Rémy, Ueli-Fährimaa

Uff dr alternatyve „Visit Basel“ Tour vo de Bâlaari hett die unterschti Rhyyfähri e Platz garantiert. E Schönheit isch d’Umgäbig jo nit wirgligg; es hett kei Dalbe, kei Papyyrmuseum, kai Minschtr und au kai Kasärne... drfür e kalti Betonbrugg, e Rhyypark und die neo-kapitalistischi Novartis-Skyline. Abr scho ellai d’Gschicht! Als alti Schlachthof-Fähri hett si vor em zweite Wältkrieg d’Biezer ussem Klybegg und Glaihünige ins Grossbasel brocht und drnoo widr zrugg. Mit em Untrgang vo dr Induschtryy und em Bau vo dr Brugg (‚was das widr koschtet’ isch halt dief vrankeret in dr Basler DNA) isch d’Fähri ygstellt und ersch anno 1989 dangg em Albi Frey (leidr seelig) widr ins Lääbe gruefe woorde (e grosse Mäzen und Fan vo dr Ueli-Fähri isch im Fall dr Dängeli gsi).

Und no hütte pändlet dä Schlappe hi und här zwüsche zwei Kontinänt mit Namme Gross- und Glaibasel, und SI LÄBT trotz strytsüchtige Awohner (Stichwort Buvette), Standortnochteil (scho mol Turischte am Bläsiring gseh?) und immr widrkehrende Diskussioone übr Sichrheit und so... und gstyyhrt wird se vom unerschroggene Rémy, vulgo Remigius Rex Rhenanii, wo sy Schiffli stolz und allewyyl gattig fiehrt und au noch all dene Joore dr einzig Basler Fährimaa isch wo no nie ein uff d’Tööpe bekho hett vom Rhyyknächt.

Und dr Rémy isch e Fährimaa wie-n-er im Buech stoht; du khasch em vrzelle was de wottsch (au wenn är, mr mien’s leidr saage, de Bâlaari fasch gar nüt wott glaube) und är sälbr vrzellt Gschichte us sym bewegte Lääbe und all dene Gstalte uff synere Fähri. Will eins isch sichr: d’Minschtrfähri könneter vrgässe, die spannendschte Lüt uff dr Fähri hett’s bim Ueli – egal ob Alternatyvi us dr Villa Rosenau odr Noodlestreife–CEOs us dr Novartis-Chefetage, jede hett e Gschicht zem vrzelle und dr Rémy isch die erschti Alaufstatioon. Uff andere Fährene hoggsch noni emol rächt und muesch scho bläche, mit em Rémy schwätzisch no 10 Minute übr Gott und d’Wält.

D’Uelifähri isch e Panoptikum vo unsrer Stadt, en Ort wo d’Zyt als fasch ruggwärts lauft (juscht wemme mit em Rémy abgmacht hett und uff en wartet – „y kumm am 5i, odr saage mr halbr 6i nei mache mr doch grad 7i – also OK, am 8i bin y sichr do!“). En Ort zem troime, schnäädere, in sich go und us dr Hut fahre, läschtere, es sich guet go loh und philosophiere ... drzue hett dr Rémy e permanänti Usstellig übr sy Fähri, e dadaistisch-aghuuchts Art déco und är zeigt de Bsuechr gärn sy ganze Sammlstolz, en Originaal-Bâlaari Glääbr und e für ihn signierti Autogrammkarte vo lokaale Humorischte-Grösse. D’Ueli-Fähri isch e surreale Ort wo me sich als muess pfätze und frooge, ‚ha-n-y das alles erläbt’, ‚sinn die ganze Gschichte woor odr us 1001 Fährinächt’ – ‚odr ha-n-y das ganze numme droimt?’

Item: wette ass es dört emol e Bâlaari-Speciâl gitt?

(D’Antwoorte vom Rémy drugge mr eso ab wie mr se ibrkho hänn, au wenn er e chli mien Zyt näh, dängge und sueche. Uff dr Uelifähri tiggt Basel halt wirgligg anders.)

4. Jo, nit länger als 3x d Penislängi vom Oobmaa.

8. Y gib’s em Lips.

9. .., denn isch Basel immer no Basel

14.   365‘000.- CHF

10. jä woo ächtsch?-))

3. Fasnacht, d Kuchi vo de Eltere, Gwirztramyner

16. Ych, wenn y my wider e Mol z ärnscht und z wichdig gno ha

2. my Ego, und das vo andere yygebildete Superkarnevalischte

5. isch nit!!

6. religiös-politische Fanatismus und Intoleranz und Grausamkait im Name vo Gott

11. Us dr Schwyz e Diggdatuur mache … so bruucht sich dr Blocher nymi z vrschtelle

12. mit ere Frau wo tragisch um s Läbe ko isch

13. was us uns worde wär

15. Muusigg zem Danze

1. ….. pschhhhhd!....

15. mym allerlyebschte Friind Flurin Hungerbühler, Basler Tambuurmayor, Grenzacherstr.89

7. und freue kann y mi aifach so, ab em Läbe, ab dr Lyebi, ab Allem!-)