Kuno Schmutz (1937-2011)

Das isch in jedere Beziehig s’druurigschte Hand uffs Härz wo mer hänn, e Bydraag wo au e gstandene Waggis e Dräänli im Aug hett. Dr Kuno Schmutz isch ys e langjöhrige droie Frind gsi (fir dr Däni fasch wie-n-e Babbe); mir sinn dief bedroffe ass är nochere schwere Grangget im Augschte 2011 sy letschte Gang hett miesse adrätte und nimmi untr ys isch.

Dr Kuno, geboore 1937 z’Bollschweil ähne an dr Gränze, isch Coiffeurmaischtr gsi, was ihn (und sy Frau Martha, mit dere är fasch 50 Johr vrhirooted gsi isch) in d’Schwiz brocht hett, zersch uff Solothurn und drnoo uff Basel. Do hett är vyyli Johr dr legendääri Coiffeursalon Schmutz an dr Gieterstross im Gundeli gfiehrt. Är hett Tout Bâle d’Heerli gfulze und isch zuenere Inschtitutioon worde (sy Disgretioon hett ihm abr immr untersait z’vrzelle wär är alles in dr Kundschaft kha hett). Die letschte Johr hett är – pensioniert, abr immr wiff und buschber – in allne Ziig gnosse, Reise, sy gliebts Gärtli, vyyli vyyli gselligi Alöss, bis ihm grad vor dr Fasnacht 2010 dr Sänserich zem erschte mol uff d’Schultere glopft hett. Am Apéro 2011, scho sehr grangg und zaichnet, isch är nomol zu de Bâlaari uff d’Brugg kho, im Wisse ass es kai nögscht mol gäh wird.

Dr Kuno blybt e jedem in Erinnerig wo ihn hett derfe kenne lehre. Är isch au mit ibr 70 no e richtige Luusbueb gsi, ain wo jede Kaabis mitgmacht hett; är hett immr uss allem ebbis positivs kenne gwinne, au wenn’s s’Lääbe emol nit eso guet gmait hett mit ihm; im Bachlätte (wo-n-är gwohnt hett) und im Gundeli isch är vyylne bikannt gsi ass ebber wo allne hilft und immr do isch, e wohre Menschefrind, syni Gschichte (wie dr Gogomobil-Usfluug uff Italie odr sy Ibirgeriggsprozedere) sinn legendäär. Dr Kuno isch ibr 50 Johr mit Begaischterig als Passive an d’Fasnacht gange und hett e Riisefraid kha an de Waggis, und är hett zersch d’Balggebieger und drnoo d’Bâlaari mit vollem Elan untrstitzt.

Das Hand uffs Härz hett dr Däni mit em Kuno im April 2011 gmacht. Em Kuno isch es dozumol no relativ guet gange, die beide sinn im Wohnzimmer vo’s Schmutze ghoggt, dr Däni hett mitgschribe, d’Martha immr widr gluegt ass do kaini gruusigi Witz vrzellt wärde, und s’Frooge-Antwort isch nodisno zuemene lange perseenlige Ussdusch worde, mit vyyl Lache und „waisch no?“ Gschichtli (zem Byspyyl wo dr Kuno an dr Fasnacht 1998 em Däni emol zaigt hett ass me im hindere Sääli vom Laiezorn jo Glaidrheegge kha abschruube…) abr au sehr ärnscht und druurig, im Agsicht vom Ändi wo sich abzeichnet hett.

D’Erinnerig kha eim kaine näh; Kuno, mach’s guet. Mir sinn danggbar fir alles was du gäh hesch. Du hesch immr e Blatz in unsre Härze, wo du bisch sinn mir. RIP.

 

 

1. Was isch dy ydriggligschti Fasnachtserinnerig?

Wo my Frau Martha an ihrer erschte Fasnacht 1960 dr Schueh in dr Freye Stross vrloore hett. Das isch dr Plausch gsi. Si hett Pömps akah, aine isch ere hinde druff drampt und dr Schueh isch ewägg gsi. Y ha in dr Mänge e-n-andere Schueh gfunde, abr e flache. Und uffem Fundbüro am halber 8i hett drnoo aine gsait, „Luege Si, do hett’s gnue Schueh, nämme Sy aifach aine mit.“ Do hämmer scho e paar mal glacht drübr.

 

2. Was ka dy an dr Fasnacht närve?

Blitzliechter an Moorgestraich.

 

3. Welli drey Wörtr falle dir zem Begriff “Waggis“ spontan y?

Stopfe, Intrigiere, Orangebängle

 

4. Sell d’Waggis-Naaselengi vom Fasnachts-Comité reguliert wärde? (falls jo, uff wie lang maximal?)

Jo, uff 2 meter.

 

5. Basel ohni Fasnacht isch wie …. ?

Subbe ohni Salz.

 

6. Was bringt di so richtig uff’d Palme?

Wenn Eltere Räppli vom Boode ufflääse und andere noocheschiesse (bi Kindr kah me’s no toleriere)

 

7. … und ibr was kasch dy eso richtig froie?

Wenn’s uffemmene Waage luschtig zuegoht, wenn d’Waggis gueti Sprüch druff hänn und au emol aabekömme zu de Lüt.

 

8. E liebs Familiemitgliid schänggt dir zem Geburtsdaag e FCZ-Saisonabo – was machsch?

Uff Ziiri würd y wäge-n-emme Match nit extra fahre. S’Abo wurd y em Santino Muratore witrschängge, är isch gliehende FCZ-Fan.

 

9. Wenn Ziiri ‚Downtown Switzerland’ isch, no isch Basel… ?

… s’Vorzeige-Downtown vo dr Schwiz.

 

10. Was isch fir di dr scheenschti Ort z’Basel?

d’Pfalz, dört hesch dr schönschti Bligg übr Basel.

 

11. Was wurdsch an Basel - odr an dr Schwiz - sofort ändere?

Unsre ‘Bolyzischt’ vo dr Pfirtrgass würd y sofort uff dr Mond schiesse. Und ass mer z’Basel no e See hätte, dr Eglisee isch aifach z’glai.

 

12. Mit wellem Mensch (ob lebändig odr nit) wottsch du gärn emol znacht ässe?  

Mit em Kaisr vo China…

 

13. … und was wurdsch du die Person ganz sicher frooge?

… obr är mir das Znacht au zahlt.

 

14. Was isch fir di dr Maximallohn wo-n-e Mensch pro Johr derft verdiene, egal wo und wievyyl är/sie schafft?

Wemme das könnti ussglyche, also ass die undere au höcheri Löhn bekömme (mindischtens 70’000), no würd y saage bi de oobere isch’s mer glych.

 

15. Was nimmsch mit uff e-n-ainsami Insle?

E hübschi Frau…

 

16. Wär odr was bringt di sofort zem lache?

Dr Blueme-Fritz (wo jo leidr nümmi isch)

 

17. Letschti Froog, Hand uff’s Härz: wäm wurdsch du die Frooge am liebschte zem beantworte gäh?

Em Beni Huggel