Grabmacher Joggi

dr Roger Jean Rebmann organisiert syt e baar Joor ganz spezielli Fiehrige mit kuurligem Flair duur unseri Stadt.

1. Was isch dy ydriggligschti Fasnachtserinnerig?
S' rasch und dief Mitgfühl vo zahlloose Fasnächtler, wo 2007 dr glai Laurenz vo de VKB uff em Barfi tödlich verunglyggt isch.

2. Was ka dy an dr Fasnacht närve?
Bierfläscheschärbe uff dr Stroos.

3. Welli drey Wörter falle dir zem Begriff „Waggis“ spontan ii?
jääsalllliduflottefäegr...  hhheeekummdoooaaanne... wotscheeemmmimösli...? (oder optional "doheschesaggräppliinchrage...!")

4. Sell d’Waggis-Naaselengi vom Fasnachts-Comité reguliert wärde? (falls jo, uff wie lang maximal?)
Nid vom Comité sondern von'ere aigene Fachgruppe. Yyber d'Längi ka me erst ebbis saage, wenn d' Zwaimiillione-Studie 2017 stooht, und d'Fäldversiech 2021 abgschlosse sind. Dernoo git's viilicht no es Referändum.

5. Basel ohni Fasnacht isch wie …. ?
Dr Samichlaus wo Ostereier versteggt.

6. Was bringt di so richtig uff’d Palme?
Ignoranz im Mantel vo dr Macht.

7. … und ibr was kasch dy eso richtig froie?
Glaini Sache wo de nid zahle kasch und der jede Daag begägne kenne; wie a glatt Gsprööch im Drämmli.

8. Beschryyb ys bitte emol d’Fasnacht in dyne schlimmschte Alpträum.
S'isch Moorgestraich, s'schlooht Vieri, s'Liecht gooht uss und d Clique spiile s'Lied vom alte Holzmichel.

9. Was wär dr Menschheit vrloore gange wenn’s di nit gäbti?
Lies my Noochruef in dr Zyttig. Dört stoht so ebbis normalerwiis drin. Kaa dr allerdings nid saage wenn er fällig wird.

10. … und was bitte wär dr Menschheit erspaart woorde wenn’s di nit gäbti?
Meh als 100 Kilo Zynismus

11. Was wurdsch an Basel - odr an dr Schwyz - sofort ändere?
Dr' Grössewahn abstelle, wo mängmool wie'ne Vollsuff yyber mys arme Basel kunnt

12. Mit wellem Mensch (ob lebändig odr nit) wottsch du gärn emol znacht ässe?
Carl Gustav Jung

13. … und was wurdsch du die Person ganz sicher frooge?
Isch me im Prinzip normal wenn me inere biirewaiche Wält biirewaich isch?

14. Was isch fir di dr Maximallohn wo-n-e Mensch pro Johr derft verdiene,
egal wo und wievyyl är/sie schafft?
Ebbis verdiene und ebbis bikoo sind zwai verschiideni Sache. I dängg es sett e jede bikoo was är verdient. Waisch wiviil Cüplidringger denn bletzlig Löwezahnsüppli syyrpfle miesste?

15. Worum sött e Waggis Stadtpresidänt wäärde?
Kai Ahnig. Bruucht hämmer bis jetzt kaine. Mer hätt der Regierigspresidänt wo die Funktion scho ussfüllt. Was sölle mer do no mit eme Stadtpräsident?

16. Wär odr was bringt di sofort zem lache?
Jede beliebig Band vom Comic "Le petit Spirou" von Tome & Janry

17. Letschti Froog, Hand uff’s Härz: wäm wurdsch du die Frooge am liebschte zem beantworte gäh?
Vermutlig em Tino Krattiger