Sascha Ebener

Mt Johrgang 2000 isch dr Sascha dr bis do aane jyngschti Dailnähmr bi Hand uff’s Härz. Drfir isch är aine wo-n-e ganz bsunderi Gschicht zem verzelle hett. 2011 hett är ämmel als Vorträblr bi dr Spaale Clique s’erscht mol aggtiv kenne Fasnacht mache. Syni erschte Ydrigg brichtet är do – und är beantwoortet au no e paar ganz allgemaini Frooge uss dr Perspeggtive vommene 10-jöhrige.

S’Fasnachtsgeen hett är nit grad mit dr Muettermilch uffgsooge (nai abr au, als ob das wurd go - das ka jetz abr wirgligg numme vommene bioloogisch unterbeliechtete Waggis koh...) will sy Mamme, susch ganz e flotti, suecht an de drey scheenschte Dääg allewyyl s’wyte und draumt am Brienzersee vo Strand und Wermi, nit vo Waggis und Reesli. Em Sascha sy Fasnachtsfieber kunnt ganz sichr vo dr Syyte vom Babbe, dasch dr legendäri Laarve-Kuttle (Fasnachtsruggbligg 2011), wo syt Johre mit Binggis in sym Atelier im Gellert Laarve baut und d'Begaischterig an die nögschti Generatioon duet witrgäh. So hett sichr au dr Sascha d’Fasnacht entdeggt und syni erschte Erfahrige gmacht .. und wo’s drnoo ändligg losgange isch hett är sich grad seiliwohl gfiehlt und sich presto wie-n-e grosse uffgfiehrt. Passivi und Aggtivi (unter anderem au dr Bâlaari, wo uffem Märtplatz bröötlet und syni miede Gnoche gstreggt hett) sinn mit emmene luute „He alte, wottsch au e Zeedel“ aghaue worde; är hett’s schampar guet gmacht und gnosse, wie me an syne Antwoorte gseht (wo-n-em dr Babbe e chli ghulfe hett).

Also, merci fir’s Mitmache, vrgiss nit ass es im Lääbe no zwai drey Sache meh gitt wie Fasnacht (wie zem Byspyyl … äh … äh) - und wär waiss, vyllicht wird jo ussem Sascha au emol e rächte Waggis.

 

 

1. Was isch dy ydriggligschti Fasnachtserinnerig?

Mit dr Clique go z’Nacht ässe. 

 

2. Was ka dy an dr Fasnacht närve?

Wenn i gschtopft wird

 

3. Welli drey Wörtr falle dir zem Begriff „Waggis“ spontan y?

Räppli, Dääfi, Waage

 

4. Sell d’Waggis-Naaselengi vom Fasnachts-Comité reguliert wärde? (falls jo, uff wie lang maximal?)

Nai.

 

5. Basel ohni Fasnacht isch wie …. ?

Wasser ohni Blööterli.

 

6. Was bringt di so richtig uff’d Palme?

Wenn dr Papi oder s’Mami mit mir schimpfe

 

7. … und ibr was kasch dy eso richtig froie?

Ibr d’Kaugummi vom Waggis.

 

8. E liebs Familiemitgliid schänggt dir zem Geburtsdaag e FCZ-Saisonabo – was machsch?

Furt schmeisse

 

9. Wenn Ziiri ‚Downtown Switzerland’ isch, denn isch Basel… ?

an zweiter Stell.

 

10. Was isch fir di dr scheenschti Ort z’Basel?

S’FCB-Stadion.

 

11. Was wurdsch an Basel - odr an dr Schwiz - sofort ändere?

Dr Strytt.

 

12. Mit wellem Mensch (ob lebändig odr nit) wottsch du gärn emol znacht ässe?

Mit em Markus Steinhöfer

 

13. … und was wurdsch du die Person ganz sicher frooge?

Wie goht’s dr eso bim FCB?

 

14. Was isch fir di dr Maximallohn wo-n-e Mensch pro Johr derft verdiene, egal wo und wievyyl är/sie schafft?

101'000 Fr.

 

15. Was nimmsch mit uff e-n-ainsami Insle?

Dr Gameboy (mit em Pokemon-Spiel)

 

16. Wär odr was bringt di sofort zem lache?

Öbbis Luschtigs

 

17. Letschti Froog, Hand uff’s Härz: wäm wurdsch du die Frooge am liebschte zem beantworte gäh?

Em Steini