni fasch d’Laarve...

- vrgässligi Bâlaari II; wenn de d’Batteryy halt erch am Sunndig laadisch, no längt si nit bis zum Ändstraich...

 

 

... abr dr Räscht – 100% Seelefriide garanti:

 

- blondi Waggis, mit bruune Zoggeli und wysse Sogge, uffem Rugge e “2“, s’Wäägeli e Hommage an d’Anita Fetz, und als ultimayvi Ernidrigung dörfsch no dr Zimmrlinde ihri Unterhoose wäsche und uffhänge – do hämmer dr Duume am Puls vo dr Zyt kha und dr Vogel bi Goscht abgschosse. No sälte hämmer eso vyyl Komplimänt ibrkho;

- gueti Luune allewyyl, vom Drämmli am Mäntig an Cortège bis (fasch) zem Ändstraich;

- e Schwätzli mit em Almi, e Blausch mit em -minu und e härzligi Umarmig vom Karli „euri Syyte isch jon e Bombe“ Schwyzr (mer hänn no 143 Striggede Zyttige, im Fall);

- e Fondue uffem Märtblatz – Hand uffs Härz, wär hett das scho mol gmacht?;

- vyyli liebi neyi und alti Gsichtr bim Apéro uff dr Brugg (wo mer nägscht Johr garantiert nüm uff dr Brugg mache – abr es gitt en widr, kai Angscht);

- s’strahlende Gsicht vo dr Anja, 6 Johr alt, wo immr emol mit em Waggis het welle schwätze, und dr strahlendi Bärnhard Heusler – ändligg hett er’s gschafft und isch Bâlaari-Member - mer gratuliere, Digge!;

- e Untrhoose fir die die ryffi Daame, wo sich prestissimo zem aigentlige Superstar uffem Bâlaarimobil entwigglet hett und wo mer 20 mol hätte kenne vrkaufe;

- e Super Zyschtigoobe mit Intrigiere uffem Barfi, wo mer ... jäwärdeliwär? ... dr Räppli Remo zem erschte mol als Aggtyve droffe hänn. Au s’ „5“ uffem Rugge isch kai Schutz vorem Waggisvirus;

- d’Regula (Ruggbligg letschti Fasnacht!) daucht widr uff und isch immr no glyych glatt;

- die liebi Lisbeth us Zumikon ZH, wo em Däni (fir aimol sprochloos) 20 Stutz in d’Dööpe druggt; fir si simmer s’hegschte an dr Fasnacht und si wott ys ain spendiere bevoor se widr uff Ziiri in Nääbl muess (merci Lisbeth, mer inveschtiere’s in die nägschti Laarve und zaige se dr gärn nägscht Johr);

- dr Spruch „Männrherrschaft waisch wie glacht, was d’Zimmrlinde sait wird gmacht“ hängt jetz scho in dr Kuchi vo jedere Fraue-WG;

- mindischtns 248 seelige Fraue wo s’Wäägeli aluege und saage: „Stimmt!“

- e Kindrfasnacht mit em Laarve Kuttle und de Binggis (unbezahlbar!)

- d’Vrkaifere ussem Gundelidoor, wo dr Däni entsetzt agluegt hett: „He, was machsch du mit 10 Kilo Knoblauch?“ - und drnoo am Mäntig juscht widr 5kg zrugggholt hett…

- d’Anita Fetz, wo am Mittwuch schnäll uff e Apéro kunnt und anderthalb Stund blyybt, ys juscht alli Mimeesli mitnimmt und mer ersch nochhär mergge ass noch ihrem Bsuech dr Wyssi ussgschosse isch (jetz, liebi Anita, interessiert sich abr au dr Beni fir Bolitygg);

- und das wo am meischte Ydrugg gmacht hett: glar simmer stolz ass dr Bärnhard an Apéro kho isch (Galeryy aluege, e Bild fir d’Ewigkait) und die anderthalb Stund uffem Märtblatz mit dr Anita wärde mer au nie vrgässe – abr am ydriggligschte sinn all die Gspröch mit Laarve und ohni, die vyyle Passyve wo dr Blausch hänn am Intrigiere und extra zu uns kemme zem luege was dr Waggis sait. „Das Intrigieren ist ausgestorben“ hett me vor dr Fasnacht kenne lääse – khasch dängge, Nägeli, Doodgsaiti lääbe lengr!

 

Zem Schluss, wie sich’s gheert, e härzligg Danggerscheen an:

dr Babsi, fir ihri Hilf bym Wurfmateriaal;

em Gubi und em Team vom Lindebäärg 3, fir d'auberge alcoholique;

em Pascal Petitjean vo dr Firma IDs4u AG, für die wundrbaare Badge – die sinn aifach dr Hit gsi;

em Andy G., wo-n-ys e Kischte Wysse fir dr Apéro gspändet hett (wo-n-er doch nit emol an dr Fasnacht gsi isch (sy Frau hett in d’Ferie welle... Sujet 2012 halt :-) ));

all die wo Helge gschosse und ys die gschiggt hänn: dr David Frey, d’Janet Fatton, und nadyrligg dr Sascha Roser (wo im Fall extra vom Wettstaiblatz zrugg gloffe isch zem e Fötteli mache vo uns und usgriefe hett wil mer das ganze so gmietligg nämme – hejo, wemmer wänn stresse, no gehmer zu de Primidoofe);

und an all die wo immr widr d’Bâlaarisyyte bsueche und ys s’ganz Johr mit Interässe, Komplimänt, Areegige und Kritygg zeige ass dr Waggis aimoolig isch und d’Bâlaari nadyrligg au... ;

und z’letscht no unsre liebe Fraue, d’Tanja und d’Karrie, wo uns zwai Glämmerlisegg eso nämme wie mer sinn und amigs zwäggs Perseenligkaitsferderigg so dien ass wäre mir s’ stargge Gschlächt.

 

Item, scheen isch’s gsi, mer kemme widr. Aadie, machet’s guet und alla prossima,