Lötschetal (Wallis)
Es git im hinderschte Wallis kurligi Parallele zum Basler Fasnachts-Comité, zem Konfliggt Tradition vs. Modärne, lokal vs. international, wild und frey odr abasst telegen:
Im Lötschetaal heisse d Laarve „Tschäggattä“ (eventuell etymoloogisch vo Tschägga 'Flägge').
Syt Johrhunderte ziehn jungi Männnr zwüsche Mariä Lichtmess und Äschermittwuch duur d Dörfer, traditionell vrgleidet mit Geisse- und Schooffäll. Si draage handgschnitzti Masgge und lütte drzue mit Kueglogge. Friehnr hänn si (numme ledigi Männr, nota bene) als Kindr vrschreggt, Fraue gjagt und ihri Opfr mit Ruess und Bluet ygschmiert, hüt lauft das zivilisiertr ab. Es dörfe jetz au ghüroteni und Buebe mitmache (abr numme Männr) und die Tradition isch als wie meh zuenere Tourischtetradition worde (was vyyli Bsuchr us dr Üssrschwiz aloggt und s Erschynigsbild vo de Tschäggattä stargg vränderet hett).
Syt e baar Joor git s e grosse Wettbewärb wo sich die ainzelne Formatioone, letscht Joor öbbe 100, immene Umzug mit ihre Laarve presentiere. Jede dreit e Nummere und lauft e fixi Route duur s Dorf. Pryysrichtr notiere sich dr Gsamtydrugg, Schulterehöche und Grössi vom Fäll, etc. und prämiere am Schluss die beschte.
... abr es git allewyyl no die beese Tschäggättä, die wo dr Concours ablähne, wild umenandrziehn und alti Traditioone ohni Kommerz wänn lääbe. Es sinn nit vyyl wo das no mache abr anschyynend – mr hänn das nit genau könne eruiere – sinn dört au Fraue drbyy (was e absolute Tabubruch wär). Do wird no richtyg gitschäggud, gjagd und vrruesst, und das git Konfliggt mit dene wo das Bruchtum wänn kommerzialisiere. Me stell sich aifach emol vor, Zircher Tourischte wurde gjagt und mit Ruess ygriibe… (abr hmm, worum aigentlig nit?)
Z empfähle isch uff jeede Fall e Bsuech im Maskekällr vo dr Agnes und em Rieder Ärnscht z Wiler (im Lötschetaal), wo meh wie 400 Masgge usgstellt sinn und em Tschäggattä Bruuch ghuldigt wird.
Kurios: dä Källr isch die gröschti Privatsammlig vo Masgge z Europa.
(mr empfähle drzue e Bsuech im Jassmuseum z Kippel, wo em Lääbsnwärgg vom Laarve-Kuttle gwidmet isch (in unsere Kreise beschtns bekannt --> Jassturnier 2012!))
