Käppelijochwaggis

d Käppelijochwaggis sinn en Inschtitutioon in dr wilde Waggis-Szene und bsetze die Brugg an dr Fasnacht syt übr 20 Joor.

Repräsentiert wärde si bi uns vom Kufi (em Gründr, wo grad no sy ey Mann ey alter ego  mitbrocht hett) und em Glasi.

 

 

1. Was isch dy ydriggligschti Fasnachtserinnerig?

Kufi: Mi allererschti Morgestraich am Strooserand vs. Kufi alter ego:  Wenn vor mim Podäscht 200 Lytt noch minnere Pfiffe tanze, nur fyr e Fläschli Gogga...

Glasi: Wo mir - mi Fründ dr Phippe und ich - uff dr Brugg scho emoll für die alti Garde guebt hän. Mir hän uns uff unserem Bodäst vor em Käppelijoch Liegestiel ufftriebe. Uff dene hän mir denn e guet Glas Rotwy gnosse und de feini Siigare dampft. Mir sin uns vorkoh, wie d'Cortège Könige.

 

2. Was ka dy an dr Fasnacht närve?

Kufi: Fasnachtskulturbanause-Bsuecher  vs. Kufi alter ego:  Räppli vom Bode zmitz in d'Larve, hösch! und Kollege wo nimm wisse wien e Waggis sich benäh sott...

Glasi: Nitschwyzer wo Räppli vom Bode zruggschiesse oder no meh söttigi wo wo 10 Meter Orange mit voller Wucht schiesse.

3. Welli drey Wörtr falle dir zem Begriff „Waggis“ spontan y?

Kufi: kantig, uffgstellt, witzig vs. Kufi alter ego:  jo hösch genau digge, und nid uff d'Schnuure gfalle

Glasi: Hammergeil - Affetittestark - Fasnachtsfieber

 

4. Sell d’Waggis-Naaselengi vom Fasnachts-Comité reguliert wärde? (falls jo, uff wie lang maximal?)

Kufi: nai vs. Kufi alter ego:  gohts no, wär kunnt denn uff sone schnapsnasenidee!

Glasi: Reguliere? Je länger je besser, denn kann ich mini kurzi Nase bhalte

 

5. Basel ohni Fasnacht isch wie …. ?

Kufi: D'Schwyz ohni Basel vs. Kufi alter ego: also dasch ganz unmeeglig, das wär wien e unvollständigs Joohr oder no besser : wien e Waggis ohni Schnuure. So!

Glasi: Wenn dr FCB in dr Nati B spiele würdi

 

6. Was bringt di so richtig uff’d Palme?

Kufi: Ungerächtigkaite aller Art, arroganti Ignoranz vs. Kufi alter ego: Waggisreglementierigsbewegigsundfreyhaitsbeschränggige

Glasi: Wenn ich e Halb Stund astoh muess für ine Käller zkoh und denn dört nur Nitfasnächtler hogge wo nüt dringe.

 

7. … und ibr was kasch dy eso richtig froie?

Kufi: Kinderlache, e gselligi Rundi mit feyne Sache uffem Tisch, fyyne Humor, heerligi Ferie etc.usw. vs. Kufi alter ego: He dängg abem Glanz in den Auge vo de Binggis am Zyschdignomidaag, wenn sie's mit mir z'due griege

Glasi: Wenns natürlich los got. Das voht bi mir am Sunntig am zwei em Nommidaag a und steigeret sich bis zum Morgestraich expodenzial a.

 

8. Beschryyb ys bitte emol d’Fasnacht in dyne schlimmschte Alpträum.

Kufi: Sie fallt us! vs. Kufi alter ego: Ouh, also aimoll im Lääbe mues au e Waggis diplomatisch sy!

Glasi: Das isch für mir nit vorstellbar. Aber ei Albtraum hätt ich scho. Das isch dä, wenn d'Schwobe d'Mehrheit übernummte und mit billige Maske dr Cortège zur Maskeparade umtaufe würde.

 

9. Was wär dr Menschheit vrloore gange wenn’s di nit gäbti?

Kufi: Das frooget ihr besser d'Menschheit um mi umme vs. Kufi alter ego: E ganz e spezielle aimoolige Waggis, hösch!

Glasi: Vyli tolli Möglichkeite e guet Glass Wysse oder Rote z'dringge.

 

10. … und was bitte wär dr Menschheit erspaart woorde wenn’s di nit gäbti?

Kufi: E schreege Vogel vs. Kufi alter ego: Jo waisch Digge, i waiss nid, ob das en Erspaarnis wär, wenn an mim Platz kai Waggis wurd Fasnacht lääbe

Glasi: ??? - Vyli, für mi spannendi Diskussione

11. Was wurdsch an Basel - odr an dr Schwyz - sofort ändere?

Kufi: zB. D'Lieblosigkeit & d'Gedanggelosigkeit gheerten ewäggbildet vs. Kufi alter ego: Jo also Basel gheert eso vergresseret, as es mehr Platz fyr mehr gscheyti Waggis gitt

Glasi: Das d'Fasnacht bis am Frytig de Morge go würdi

 

12. Mit wellem Mensch (ob lebändig odr nit) wottsch du gärn emol znacht ässe?

Kufi: Caroline Rasser vs. Kufi alter ego: Ou jä, do kummi au mit. Und wenni nid derf, denn gang ich halt mitem peRFect go tafle, dä ka jo au so guet Jasse wien ich

Glasi: Mit Dir, liebe Malefyz-Balaari

13. … und was wurdsch du die Person ganz sicher frooge?

Kufi: Ganz viel, aber das blybbt mi Privatsach vs. Kufi alter ego: Iiiiich sag nyt! und dr peRFect wurdi frooge wenn är ändlig bi uns mitmacht an dr Fasnacht

Glasi: Wie Du uff mi kho bisch

 

14. Was isch fir di dr Maximallohn wo-n-e Mensch pro Johr derft verdiene, egal wo und wievyyl är/sie schafft?

Kufi: Kei fixi Zahl. Ich erinnere aifach ans Lied vom Mani Matter : Dene wos guet geit vs. Kufi alter ego: Wenns uff deren Ärde nummeno Waggis gäbti, wär das kai Thema meh.

Glasi: 12 Millione

 

15. Worum sött e Waggis Stadtpresidänt wäärde?

Kufi: Ändlig emoll Witz, Ironie, Action und gueti Reede im Saal vs. Kufi alter ego: Wo kani mi mälde?

Glasi: Well är guet intrigiere kha und kommunikativ allewyl aktiv isch

16. Wär odr was bringt di sofort zem lache?

Kufi: e guete Gag vs. Kufi alter ego: mi Spiegelbild

Glasi: Gueti Sprüch

 

17. Letschti Froog, Hand uff’s Härz: wäm wurdsch du die Frooge am liebschte zem beantworte gäh?

Kufi: em Bruno Manser, laider goht das nimm, drumm em peRFect (Roger Federer) vs. Kufi alter ego: em Ambros Isler (kai Witz, hösch)

Glasi: Dr Caroline Donche