Hand uffs Härz: Tamara Wernli

Was wär Basel ohni Tamara Wernli?

 

(Bitte 10 Sekunde nochedängge)

 

Also, mir vrsuche, das eso z’beantwoorte:

 

 

Die grossi wyti Wält isch jo nit eso dehei bi uns, dodrfir nämme mr ys vyyl z’wichtig am Rhyy (Basel isch jo die grossi wyti Wält, dängg!) mit unsrer „me hett nyt, me gitt nyt, me isch nyt und wemmer ebbis hänn (odr sinn) no saage mr’s nit“ Mentalitäät. Und eso duet Basel vor sich ahnedimple, abgschnitte vo dr grosse Wält, wo me toleriert wenn se do isch (an Grossalöss mit internationaalr Strahlkraft wie Basel World, Swiss Indoors, odr dr Bâlaari-B-Q). Und wäge däm – dr Ängländr wurd jetz saage „splendid isolation“ - hett unsr Dorf am Rhyy weder Glämmer no Sex Appeal (do hett au dr –minu in all dene Johr nüt dra könne ändere)…

 

 

… A B R:

 

 

… Gott sei Dangg gitt’s jo d’Tamara, d’Marilyn Monroe vom Dreyländregg! Zytloos attraggtyv, ewig jung und gwundrig mischt sy Basel uff und zeigt ys wie’s kennt syy wenn dr Rhyy z’Hollywood wär, dr Spaalebärg z’Manhattan odr dr Barfi vorem Zuggerhuet. Wär ebbis isch, dä findet Erwähnig in ihre Klatschkolumne in unser fabuleese Wältzytig vo Regionalformaat und ihri Bydrääg uff Tele Basel ersch ... ganz grosses Kino, abr hallo, gege Tamara uff Bsuech und Koche im Schloss isch e Oskarvrleihig wie-n-e GV vom Küngelzüchterverein Schwellheim – do merggt me, ass d’Tamara ihri Schauspiilusbildyg z’Los Angeles gmacht hett.

Mr erinnere-n-ys: dr Julio Hernan Rossi zeigt syni Untrhoose, dr –minu hett nie elegantr usgseh, dr Blaise Thorens sprudlet wie-n-e Wassrfall, d’Nubia strahlt (und strahlt und strahlt und strahlt – und seit emol e Wort), Almi+Salvi hänn nie besseri Pointe druff kha, sogar dr Gross Chrigel hett emol glächlet, dr Morin … (jo was hett dä jetz scho widr? Mr hänn’s scho widr vrgässe… ah jä, dä hett glaub fir Bioproduggt Wärbig gmacht). Also wär eso Sändige hett, dä isch im grosse Kino, z’Basel und au im gleine Räscht vo dr Wält.

Also, d’Antwoort: ohni Tamara wär Basel totally unsexy.

 

Und jetz wo mer das klärt hätte - do wäre ihry Antwoorte, beschte Dangg:

 

(M o m ä n t no schnäll, eins wänn jetz nadyrligg alli wisse: Sälbschtvrständligg hänn d’Bâlaari d’Afroog vo dr Tamara nit könne ablähne und wärde mit ihre zämme im Schloss intrigiere … Nääbe vyyl Gschnäädr ibr dr Waggis, s’Lääbe allgemein und dr Sex Appeal vo unsrer phenomenaale Stadt wärde mr au koche! Was? Ibrraschig… abr bio wird’s nit!).

 

 

1. Was isch dy ydriggligschti Fasnachtserinnerig?

Als kleins Meitli s’erschte Mol am Morgestraich.

2. Was ka dy an dr Fasnacht närve?

Fasnacht isch Fasnacht. Do närvt nüt, sunscht blibbsch besser dehei.

3. Welli drey Wörter falle dir zem Begriff Waggis? spontan ii?

Sehr frächi Schnuure.

4. Sell d’Waggis-Naaselengi vom Fasnachts-Comité reguliert wärde? (falls jo, uff wie lang maximal?)

Wieso immer alles reguliere? Mir reguliere scho gnueg.

5. Basel ohni Fasnacht isch wie ?

Mählsuppe mit Gable ässe.

6. Was bringt di so richtig uff d’Palme?

Wenn Lüt nit zu däm stönn, was si mache oder sage, und sich für dr  eige Vorteil völlig verbiege.

7. Und ibr was kasch dy eso richtig froie?

Guets ässe, freii Wuchenände mit dr Family und Sunneschien.

8. E liebs Familiemitgliid schänggt dir zem Geburtsdaag e FCZ-Saisonabo, was machsch?

Versteigere uff ebay.

9. Wenn Ziiri Downtown Switzerland isch, no isch Basel?

Dä Vergliich hinkt.

 

10. Was isch fir di dr scheenschti Ort z’Basel?

Mi Dehei.

11. Was wurdsch an Basel - odr an dr Schwiz - sofort ändere?

Wieso nit eifach mol gniesse statt immer was ändere…?

12. Mit wellem Mensch (ob lebändig odr nit) wottsch du gärn emol znacht ässe?

Mit em Verfasser vo däm Froogeboge.

13. ... und was wurdsch du die Person ganz sicher frooge?

..was är sich dodrbi eigentlig überleggt het?! ;-)

14. Was isch fir di dr Maximallohn wo-n-e Mensch pro Johr derft verdiene, egal wo und wievyyl är/sie schafft?

Lueg Froog 4.

15. Was nimmsch mit uff e-n-ainsami Insle?

Die Frog isch usglutscht.

16. Wär odr was bringt di sofort zem lache?

Mini eigene Witz ;-)

17. Letschti Froog, Hand uff’s Härz: wäm wurdsch du die Frooge am liebschte zem beantworte gäh?

Em Heiko Vogel. Fuessballtrainer.