"Räppli-Remo" Furrer

 

Dr Remo (vulgo Räppli Remo) isch jo aigentligg dief im Häärze Waggis, abr naimeduure hett är das nie eso kenne uslääbe. Juscht aimol in sym Lääbe hett är s’Härz in d’Hand gno, isch ins Goschdym gschtiige, dasch mol e Gschicht, und wisset er wodeliwo und was drnoo bassiert isch? Abr alles vo afang a….

Dr Räppli Remo hett mänggs z’biete. E Urbasler, begaischterete Hobbyfuessballer (Höhepunggt vo dr Karriere: e Hächtkepfler bi de TSV Eisenbahner Veteraane anno 1983), abr au e gfitzte Organisatoor vo Usfliig fir die presto alterndi Gaarde vo dr Jungwacht St Marie (und aine wo sich nie loht lo abschregge ab all dene Usreede, Benissimio luege, Blueme giesse, dr Rugge, etc.). Zem andere isch är e grosse Yyshockeyfan, wo mit sym alter ego, em Stephan (vulgo Pöschtlr), die ganzi Schwyz beraist uff dr eewige Suechi noch intensive Männr-Fondueerläbnis. Zu gueter letscht khasch en fasch nim stoppe wenner emol philosoophisch loslegt, är hett zue allem e Theoryy, vo Feschtblatte in Kindrhirni bis zu untrdruggte Emotioone vo Hündelimänner. Bsunders glatt isch es wenn er sym grosse Hobby nochegoht, em Jasse, und dert mit em Laarve Kuttle referiert (em Laarve Kuttle wärde mr do au no begägne, grosses Waggisehrewort). Und derte erglärt dr Remo (Spitznaame ’Göpf Egg vo de Sunntigsjassr’) em Kuttle, wo jo sälbr aine isch wo allne gärn alles erglärt, worum är jetz mit Daame z’dritt hett miesse Vorhand mache und die 33 Pinggt nit gno hett, drfir dr letscht Stich mit 5 ... Und eso richtig lauft’s wenn dr Räppli Remo uff sy ganz grossi Lyydeschaft kunnt: dr rooti Rääbesaft. Drnoo luegt är sich s’Glas a wie-n-e Halbverdurschtete in dr Sahara, schmatzt wie-n-e Nilpfärd in dr Brunschtzyt, rollt e baar mol mit de d’Auge und sait: “Ah jä, Südhang – abr är hett Zapfe und dä kunnt vo Korkeiche us dr Algarve!”

Und jetz schulde mer eych no die Gschicht wie dr Räppli-Remo ain uff Waggis gmacht hett. Also Muet hett er; als Waggis hett är sich nit z’Basel vrsuecht, abr z’Ziiri Oerlikoon (dert pigglet är inere groosse Zementfirma). Und kaine waiss worum är das z’Ziiri hett welle, mänggi maine är draui sich nit an dr Basler Fasnacht - do hett’s jo eso vyyl richtigi beesi Waggis und s’finschtere Fasnachts-Comité und was isch wenn en aine gseht vo dr Arbet? – abr aimol hett är sich e Goschdym mit Laarve gschnabbt und isch uf lyslige Sohle mit em 4.40h Zug uff Ziiri pilgeret. Dert hett är sich im Waarelift umzooge (Goschdym blauwyss) und isch mit emmene lute “He ihr Schnitte, hänner Angscht vorem Waggis, hösch?” ins Grossruumbyro – d’Sekretäärinne hänn numme uffgluegt und gsait “Grüezi Herr Furrer, händ si nöd guet pfust, so verrumpflet wie si widr usgsähnd?”, syni männlige Kolleege hänn em zer Stroof dr FCB Wimpel gfulze und em Chef in Porsche Cayenne ghängt, und dr Chef hett en drzue vrdonneret, die Räppli-Sauerey mit sym FCB Wimpel z’butze (und alles numme will dr Räppli-Remo dr Chef gfrogt ob är im Tömblr ibrnachtet hett... är hett dängt är syg inkognito, abr z’Oerlikoon gitt’s halt numme ai Waggis, dumm gloffe). Und das wär’s s’Änd vom Räppli-Remo synere Waggiskarriere gsi.

Abr zem Gligg gitt’s jo no Hand uffs Härz – und mer gsehn dr Räppli Remo ganz sichr widr als Passive an de nögschte drey Dääg. Frooget en aifach alli noch dere Gschicht vom Waggis z’Oerlikoon, är vrzellt se gärn.

 

 

1. Was isch dy ydriggligschti Fasnachtserinnerig?

„D’Eebe vom Schalanderli“

 

2. Was ka dy an dr Fasnacht närve?

„Blaggedeverkeufer! (vorallem die am Bahnhof)“

 

3.  Welli drey Wörtr falle dir zem Begriff „Waggis“ spontan y?

„Why, Mittleri Brugg und Schnitzelbängg.“

 

4. Sell d’Waggis-Naaselengi vom Fasnachts-Comité reguliert wärde? (falls jo, uff wie lang maximal?)

„Jä definitiv! 3,333333 cm“

 

5. Basel ohni Fasnacht isch wie …. ?

„http://malefyz-balaari.jimdo.com/härzligg-willkomme/ ohni Gäschtebuech“

 

6. Was bringt di so richtig uff’d Palme?

„E Gorilla oder villicht diens au gueti Stiigyse.“

 

7. … und ibr was kasch dy eso richtig froie?

„Iber gaaanz e huffe sache zem Gligg.“

 

8. E liebs Familiemitgliid schänggt dir zem Geburtsdaag e FCZ-Saisonabo – was machsch?

„Go ge luege isch doch loogisch.“

 

9. Wenn Ziiri ‚Downtown Switzerland’ isch, no isch Basel… ?

„Downtown Eichestroos“

 

10. Was isch fir di dr scheenschti Ort z’Basel?

„Iberal dert wo ych my wohlfiil!“

 

11. Was wurdsch an Basel - odr an dr Schwiz - sofort ändere?

„Du waisch doch: Ändere kha me nur an sich sälber!“

 

12. Mit wellem Mensch (ob lebändig odr nit) wottsch du gärn emol znachtässe?

„Ouuu, do gäbs e gaanze Huffe!!!!“

 

13. ... und was wurdsch du die Person ganz sicher frooge?

„Was sie im Schloffzimmer alles so macht.“

 

14. Was isch fir di dr Maximallohn wo-n-e Mensch pro Johr derft verdiene, egal wo und wievyyl är/sie schafft?

„E Kupfekessel voll Sesterze (oder Zwibbelesuppe)?“

 

15. Was nimmsch mit uff e-n-ainsami Insle?

„Nit, sunscht wärs jo nimm ainsam!!“

 

16. Wär odr was bringt di sofort zem lache?

„Ych mi sälber oder e Spiegel.“

 

17. Letschti Froog, Hand uff’s Härz: wäm wurdsch du die Frooge am liebschte zem beantworte gäh?
„Dinere Alte ;-)“