2009 (no als Balggebieger): "Velggerwanderig fir ai Daag"
Velggerwandrige hett’s, so heert me, immer gää,
scho dr Neanderthaler haig sich’s nit lo nää.
Im Mensch schteggt sit em Pleischtozeen
halt allewyyl das Wandergeen.
Ob Dschungel, Steppe odr am mym Rhyy:
Worum ellai wenn’s zämme gooht?
Mit andere-n-isch dr Ainzelni drbyy
drmit är nit ‘tout seul’ do stooht.
Es isch kai Froog, mer sinn e Häärde,
em Alphadier laufsch gschyyder noo.
Ellai null Chance uff unsrer Äärde,
susch frisst dy’s Groggodyyl, hejoo!
Allbott heisst’s: ”Ziiri-Minu-EffCeeBee -
hesch d’Wääge-Syjet grad scho gseeh“.
Mir spiile Null-Nyyn ebbis wo de nit verpennsch:
vom Wander-Häärde-Dier mit Naame Mensch.
E Wälle do isch gsii letscht Joor, rächt kurios,
het gstoppt kai Zoll, kai Schmier, kai Haag,
isch koo ganz schnäll und weisch wie gross:
E Velggerwandrig nur fir ai Daag.
Hunne, Goote, Weschtgermaane
Frangge, Saggse und Wandaale
Uff s’scheen Basel kemme-n-all die aane
Nit koo sinn ainzig d’Kannibaale.
(Ains isch gschpässig, mer finde’s gweer,
wenn alli do sinn - worum isch ai Platz leer?
Hänn die vo Ängland ächtsch verpfuust
odr sinn si wiider emol ‚not amused’?)
Henu, drfyyr wott Holland sich am Rhyy go trolle.
Grad hundertduusig Auti iber d’Gränze wänn -
fasch wie dä Elsass-Express wo duet rolle
wemmer am Mäntig Sperrguetabfuehr hänn.
Was söll au das, frogt me-n-im Daaig disgreet
Was wänn die Boere jetz do aane?
He isch doch glar, sait’s Volgg gweerbeet,
Mir hänn dängg EURO, nundefaane!
In Schwärm, juscht wie Inseggde wo dien wandere,
fallt me-n-yy, in d’Dalbe, d’Breiti und an Rhyy.
Kai leer Bett vo Mumpf uff Kandere,
numme Schloofhuube sinn do nit drbyy.
S’Nomaadevolgg hett Zyyg mitgnoo,
Wohnwääge, Zälter, Faahne-n-und viel meeh.
Abr ains hänn si nit iberkoo,
E Detail: fir Holland-Russland e Billjee.
Die hänn d’Schponsoore miesse haa, s’isch glar,
VIP-Kaviar schmeggt wunderbar.
Cypli, Lachs fir unsri Promis; numme nit goutiere
Dien si d’Tschytteler wo, waisch wie!, irritiere!
Am kalte Byffet duet me sich verluschtiere
So schutte? Wääh!! Wär sött das interessiere?
In dr Skybox luegt me zwaai Bäll sich aa
- die im Keerbli vom Wernli Tamara!
Wägg mit em Volgg heisst’s, und mit de Fans grad au.
Zem Dyyfel wintscht me se, zer Sau.
Juscht hundert Euro hänn die zahlt, zem Gugger!
Fuessball isch hit nyt fir aarmi Schlugger.
Bim FCB gseehsch so ebbis nie, de glaubsch es nit
e Riisechance wo me-n-aimool nit vergitt!
Uff dr Autibaahn gläbt kaine-n-an der Plangge,
abgschosse vom Zanni syne wiite „Flangge“.
Me riibt sich d’Auge, ’s isch e Gschängg:
Kain uff em Raase ryymt uff -itsch
und s’ scheenschte-n-isch, du aahnsch es dängg:
es schwätzt e kaaine Ziiridytsch!
Die ganz Regio bäbt, s’isch ebbis los
Fir aainisch Wältstadt Basel juschtamänt!
Fasnacht im Summer, ’s isch famos
Basel Tourismus riibt sich d’Händ.
Ains het me vergässe: wo aane mit de Masse?
Die Hoorde mien jo pfuuse-n-irgendnaaime…
Mit hundertduusig Penner isch nit z’schpasse.
Dr Weisshaupt maint: „am Zwelfi schiggsch se haaime!“
Glar, ässe wänn die liebe Gescht jo au
und suffe - die sinn jo scho zem Zvieri blau!
Am Achti sinn d’Beizer ächt verdrosse -
Bim Määrtplatz isch dr Mägg ussgschosse.
Fuessball-Haupt-Stadt Basel, das isch s’grescht
Ganz Holland do fir’s Riisefescht!
Mer frooge gwundrig: isch ebber NIT mitkoo?
Hejoo, d’ Wiiber hänn si schlau dehaaime gloo.
Die ganz Stadt orange, weisch wie glatt.
Holländisch isch fir is Amtssprooch hit
Op Nederlands will schrijven ik het blad!
Kasch syy loo, Waggis: ’s Komité verstooht das nit.
Mit dene lömmir Schwiizer’s grache
Mer feschte, schunggle und sinn mit drbyy.
Uss is uuse gemmer, spasse, lache
Fiidlebyrger kenne morn mer wiider syy…
Abr lönn ich - Spass uff’s Velo - jetz no saage,
wenn ir d’Fasnacht im Summer dien beglaage,
machet’s wie d’Balggebieger noh und färn:
Singet’s Basler Lied mol ganz modärn:
z’Basel am mym Rhyy
Jo dert schutte sii
D’Holländer sinn taggtisch schlau
d’Russe kenne’s aber au
z’Basel, z’Basel, jo dert schutte sii!
D’FuessballVelggerWanderwelle, die macht Schpass,
wie d’ Schwiizer Nati … kumm lömmer das.
Holländisch isch kain vo dene go studiere,
drfyyr Tschämpien im Lëtzebuergsch parliere!
Dir gseehn: das Debaggel ligt ys uff em Maage,
drnoo saage mer jetz ohni Nyyd und ungeniert:
Holland gooht’s wie-n-ys immer au an Kraage -
aber die sinn z’mindesch e-le-gant laggiert!