Markus Lehmann

Also wär letschti z’Basel e druggts Blatt Babyyr in de Deepe kha hett (mänggi saage däm au „Zytig“), dä hett bi Goscht erstuunligs kenne lääse. Es isch um d’Wahle 2011 gange und me hett in däm Artiggl kenne lääse dr Markus Lehmann haigi mehreri Hiet a und eso vyyli Blään, är wirggi scho fasch wie-n-e ibrmotivierte Sportler mit syne vyylne Zyyl... also wär immr das au gschriibe hett (Naame isch dr Redaggtioon bikannt), är hett glaub syni Uffzgi nit gmacht – DÄ MAA ISCH SPORTLER, HALLO, und was fir aine! Scho mit 16 hett är in dr Nati A gspilt (bim RTV), und drnoo fir 3 Saisons (mer schryybe’s ungärn) zu de Grasshoppers gwäggslet und sy Karriere drnoo z’Basel beändet (dr Bydraag Handball uff synere Websyyte isch sehr läsenswärt, fasch e chli 30 Johr Basler Handballgschicht). Dr Markus hett abr (was sinn das no fir Zyyte gsi!) 100% z’Basel gschafft und isch extra uff Ziiri an Training und Match gfahre. Är isch bald ain vo de beschte Handballr worde, hett Olympischi Spiil (Moskau 1980) und Wältmaischtrschafte (Dütschland 1982) mitgmacht – und s’legendääre 16:16 gege dr gross Kantoon in dr Dortmundr Weschtfaalehalle isch Handballgschicht. Sinn das no Zyyte gsi wo Basel e Handballstadt gsi isch…

Noch synere aggtive Karriere als Sportler hett sich dr Markus au in dr Arbeit ehrgyzigi Zyyl gsetzt; unter anderem isch är 1995 Versicherigsbroker fir dr Kantoon Basel-Stadt worde, 1998 Regionaaldiräggter Nordweschtschwiiz fir d’National Versicherig und 2004 hett är sy aigeni Konsultingfirma grindet. Am maischte bikannt in unsrer Stadt isch är nadyrligg als Bolytiggr. Und es isch glatt wie’s dodrzue kho isch - die Gschicht goht eso: 1990 hett är im Lötschedaal in de Feerie mit Bikannte diskutiert und sich gnärvt ass es in de Basler Schuele nit meegligg isch, zwai Wuche Fasnachtsferie z’mache, aini fir d’Fasnacht (zem Waggis ahimmle nadyrligg) und aini zem go skifahre. Und drnoo hett em sy Frau gsait "Denn mach halt öbbis!" Das hett är sich nit zwaimol lo saage und isch in d’CVP ydrätte, hett e Volggsinitiatiive lanciert und die isch 1994 agnoh worde. 1996 bis 2005 isch dr Markus Mitgliid gsi vom Grosse Root, ab 2005 im Birgrgmaindroot und in dr Stiftigskommissioon vo dr CMS und syt 2001 Presidänt vo dr CVP Basel-Stadt. D’Kreenig vo synere Karriere isch drnoo 2011 kho, mit dr Wahl zem Grossrootspresidänt vo Basel-Stadt.

Also liebi Journalischte: als Spitzesportlr, ex-Natispiilr, als Grossrootspresi und als Basler z’Ziiri, ohni Ehrgyz goht nyt. Wär’s ze neye Ufer drybt und d’Latte hooch legt, dä hett’s schwer, d’Luft in dr Heechi isch grad am mym Rhyy schampaar dynn - grad mir als Waggis kenne das guet vrstoh, uns dien Pfyffer au allewyyl benyyde wäge unsrem Erfolg.

 

 

1. Was isch dy ydriggligschti Fasnachtserinnerig?

Als Gnäägis bini z'Obe bim Gässle immer hinter em letschte Tambour gloffe, vo dr Schiffländi an Seibi und wider zrugg - das während Stunde und mini Mame het fascht Vögel beko. Ich ha dert scho gwüsst, ich muess Tambour wärde!

 

2. Was ka dy an dr Fasnacht närve?

Nit viel - aggressivi Lyt, Jugendlichi wo Orange zrugg uf d Wääge wärfe und natirlig die oberdoofe Blitzliechter am Morgestraich und Lääde wo vrgässe s Licht abzschalte!

 

3. Welli drey Wörtr falle dir zem Begriff „Waggis“ spontan y?

Intrigiere in de Beize - aber das isch jo leider Gschicht, denn Dialägt und Perügge

 

4. Sell d’Waggis-Naaselengi vom Fasnachts-Comité reguliert wärde? (falls jo, uff wie lang maximal?)

Jo das glaub ich au - mr hänn scho gnue Reegle in dr Schwyz und z Basel - s goot nit yber e scheen grossi Waggisnase

 

5. Basel ohni Fasnacht isch wie …. ?

Zermatt ohni Matterhorn - oder Paris ohni Eifelturm

 

6. Was bringt di so richtig uff’d Palme?

Unehrligi Mensche wo anderi ibere Tisch zieh'n

 

7. … und ibr was kasch dy eso richtig froie?

Wenn dr FCB wider Maischter wird und an jedem Daag wo's mir und au mine Frynde guet goot

 

8. E liebs Familiemitgliid schänggt dir zem Geburtsdaag e FCZ-Saisonabo – was machsch?

E Lächle - ich ha drum emol drei Joor bi GC gspielt….no Frooge?

 

9. Wenn Ziiri ‚Downtown Switzerland’ isch, no isch Basel… ?

s Bescht wo's je het's git's - übrigens Basel, die schönschti Provinzstadt vo dr Wält

 

10. Was isch fir di dr scheenschti Ort z’Basel?

No schwär - s Roothuus, dr Märtplatz, dr Spalebärg, Minsterplatz (ohni Baustell) usw. und s Joggeli - s rot blaue, nit s Gartebad!!!

 

11. Was wurdsch an Basel - odr an dr Schwiz - sofort ändere?

E neyi attraggtivi Joggelihalle baue - und 26 Kantön sin 20 z'viel

 

12. Mit wellem Mensch (ob lebändig odr nit) wottsch du gärn emol znacht ässe?

Roger Federer

 

13. ... und was wurdsch du die Person ganz sicher frooge?

Ob dr Andy Murray wirgligg so unsympathisch isch, wie är wirggt?

 

14. Was isch fir di dr Maximallohn wo-n-e Mensch pro Johr derft verdiene, egal wo und wievyyl är/sie schafft?

das isch e sehr politischi Froog woni als Grossrootspreesi nit beantworte ka - die richtigi Antwort isch wohrschynlig gar nit z'finde!

 

15. Was nimmsch mit uff e-n-ainsami Insle?

Viel z Lääse und mi Oldtimer - damit ich ka bäschele und s Handy zem nochefrooge, wenn ich nimm wyter kumm….

 

16. Wär odr was bringt di sofort zem lache?

…immer wieder no e guete Witz - und em Giacobbo sini Figure find ich grossartig

 

17. Letschti Froog, Hand uff’s Härz: wäm wurdsch du die Frooge am liebschte zem beantworte gäh?

Roger Federer