Stadtpresidänt Guy Morin

Mir Basler sinn jo immr bsunders objeggtiv, vor allem wenn’s um unsri gliebti Stadt und unser Ussebild goht. Gäld hämmer nit vyyl (und dribr schwätze diemer us Prinzip nit), abr was mer hänn gämmer gärn us fir e guete Zwägg. Noch vyylne Befrogige, opinion polls und Umfrooge, saudyyre Expärtekommissioone und site visits vo Professoore uss dr Innere Mongoley hett Basel Tourismus vor e paar Johre wisseschaftligg kenne beleege ass ... haltet eych fescht: Basel andersch tiggt!! Und hai sinn alli stolz gsi ass mr so vyyl Gäld sinnvoll aglegt hänn! Also Basel tiggt andersch und alli sinn stolz – e diggi Sach, wenn nit alli so Tschumpel wäre: das Gäld hätt me sich kenne spaare wemme numme dr Bâlaari gfrogt hätt. Und dä hätt gsait: Basel tiggt andersch will mer e Stadtpresi hänne mit emmene grosse Härz fir Waggis. Welli anderi Stadt in dr Wält hett das, bittscheen? Also.

Dr Guy Morin isch Grossroot gsi, Sunnebluemespändr, Huusarzt, Regierigsroot und jetz presidiert är unsri Stadt syt 2008; är isch sichr ebber wo schampar vyyl Muet muess ha (ussr ihm hett niemmer dä Poschte welle, die andere Parteye hänn sogar gstritte wär nit sell kandidiere). Är iebt sy Amt mit vyyl Härzbluet uss und hett’s nit immr lycht mit ys Basler - will mer’s em nit immr lycht mache, es isch eso, grad an de drey scheenschte Dääg.

Au dr Bâlaari isch kai Usnahm. No letscht Johr hett me do uff dere Syyte dr Schnitzebangg kenne lääse:

 

D’Orang Utan, s’isch druurig, si hänn miesse goo,

dr Zolli mit Drääne no Dytschland verloo

dert hogge si umme, vo Bewegig kai Spuur

si luege dur d’Schyybe und ganz vyyl uff d’Uhr.

Dr Zollidiräggter hett’s vyyl z’schpoot ygseeh.

fir settig Missione muesch dr Morin jetz neeh! 

 

Abr jetz nimm y das alles zrugg und bihaupt s’Gäägedail. Y bi ai Johr gschidr und elter und dischtanzier mi vo so ungwalifiziertem Gschwaafl; frey nach Adenauer – was interessiert mi my Gschwätz vo geschtr? Jetz wo dr Guy Morin do sy Händ uffs Härz gleggt hett wird y nie me ebbis beeses ibr ihn saage, Nie me, NIE ME (also guet, fasch nie me). Und drfir empfiehl y allne wo dr soziopolitischi Yfluss vo Waggis wänn stergge: Morin wähle und’s gitt Sunneblueme fir alli!

 

Spass uff’s Velo; es isch aifach lessig ass mer innere Stadt derfe lääbe wo dr Presidänt sich au fir so driviaal Zyyg wie e Bâlaarisyyte Zyt nimmt. Merci vyylmol an rangheegschte Basler - und das kunnt wirgligg vo Härze, au wenn’s numme das vommene mindere Waggis isch.

Und do wäre drnoo d’Antwoorte vom Herr Stadtpresidänt hegschtperseenligg (also in andere Stedt hätt das e Ghostwriter ibrnoh - so andersch tiggt Basel):

 

 

1. Was isch dy ydriggligschti Fasnachtserinnerig?
E Morgestraich im dieffe Schnee

 

2. Was ka dy an dr Fasnacht närve?

Sujets under der Riemelynie

 

3. Welli drey Wörtr falle dir zem Begriff „Waggis“ spontan y?

(Langi) Naase, z’tief im Glas

 

4. Sell d’Waggis-Naaselengi vom Fasnachts-Comité reguliert wärde? (falls jo, uff wie lang maximal?)

Nai, suscht kenne sie jo nümmi gnue tief ins Glas luege

 

5. Basel ohni Fasnacht isch wie …. ?

Dr Rhyy ohni Wasser, e Läggerli ohni Hoonig, d’Fasnacht ohni Basel

 

6. Was bringt di so richtig uff’d Palme?

Wenn de en Saich verzellsch

 

7. … und ibr was kasch dy eso richtig froie?

Ibr glatti, gscheiti Värsli uff de Laddärne

 

8. E liebs Familiemitgliid schänggt dir zem Geburtsdaag e FCZ-Saisonabo – was machsch?

I dues uff E-Bay verstaigere und wills niemmerts will, machi Räppli druss…

 

9. Wenn Ziiri ‚Downtown Switzerland’ isch, no isch Basel…?

Dr Naabel vo Europa

 

10. Was isch fir di dr scheenschti Ort z’Basel?

S’Rothus

 

11. Was wurdsch an Basel - odr an dr Schwiz - sofort ändere?

Fünf Waggis ins Fasnachtscomité wähle

12. Mit wellem Mensch (ob lebändig odr nit) wottsch du gärn emol znacht ässe?

Mit em Waggis mit der längste Naase

 

13. ... und was wurdsch du die Person ganz sicher frooge?

Wie goots als dim Nägge noch der Fasnacht?

14. Was isch fir di dr Maximallohn wo-n-e Mensch pro Johr derft verdiene, egal wo und wievyyl är/sie schafft?
Soviel wie ai Waggis in ainere Fasnacht kaa versuffe...

15. Was nimmsch mit uff e-n-ainsami Insle?

Ohni my Frau giengti nid uff e ainsami Insle.

 

16. Wär odr was bringt di sofort zem lache?
Dr Massimo Rocchi als Waggis

17. Letschti Froog, Hand uff’s Härz: wäm wurdsch du die Frooge am liebschte zem beantworte gäh?
Unserem Fasnächtler Carlo Conti

 

[und dr Carlo Conti hett syni Antwoorte au scho ygschiggt; ihm wird d'Ehr z'Dail, die zwaiti Staffle vo Hand uffs Härz z'ereffne]