Eugen ‚Wäbse’ Weber

Dr Wäbse hett 50 Johr Fasnacht uffem Buggel; Bijoutier, Koch, Glaibasler, s'Härz immr am rächte Flägg und ain wo sait was er dänggt... Genau dr richtige zem die Froogerundi ereffne.

 

 

1. Was isch dy ydriggligschti Fasnachtserinnerig?

100 Joor VKB anno 1984 wo die ganzi VKB im Zug wie vor 100 Joor gloffe isch.

 

2. Was ka dy an dr Fasnacht närve?

Nur ains, Guggemuusige wo in dr Baiz nit wisse wenn me ufheere sott und spile und spile!!

 

3. Welli drey Wörtr falle dir zem Begriff „Waggis“ spontan y?

E Larve mit ere grosse Nase, Holzschue und e grossi Rehre.

 

4. Sell d’Waggis-Naaselengi vom Fasnachts-Comité reguliert wärde? (falls jo, uff wie lang maximal?)

Nai sicher nit. Für das isch’s Comitee nitt do. Zuedäm friehner isch si glainer gsi. Denne isch’si immer wie greeser worde und jetze dungt’s mi wird si wieder e bitz glainer.

 

5. Basel ohni Fasnacht isch wie …. ?

E Hochzytsnacht ohni Brutt. Oder e Mählsubbe ohni Mähl. (Dä doppleti Verglych find i jetze noh ganz guet).

 

6. Was bringt di so richtig uff’d Palme?

Alli Besserwisser wo vo dr Sach kai Ahnig hänn und e komplette Saich verzelle. Sigs iber d’Fasnacht, Wirtschaft oder Politik.

 

7. … und ibr was kasch dy eso richtig froie?

Iber mini säx Änggel.

 

8. E liebs Familiemitgliid schänggt dir zem Geburtsdaag e FCZ-Saisonabo – was machsch?

I schäng si im Pfarrer Sieber in Ziri. Das isch e Zircher wo mi beydruggt und dä waiss sicher aine wo do dra e Fraid het.

 

9. Wenn Ziiri ‚Downtown Switzerland’ isch, denn isch Basel… ?

Wältkulturerbe vo dr Unesco.

 

10. Was isch fir di dr scheenschti Ort z’Basel?

Aidüttig dr Bach. Wenn de am Glaibaslerufer stohsch und übere luegsch sehsch e Kulisse wo de vom Bodesee bis Rotterdam niene meh findisch.

 

11. Was wurdsch an Basel - odr an dr Schwiz - sofort ändere?

Basel sotti sich meh sälbschtbewusst gäh gegeniber dr Schwiz. D’Schwiz sett sich meh an Basel orientiere, wie me mit de Nochber kutschiere sott.

 

12. Mit wellem Mensch (ob lebändig odr nit) wottsch du gärn emol znacht ässe?

Mit em Dalai Lama.

 

13. … und was wurdsch du die Person ganz sichr frooge?

Dasch e Mensch wo mi beydruggt und i glaub mit ihm z’diskudiere ergitt soviel Frooge das ai Oobe nit längt.

 

14. Was isch fir di dr Maximallohn wo-n-e Mensch pro Johr derft verdiene, egal wo und wievyyl är/sie schafft?

Das isch für mi kai Froog wo me aaifach eso beantworte kha. Wenn aine ebbis schafft und derbi fir s’Gschäft oder d’Allgemainheit förderli isch, soll er das bykoh wo die s’Gfühl hänn er verdient das. Do sotte sich d’ Bangge halt au dra halte.

 

15. Was nimmsch mit uff e-n-ainsami Insle?

Mys Vreni und e Buech über s Thema wie me uff ere ainsame Insle kha iberläbe.

 

16. Wär oder was bringt di sofort zem lache?

Du mit dyne Frooge!!!

 

17. Letschti Froog, Hand uff’s Härz: wäm wurdsch du die Frooge am liebschte zem beantworte gäh?

I miest’si uffdaile. Iber d’Fasnacht und Basel im Felix von Rohr Altobmaa vom Comitee und dr Räschte im Pfarrer Sieber das isch e Mensch wo mi au stargg beydruggt und mit baide Fiess fescht uff em Bode stoht, sich für Minderhite ysetze duet.