Peter Malama (1960-2012)

Es gitt jo scho schampaar vyyli umtriibigi Gstalte in dr Basler Bolytigg, abr mer dien jetz garantiert e kaine vrergere wemmer saage: dr aggtiivschti vo allne isch dr Peter Malama. Es gitt Basler wo ibrzigt sinn es gäbti nit ai Peter Malama, „Nai Sii, dä muess es mindischtns fimfmol gäh, är isch iberall!“ Normaali Birgr wie du und ych schweere (niechtern!) dr Peter syg glychzytig an drey Ertr vo unsrer gliebte Stadt gseh woorde – aimol innere Sitzig in dr Handelskammere, zem zwaiti am KV-Zygnis vrdaile im Volggshuus und drnoo glychzytig am Stadtlauf. Anderi ryybe sich d’Auge wenn si das dien vrnäh will si wisse ass dr Peter juscht in däm Momänt doch z’Bärn im Nationaalroot bolytisiert. Es kunnt aim d’Gschicht vom Haas und dr Schildgrott in Sinn: wo dr Normalstärbliggi, also dr normaal Birgr, ahnekunnt, isch d’Schildgrott alias Peter Malama scho do! Das ganze dunggt aim fasch scho ibrsinnligg; mer wurde jo gärn das Ghaimnis lifte wie das meeglig isch, abr he, mer sinn aifach numme Waggis, au mir kenne nit alles wisse.

Was amtligg vrbrieft isch ass dr Peter 1960 uff d’Wält kho isch immene glaine Schwizer Kaff, soziodemograaphisch und bolytisch irrelevant und so spannend wie-n-e Rumbatanz mit dr Angela Merkel, irgendnaime kurz vorem Alpstai (foht mit Z a .... wie haisst se jetz scho widr?). Will dr Peter abr grosses im Sinn kha hett und e gwisses Faible hett fir savoir-vivre, isch är relativ schnäll ab in e wichtigi Schwizr Stadt. Do hett är studiert (bolytischi Ekonomyy und BWL) und drnoo abr waisch wie Karriere gmacht: kaufmännische Laitr vo dr Hanro AG Liestal und Diräggtr Finanze und Dienscht bi dr SPENGLER AG, und syt 2001 Diräggter vom Gwärbvrband Basel-Stadt. Syt 2007 isch är Nationaalroot (fir d’FDP) und es laufe Wette är wär bald au no FCB-Presidänt, Novartis-CEO und Vorsitzende vom Fasnachts-Comité.

Ibrrasche wurd’s ys nit – und mer sinn agnähm ibrrascht ass es in synere Agända au no Blatz fir uns hett.

 

 

1. Was isch dy ydriggligschti Fasnachtserinnerig?

„E halbe Meter Schnee am Ladärnesunntig.“

 

2. Was ka dy an dr Fasnacht närve?

„E Guggemuusig, wo in dr platschvoll-änge Beiz zum vierte siibeminüütigi Schtugg aasetzt.“ 

 

3. Welli drey Wörtr falle dir zem Begriff „Waggis“ spontan y?

“Uu-uh! Uh-uh-uuh-huuu-hu?!! Uhuu-huhu-huu!!”

 

4. Sell d’Waggis-Naaselengi vom Fasnachts-Comité reguliert wärde? (falls jo, uff wie lang maximal?)

„Jo. Maximal bis Fahrleitig Drämmli.“

 

5. Basel ohni Fasnacht isch wie …. ?

„...Tattoo ohni Dudelsegg.“

 

6. Was bringt di so richtig uff’d Palme?

„Schlächte Wyy.“

 

7. … und ibr was kasch dy eso richtig froie?

„Guete Kääs.“

 

8. E liebs Familiemitgliid schänggt dir zem Geburtsdaag e FCZ-Saisonabo – was machsch?

„Y bring's dr Aktion "2 x Weihnachten" in d'Elsbethekirche übere.“

 

9. Wenn Ziiri "Downtown Switzerland" isch, no isch Basel… ?

„... "Top of Baselbiet".“

 

10. Was isch fir di dr scheenschti Ort z’Basel?

„'s Rhybord vis-à-vis vom Münschter.“

 

11. Was wurdsch an Basel - odr an dr Schwiz - sofort ändere?

„Weniger AKW, mehr Solarzälle.“

 

12. Mit wellem Mensch (ob lebändig odr nit) wottsch du gärn emol znacht ässe?

„Mit myner Frau.“

 

13. ... und was wurdsch du die Person ganz sicher frooge?

„Was mache d'Kids?“

 

14. Was isch fir di dr Maximallohn wo-n-e Mensch pro Johr derft verdiene, egal wo und wievyyl är/sie schafft?

„Wenn är's verdient, isch mr glych wie vyl.“

 

15. Was nimmsch mit uff e-n-einsami Insle?

„Hett sy WLAN?“

 

16. Wär odr was bringt di sofort zem lache?

„Bâlaari-Froogebööge.“

 

17. Letschti Froog, Hand uff’s Härz: wäm wurdsch du die Frooge am liebschte zem beantworte gäh?

„Em Peter Wyss, ex-Beizer vo der Kunschthalle.“