s'spitzig Ryssbley

 

  - bi Schnitzelbängg gitt's in dr Regl e kai Rahmeteggschtli -

 

Grund: mir hänn d'Erfaahrig gmacht ass Schnitzelbängglr, mit ganz weni Usnahme (siehe Staffle 2), ihri Privaatsphääre wänn bewahre (si sinn au e rächti Herusforderig zem ussfindig mache und kontaggtiere).

Mir reschpeggtiere das, Ehresach, und saage eifach eso Danggerscheen!

 

 

1. Was isch dy ydriggligschti Fasnachtserinnerig?

Won ych vor e baar Jeerli am Samschdig vor em Morgestraich ha welle 's Goschdyym uss em Eschtrig hoole, denn d' Stääge aabe gfalle bi und dr' Scheiche broche ha. Das isch denn au syt gfyylte 100 Joor die erschti Fasnacht gsi won ych nur in dr' Flimmerkischte ha derfe luege.

2. Was ka dy an dr Fasnacht närve?

Wenn aine noch em e Värs vor mir afoot "und yyne stäche......" singe.

3. Welli drey Wörtr falle dir zem Begriff „Waggis“ spontan y?

Leider nimm intrigiere.

 

4. Sell d’Waggis-Naaselengi vom Fasnachts-Comité reguliert wärde? (falls jo, uff wie lang maximal?)

Joo natyrlig und au d' Lutschdeergi vo de Drummle, dr' hegschti Doon vom ene Piccolo, d' Tattoogreesi uff em arm vom ene Pauggeschbiilende Guggemuusiger, d' Aazaal Rossbelle pro 100 Meter hinter ere Schääse und natyrlig dr' Lachfaggdoor bim e Schnitzelbanggvärs.  

 

5. Basel ohni Fasnacht isch wie …. ?

Wie Basel ooni Fasnacht, nur schlimmer...

6. Was bringt di so richtig uff’d Palme?

Ween mee miinj Antwoorte lyyst und deen recklammiiert, dass es Schribfääller hedt.

 

7. … und ibr was kasch dy eso richtig froie?

Wenn dr' Zug vo Zyri uff Basel am Fasnachtsmändig de Morge 3 Dääg verschbeetig hett.

 

8. Beschryyb ys bitte emol d’Fasnacht in dyne schlimmschte Alpträum.

Ych schdand in ere Beiz uff dr' Byyni und mergg pletzlig, ass ych gar keini Värs gschriibe haa (Dä Draum han ych ibrigens wirgglig jeedes Joor eimool vor dr' Fasnacht).

9. Was wär dr Menschheit vrloore gange wenn’s di nit gäbti?

Was dr' Mentschheit verloore gange wär weiss ych nit, aber Ir hättet die Antworte vo mir nit bikoo.

 

10. … und was bitte wär dr Menschheit erspaart woorde wenn’s di nit gäbti?

Me miesst myyni Antworte nit lääse.

11. Was wurdsch an Basel - odr an dr Schwyz - sofort ändere?

Ych wurd dr' Flusslauf vom Rhy keere, denn wär's Zruggschwimme nimm son e Grampf.

 

12. Mit wellem Mensch (ob lebändig odr nit) wottsch du gärn emol znacht ässe?

Mit em Blocher, wenn är zaalt.

 

13. … und was wurdsch du die Person ganz sicher frooge?

hän si scho zaalt?

 

14. Was isch fir di dr Maximallohn wo-n-e Mensch pro Johr derft verdiene, egal wo und wievyyl är/sie schafft?

Fir jeede Familievadder iber 50 won är yyschdellt e Dausgerneetli, das heisst dr' Grübel hätt miesse ebbe 280'000 Familievädder yyschdeelle.

 

15. Worum sött e Waggis Stadtpresidänt wäärde?

Well är im Morin vermuetlig e Naaselengi voruss isch.

 

16. Wär odr was bringt di sofort zem lache?

 E glungeni Pointe vom ene guete Bangg.

 

17. Letschti Froog, Hand uff’s Härz: wäm wurdsch du die Frooge am liebschte zem beantworte gäh?

mym Primmelilehrer, (däm han ych au allewyyl falschi Atworte gää). Aber well dää nim lääbe duet halt im Viktor Giacobbi.