Peach Weber
Waggis, Peach Weber und Fasnacht – wie bittescheen basst das zämme? S’Lääbe isch en Entdeggigsraisli und amigs erschliesse sich aim die groosse Zämmehäng erscht nodisno. Dr rooti Faade do heisst: Hawaiihemmli. Abr vo afang a…
Lueget eych bitte das a, Fasnächtler und Basler uffbasse, noch 49 Sekunde wird’s interessant:
ah jä…
... mir hänn jo scho immr welle wisse fir was die Laarve do sinn ...
Womit mer also scho bewiise hätte ass es e Zämmehang gitt zwüsche-n-em groosse Baard ussem Aargau und dr Basler Fasnacht (es gitt no e zwaite, abr säll lömmer dr Peach sälbr brichte, Froog 1). Jetz kha me nadyrligg saage, jä mien denn alli e Laarve draage zem dr Rumpfhuffe vrstegge, odr das ganze umkehre und frooge jä sinn si am Nidrrhyy eso vyyl attragtivr will si kaini Laarve mien aha (odr s’ganz Johr aini ahänn, wie me’s gseht). Wär sich aimol “Mainz wie es singt und lacht” ohni Panadol odr Whisky adoh hett, waiss ass es kai Zämmehang gitt zwische Gsicht und Laarve. Also gitt’s au kai Zämmehang do.
Womer jetz definitiv bi de Hawaiihemmli wääre. Dr Peach begliggt die ganzi Schwiiz mit syne Uffdritt und sym ainzigartige Klaidrgschmagg (inspiriert vo “Sun, Fun and nothing do!”). Jetz sinn ihr alli an dr Fasnacht gsi und hänn d’Bâlaari uff dr Gass gseh, und was hänn si 2011 akha als Goschdym fir’s Sujet “Uff dr Insle vo de Gliggseelige”? Richtig, e Hawaiihemmli. Und wo dr Peach im Novämbr 2011 e Gaschtspiil im Fauteuil gäh hett, isch dr Beni (ain vo de allergreeschte Fans vom Peach im Fall) mit lychtende Auge in dr erschte Reihe gsässe und hett alles ygsooge wie-n-e Schwumm in dr Badwanne – und uff aimol gmerggt ass dr Peach fasch genau s’glyche Hawaiihemmli akha hett wie mir an dr Fasnacht. Säll kha kai Zuefall syy, es hett en scho fasch e chli metaphysisch dunggt, mit aim glaine Untrschiid: dr Peach isch gnuffligr als unsri Laarve, säll isch wohr, abr mir gsehn allewyyl bessr us wie-n-är. Do hätte mer also grad nomol e Zämmehang, und so schliesst sich dr Grais zwische Waggis, Weber und Fasnacht.
Ebbis perseenligs; dr Peach isch syt vyylne Johr untrwägs als Komikr und Ellaiuntrhaltr und aine vo de erfolgrychschte drzue in unsrem Land. Geboore 1952 z’Wohle isch är e Zytli Primaarlehrer gsi (!), abr Hits wie „Sun, fun and nothing to do“ (als Juanito Pepito und em legendääre “Schatz and se Luftmatratz” – I am flipping out!) odr „Überall het’s Pilzli draa“ und dr Prix Bernhard 1987 hänn en drzue bewooge, d’Schuel z’vrloo. 10 vo syne Albe sinn in d’Schwizer Charts kho, No Broblem 1999 20 Wuche bis uff Blatz 2. Au no wissenswärt: fir dr 15. Oktober 2027, ai Daag noch sym 75. Burzeldaag, gitt dr Peach e Konzärt im Hallestadioon (Billets bezieht me bi ihm diräggt – es gitt e Wältrekoord im Billetvorvrkauf) und im Novämbr 2010 hett är zem zwaite mol kandidiert fir dr Eurovision Song Contest (in dr Hoffnig, är blyybi anonym, als PeaCheese); „I will win“ hett’s us unerfindlige Grind nit gschafft.
Also danggerscheen fir dy Hand uffs Härz, Peach, mer kenne numme no saage “Come on baby, we love you!”, "We are flipping out" und e Aloha fir d’Ewigkait!
1. Was isch dy ydriggligschti Fasnachtserinnerig?
“I be früehner met es paar Kollege goge Schnitzelbänk singe, dasch emmer luschtig gsii. Soscht beni ned e sone Fasnächtler.”
2. Was ka dy an dr Fasnacht närve?
“Wenn d'Lüüt so bsoffe send, dass nome no tomm schnorid ond aggressiv werdid. Di meischte schnorid jo s'ganz Johr scho tomm gnue!”
3. Welli drey Wörtr falle dir zem Begriff „Waggis“ spontan ii?
“Weggis, Weggli, Gwaggli.”
4. Sell d’Waggis-Naaselengi vom Fasnachts-Comité reguliert wärde? (falls jo, uff wie lang maximal?)
“Ombedingt, ond zwar of 12 Meter, de werd der Umzug au echli länger!”
5. Basel ohni Fasnacht isch wie …. ?
“der FCB ohni Oehrli.”
6. Was bringt di so richtig uff’d Palme?
“E Leitere.”
7. … und ibr was kasch dy eso richtig froie?
“Wenn mer es alts Fraueli of de Schtrooss seid, dass ehre im Spital mini CD echli Freud proocht hed.”
8. E liebs Familiemitgliid schänggt dir zem Geburtsdaag e FCZ-Saisonabo – was machsch?
“Mee freue, i bene grosse Iishockey-Fän.”
9. Wenn Ziiri ‚Downtown Switzerland’ isch, denn isch Basel… ?
“Capitol of the Taigg-Genossenschaft”
10. Was isch fir di dr scheenschti Ort z’Basel?
“S' Fauteuil-Theater”
11. Was wurdsch an Basel - odr an dr Schwiz - sofort ändere?
“Nüüd, meer gfallt's i de Schwiiz, i bene Patriot, aber ned e Patridiot.”
12. Mit wellem Mensch (ob lebändig odr nit) wottsch du gärn emol znacht ässe?
“Met jedem, wo nochhäär zahlt.”
13. … und was wurdsch du die Person ganz sicher frooge?
“Tarf i no es Dessert haa?”
14. Was isch fir di dr Maximallohn wo-n-e Mensch pro Johr derft verdiene, egal wo und wievyyl är/sie schafft?
“En Zähntel Vasella.”
15. Was nimmsch mit uff e-n-ainsami Insle?
“E mittelgrossi Chlii-Stadt.”
16. Wär odr was bringt di sofort zem lache?
“Jede hundertschti Witz, woni lise.”
17. Letschti Froog, Hand uff’s Härz: wäm wurdsch du die Frooge am liebschte zem beantworte gäh?
“Am Lothar Matthäus - ond dää müesstis de of Änglisch beantworte!”