2011: d'Insle vo de Gliggseelige...
Also zersch emol tschumpelhund wil mer fir aimol e glai gnoorzig mit der Wohrhet gsi sinn. Ass dr Beni drbyy isch hämmer ämmel scho am Bâlaa-B-Q 2010 abgmacht, und drnoo hämmer au, bees wiemer sinn, grad no e falsch Sujet agäh... mer hänn aifach alli duure Gaggo zooge; wenn das e Drooscht isch, es isch glatt gsi abr es sell nimmi vorkoh das Johr. Grosses Waggisehrwort!
Alles in allem isch es e fridligi, glungeni, gmietligi Fasnacht vo unde gsi, aini wo mit uns zwai Glämmerlisegg zämme aifach widr hett miesse fääge. Mer hänn vyyl erläbt, glatti Lyt droffe und vyyl intrigiert. Räppli hämmer weni bruucht (nit emol e ganze Sagg z’zwait!!!!!) und am Mittwuch hämmer glaub y d’Laarve ebbe e halb Stund akah; abr mer hänn no nie eso vyyl Komplimänt ibrkoh fir Goschdym und s’Wägeli. Am Mäntig isch es tropisch haiss gsi uff dr Wettstaibrugg (Hawai’i dängg) und am Mittwuch hämmer’s in zäh Stund juscht vo dr Schiffländi zem Märtplatz gschafft... aifach gmietlig. D’Highlights:
Do hätte mer emol d’Regula; si hett am Mäntig eso gärn mit ys intrigiert ass se am Mittwuch grad nomol koh isch und ys ihri halbi Läbensgschicht vrzellt hett (und ys 2012 ihri 11-jöhrigi Dochter als Assischtäntin wott avrdraue, no wurd si ebbis rächts mache)...
Dr Bertrand, dä soiglott patron vom Espresso in dr Staine – e rächte Waggis, immr e gueti Spruch, gueti Luune, aine wo Fraid hett an jedem Bhaltis und syni roote Ammedysli hit no drait...
D’Elsässere am Wurschststand uffem Minschterplatz wo-n-ys bim määrte eso richtig ibr e Tisch zooge hett; am Änd hett’s fir si 5 Ziibele, e Tschäpper, e Paar Badschlappe, 14 Dääfi, 2 Bier, 3 Shötli und 2 Orange gäh – und fir uns zwai miggrigi Glepfer...
Intrigiere uffem Seibi während em Guggekonzärt am Zischtig zoobe, wo mer aifach
lut in d’Mängi hänn miesse briele ob ys ibrhaupt no ebber vrstoht (Ditschland, Ditschland ibrall)...
Dr Olav vo Winterthur und dr naameloosi Ämmitauer, baidi zem erschte mol an dr Fasnacht mit ihre Haimwehbaslere (dr Ämmitauer hett eso schnäll gschwätzt y ha-n-en im Fall nit vrstande, und dr Olav hett dr Zeedel mit Guschto uff Winti-Baseldytsch vorglääse; dr Ämmitauer het 18 Ziibele haimegnoh (jetz muess är nim an Märit uff Bärn) und dr Olav e paar Schlappe; baidi kemme im Fall 2012 widr...
Die wundrbari, charmanti, gfitzti, bildhibschi und schlagfertigi Andrea Bürki vom Radio Basilisk, wo-n-e riise-Härz hett fir Waggis (hejo, si isch jo mit aim vrhyrooted), wo mit Luscht und Luune intrigiert hett und ys drnoo live am Radio interviewt hett (Mittwuch, 15.48h) – ok, dä Gingg ans Bai diemer jetz vrgässe...
Dr Apéro uff dr Brugg – aifach dr Hit mit ibr 40 Lyt...
Bröötle uffem Märtplatz - und dr Abwart wo kunnt go kontrolliere, är maint s'Rothuus wurdi brenne...
E ärnscht Schuggermysli vor em Kunstmuseum zem lache bringe, die hett sich im Fall gar nimmi kenne beruhige...
Dr Beni wo sich mit drey Fraue alegt will är partout sy antiggwierts Frauebild muess vrtaidige (Galeryy, Fasnacht 2011, letschts Bild)...
dr Lampe Hampe wo zäh Johr Ladäärne gmolt hett und noch em Bâlaari-Zeedel lääse gmaint är syg grammatikaalisch perfäggt abr am Värsmass miess y no schaffe (und mer grad zaigt hett wo - damminomol, är hett rächt, hai das kah mi im Fall näärve); immrhin hett är gmaint my Baseldytsch syg vyyl bessr wie dä „Glump“ vo dr Olympia odr dr Alte Richtig ... und dr Waggis sait: Salli zämme, wie lang machet ihr vo dr Alte Richtig aigentligg scho Fasnacht? Bruuchet er ächtsch Hilf nögscht Johr?
E Laadig Kiwi fir e ganzi Chaise – und Je nai Sii, au die kenne lache…
Und zem Schluss no dr tetowiert Intellegtuelli wo bim Intrigiere aifach numme no gsait hett: „Ihr sinn GEILI Sieche!“...
Wohr isch wohr, das lömmer so stoh – zämme hett’s gfägt und me gseht sich nögscht Johr. Odr blybt ebbe widr alles andersch und alles kunnt glych? Mol luege...
Es gitt e-n-Ort uff unsrer Wält,
umgäh vo Wasser, Stacheldroht und Stai,
wo Rächt no Rächt isch, Gäld no Gäld -
dert sinn Gliggseeligi dehai.
Me isch dängg zfriide, s’goht aim guet,
Me derf nit klaage, s’isch scho rächt.
D’Insle verloo brucht aifach Muet,
um ys umme stoht’s so schlächt.
Simmer wägg, fir Ferie-n-odr zem go poschte,
- odr dr Mischt entsoorge, säll muess syy –
herrscht Gfohr im Norde, Syde, Weschte und im Oschte
s’isch allewyyl scho sicherer am mym Rhyy.
Nit-Insulaaner huuse dert, waisch wie en masse,
Zigyyner, Tschingge, Waggis und vyyl meh.
Uff d’Finger luege mueschne, s’macht kai Spass,
vo dene kunnt e kain uff d’Insle, abr heh!
Unzivilisiert, barbarisch, ohni Stroom,
Zueständ wie im alte Room.
Die haize, du, s’isch im Fall wohr,
nit emol d’Feriewohnig s’ganze Johr.
Integriere duet sich säll Gsindl bi-n-ys nit,
unsri Traditioone sinn fir die kai Hit.
Do steehn mer myni Hoor grad z’Bärg,
kennsch ebbe du e Tirgg mit Gaartezwärg?
S’isch schampar schaad, me muess es saage,
mir mien das allewyyl beklaage.
Uff unsrer Wält wär’s scheen und nätt,
wenn’s numme kai Nit-Insulaaner hätt.
Katzefrässer, Raser, Sozialischte,
Kriminelli, Dreegeler, Feminischte,
säll Lumpepagg gheert no hit ussgschafft
(... usser me bruucht e billig Arbetskraft).
Fir uns sinn Traditioone scheen und guet,
fir uns gilt: „Haimet, Ehr und Heldebluet!“
Ibr alles wacht, mir sinn so frey,
die grossi Insle-Strand-Partey!
Die luegt ass alles blybt bim rächte,
ass sich nit alles wandle duet zem schlächte.
Und s’Motto isch, mer glaube-n-alli dra:
„Heil dir Helvetia, bist doch die Insel ja!“
Drum fraiet eych am Inselläbe solang’s goht,
vrdränget aifach was ys do no droht.
Wil sett dä Klimawandel wyrgligg koh,
duet z’allererscht … en Insle-n-untergoh.