Michi Lüssi

... jetz wird’s Zyt fir e Bâlaari-Special: BASEL vs. ZIIRI. Dr Kampf um dr gross Sports-Fun-Day-Friends-Golf-Cup (fir alli aifache Zytgnosse ‚dr Waggis-Kiibl’) im Elsass stoht vor dr Diire. Und zmits dinn sinn – nai, fir aimol kaini Waggis – abr drfir zwai alti Rivaale wo sich nüt schängge, mit allne Wässerli gwäsche sinn, zwai wo sich naimeduure sehr dien ähnle, das abr nie im Lääbe wurde zuegäh: dr Fidi Birrer, e wöschächte Basler, und dä Michi Lüssi, en wöschächte Zürcher. Und baidi leege do hit als Vorberaitig fir dr Waggis-Kiibl d’Hand uffs Härz (und au zum dr Maischterschaftsändspurt im Fuessball no e chli a z’haize...).

Si hänn ainiges gemainsam: zem Byspyyl nämme si e kai Blatt vor’s Muul, si sinn nit grad als lyysligi Zytgnosse bikannt, Beschaidehait und Demuet sinn fir baidi Fremdweertr und si draage-n-ihr Härz immr und waisch wie uff dr Zunge. Baidi sinn Sport-Fans, gönn gärn in Ussgang und luege gärn e chli ins Glas. Baidi sinn emol topseriöösi Sportler und Modällathleete gsi. Baidi hänn e sehr ussprägti Mimik und komischs Talänt zem abwingge. Abr e paar glaini Untrschiid gitt’s au: dr Fidi isch FCB Fan, em Michi sy Härz schloht fir GC; dr Michi macht Curling und isch Fuessball-Schiri, dr Fidi vrjagt elteri Daame mit zyylte Crawling-Schleeg ussem Schwümmbeggi und goht mit andere Schwizer Friehpensionäär z’Thailand go golfe; und s’wichtigschte: dr Fidi hett dr Kiibl scho sit anno Tubagg nümmi gwunne, dr Michi erscht grad 2008 (obwohl, pikannts Detail, är numme zwaimol pro Johr duet golfe...). 

Ihri Rivalitäät isch gränzeloos; si zünde sich a wenn’s goht (jedesmol wenn dr Fidi mit sym Golf-Handicap blufft muess dr Michi betoone ass är halt no Sex hett), si kämpfe mit allne Triggli und bringe sich gägesyytig zer Wyssgluet mit Zytspyyl, Hueschteafäll in dr Konzentratioonsphase (vom andere dängg), Golfball in Drägg drampe, ewige Diskussioone ibr Winterregle – am schlimmschte isch es wenn si afönn ibr ihri Haimetstedt z’diskutiere, und wenn Alkohol im Spiil isch no hett als mängge Baizr uss Sorg um’s Inventaar dere Rundi presto en Änd gsetzt. Wehe em Fidi wenn dr Michi dr Kiibl gwünnt odr dr FCZ Maischtr wird! Denn kniggt dr Kopf und d’Schultere geehn uffe. Wehe em Michi wenn dr Fidi dr Kiibel gwinnt und dr FCB Maischter wird. Denn kunnt dr legendääri Schuufleblitz als Hohn und Spott. Abr aigentligg hänn si sich jo totaal gärn, au wenn’s e kaine wott zuegäh. Untr all dene Ghässigkaite und Provokatioone steggt im Grund gnoh diefschti Zuenaigig. Byspyyl gfellig? Si spyyle IMMR im glyche Flight (wie-n-e alts Ehepäärli) und wärdeliwär hett dr Michi nominiert fir Hand uff’s Härz? He dängg dr Fidi. Ebbe...

Also nit vrgässe, am 4. Mai goht’s los uffem Blatz (z’Hombourg im gliebte Elsass), d’Wohrhet kunnt abr jetz scho. Und achtig: die isch schonigsloos... schwätze wie Wältmaischtr kenne baidi, syyge numme aine.

 

(Sy Ziiridytsch vrstoht me (wenn me wott), abr falls ihr e Dolmetscher bruchet, no wändet ihr eych am beschte an dr Dambuur vom Grienfäld, dä hett ys das ybroggt).

 

1. Was isch dy ydriggligschti Fasnachtserinnerig?

Absturz

 

2. Was ka dy an dr Fasnacht närve?

Wenns kai alkohol git

 

3. Welli drey Wörtr falle dir zem Begriff „Waggis“ spontan y?

Basel Basel Basel

 

4. Sell d’Waggis-Naaselengi vom Fasnachts-Comité reguliert wärde? (falls jo, uff wie lang maximal?)

Nai open

 

5. Basel ohni Fasnacht isch wie …. ?

fcb ohni gigi

 

6. Was bringt di so richtig uff’d Palme?

Wenn dr fcb maischter wird

 

7. … und ibr was kasch dy eso richtig froie?

Wenn dr fcb nid maischter wird

 

8. E liebs Familiemitgliid schänggt dir zem Geburtsdaag e FCZ-Saisonabo – was machsch?

Gnüsse und äntlig mal fuessball luege

 

9. Wenn Ziiri ‚Downtown Switzerland’ isch, denn isch Basel… ?

E grosses kaff

 

10. Was isch fir di dr scheenschti Ort z’Basel?

S‘ perron wo dr zug uf ziri goht

 

11. Was wurdsch an Basel - odr an dr Schwiz - sofort ändere?

Basel zu de dütsche und an dr schwiz nüt

 

12. Mit wellem Mensch (ob lebändig odr nit) wottsch du gärn emol znacht ässe?  

Dr schorsch vom hafebeggi

 

13. … und was wurdsch du die Person ganz sicher frooge?

Zahlsch aine?

 

14. Was isch fir di dr Maximallohn wo-n-e Mensch pro Johr derft verdiene, egal wo und wievyyl är/sie schafft?  

1‘000‘000

 

15. Was nimmsch mit uff e-n-ainsami Insle?

E ball

 

16. Wär odr was bringt di sofort zem lache?

E sauguete witz

 

17. Letschti Froog, Hand uff’s Härz: wäm wurdsch du die Frooge am liebschte zem beantworte gäh?

Am fidi