Florian Raz

 

1. Was isch dy ydriggligschti Fasnachtserinnerig?

Wo n ych nach vielne Joohr Skifahre wider emol anne Morgestraich gange bi – und gmerkt ha: Hey, das berüert my jo no immer, au wenn y in der Zwyschezyt gmaint ha, d’Fasnacht syg nyt fir my.

 

2. Was ka dy an dr Fasnacht närve?

Gugge ohni Larve. Die sölle doch irgendwo in Norde go ummeposune.

 

3. Welli drey Wörtr falle dir zem Begriff „Waggis“ spontan ii?

«Wotsch e Mimöösli?!?!»

 

4. Sell d’Waggis-Naaselengi vom Fasnachts-Comité reguliert wärde? (falls jo, uff wie lang maximal?)

Absolut! Wo kämte mer den sunscht no ane? Und zwar umgekehrt Proportional zum Wysswyy-Konsum vom Träger.

 

5. Basel ohni Fasnacht isch wie …. ?

Wyy ohni Alkohol. Truubesaft isch sicher au feyn, aber es fäähle die entscheidende Prozänt.

 

6. Was bringt di so richtig uff’d Palme?

Lyt wo immer yber alles Bscheid wysse und zu allem e Meinig hän (die richtigi, nadierlig …).

 

7. … und ibr was kasch dy eso richtig froie?

Zwei Stund gar nyt miesse mache.

 

8. Beschryyb ys bitte emol d’Fasnacht in dyne schlimmschte Alpträum.

D’ Gugge laufe alli ohni Larve ummenand, sobald me immene Käller sitzt, wird me vommene bsoffene Bangg beläschtigt, wo nid merggt, wie schlächt sini Värsli aakömme. Und alli Basler syn so stolz druff, wie sauglatty Sieche si syge, dass allne andere grad s’ Lache vergooht.

 

9. Was wär dr Menschheit vrloore gange wenn’s di nit gäbti?

Jesses – nid viel, befürcht y. E baar flüchtigi Wortwitzli in regionale Fuessballbricht – und myny Tochter gäbt’s jo au nid. Das wär wirklig extrem schad. 

 

10. … und was bitte wär dr Menschheit erspaart woorde wenn’s di nit gäbti?

Au nid so viel, hoff y. E baar abvereggty Wortwitzli in regionale Fuessballbricht.

 

11. Was wurdsch an Basel - odr an dr Schwyz - sofort ändere?

Y würd die beide Basel fusioniere. Isch doch Habakuk, zwei nid ganzi Kantön uff däm glaine Platz. 

 

12. Mit wellem Mensch (ob lebändig odr nit) wottsch du gärn emol znacht ässe?

Also, mit tote Mensche iss y nid so gärn. Dorum mit em Pep Guardiola.

und was wurdsch du die Person ganz sicher frooge?

Guet, und wie funktioniert jetzt das mit dämm Fuessball?

 

14. Was isch fir di dr Maximallohn wo-n-e Mensch pro Johr derft verdiene, egal wo und wievyyl är/sie schafft?

Ei Million. Das sött doch länge, zum immer öbbis Warms uff em Täller z’ha, oder? 

 

15. Worum sött e Waggis Stadtpresidänt wäärde?

Well är in repräsentative Moment sicher nid halb so überforderet wyrke täät wie dr Guy. 

 

16. Wär odr was bringt di sofort zem lache?

Myny Tochter.

 

17. Letschti Froog, Hand uff’s Härz: wäm wurdsch du die Frooge am liebschte zem beantworte gäh?

Em Angelo Gallina.