Dr. Jörg Rosskopf, Obrgildemeischtr Narrengilde Lörrach 1936 e.V.
(also zersch emol: eso e lange Titel hett bi uns no keine kha...)
Mir Basler sinn jo wältoffeni Mensche, Humanischte und Philantroope – Erasmus vo Rottrdam-prägt hejo! - mr tigge-n-andersch und sinn eso vyyl speziellr wie die Wält südlig vom Hauestei (odr dr Kantonsgränze für die Duusigprozäntige)...
Mmhmmm, mmhmmm, mmmhmmm.
... also, wäre mr wirgligg eso, drnoo wurde mr allewyyl gärn übr dr Tällrrand uuseluege und d’Wält gniesse, nit numme d’Loireschlössli und d’Toscana, abr au das wo ganz noch ligt, will Wältoffeheit hett jo keini Gränze. Wurd me meine.
Machet doch emol bitte dr grossi ”Basel-Wältoffeheitstescht“ in eurer Bikanntschaft. Frooget innere gmietlege Rundi was me eso weiss übr: d’Lörracher Fasnacht.
D’Antwoort vo de allrmeischte, 10 zue 1: „kei Ahnig.“ (und vrmuetlig gitt’s no e baar sauglatti Kommentäär zem „Narri-Naro“Fasching und Prinz Karnival, übr bsoffeni Schungglr uff kaputte Feschtbängg zue d’Schwoobe allgemein, Kategorie ‚muesch di grad fremdschämme’).
Und do hört si scho uff, unsri Offeheit und das Wüsse übr die tolli grossi Wält wo Basel mit offene Ärm erwartet … also högschti Zyt für Faggte:
- D’Narregilde Lörrach 1936 e.V. isch e gmeinnützige Verein vo de Lörrachr Fasnachtsglygge
- Zyyl in de Statute isch d’Bruchtumspflääg vo dr allemanische Fasnacht z’Lörrach
- Dr Verein vertritt ehreamtlig d’Interässe vo allne Mitglidr (40 Glygge) und organisiert d’Lörracher Strossefasnacht, wo jedes Joor bis zue 100’000 Bsuchr azieht
- Dr Protäggtr vo dr Lörracher Fasnacht isch e Basler. Und zwor e guete alte Bikannte uff dr Bâlaarisyyte, dr Felix!
Uff dr Websyyte vo dr Narregilde lääse mr:
„Mit Felix Rudolf von Rohr ist erstmals ein Basler zum Protektor der Lörracher Fasnacht bestimmt worden. Der langjähriger [sic! Si könne halt alles ussr Hochdytsch; Am. vo dr Red.] Obmann des Basler Fasnachts-Comités hat in seiner Amtszeit wesentlich dazu beigetragen, dass sich eine enge und von gegenseitiger Achtung geprägte Freundschaft zwischen dem Gildenvorstand und dem Comité entwickeln konnte. Nun gilt es darum das gegenseitige Wissen um die Bräuche des jeweils anderen bei den Fasnächtlerinnen und Fasnächtlern unserer beiden Städte zu verbessern. Hierzu kann die Wahl von Felix zweifellos beitragen. Und sie soll Zeichen des Respekts für seine ganz persönliche Leistung und die Basler Fasnacht im Gesamten sein.“
Do dörfe d’Bâlaari nadürlig nit fähle und mr leischte gärn unsre Bydraag: Hand uffs Härz mit em Obergildemaischtr!
1. Was isch dy ydriggligschti Fasnachtserinnerig?
Wenn ich dra dängg was us de Lörracher Fasnacht in de letschte 10 Johr worde n'isch.
2. Was ka dy an dr Fasnacht närve?
Aktivi Fasnächtler die immer meine si oder ihri Clique sige de Mittelpunkt vo de Wält.
3. Welli drey Wörtr falle dir zem Begriff „Waggis“ spontan ii?
Mi absoluti Lieblingsfasnachtsfigur!
4. Sell d’Waggis-Naaselengi vom Fasnachts-Comité reguliert wärde? (falls jo, uff wie lang maximal?)
Soland d'Nase no lang gnueg bliibt, daß me si überall inestägge cha - worum eigentlich nit?
5. Basel ohni Fasnacht isch wie …. ?
... e Garte ohne Blueme.
6. Was bringt di so richtig uff’d Palme?
Lüt, die Fasnacht fiire mit Komasuffe verwächsle un sich dann ensprächend benämme.
7. … und ibr was kasch dy eso richtig froie?
...über e milde und sunnige Fasnachtsdag.
8. E liebs Familiemitgliid schänggt dir zem Geburtsdaag e FCZ-Saisonabo – was machsch?
Ich schänggs minem Göttichind z'Rieche.
9. Wenn Ziiri ‚Downtown Switzerland’ isch, no isch Basel… ?
... e Vorort vo Lörrach :-)
10. Was isch fir di dr scheenschti Ort z’Basel?
d'Münschterfähri.
11. Was wurdsch an Basel - odr an dr Schwiz - sofort ändere?
Sälle unnötige Minderwertigkeitskomplex dä dezue füehrt, dass sich d'Dütschschwizer immer freue müen, wenn die Dütsche emol noime nit erfolgriich sin.
12. Mit wellem Mensch (ob lebändig odr nit) wottsch du gärn emol znacht ässe?
Mit em Papscht.
13. ... und was wurdsch du die Person ganz sicher frooge?
Worum mänggi Sache so sin wie si sin.
14. Was isch fir di dr Maximallohn wo-n-e Mensch pro Johr derft verdiene, egal wo und wievyyl är/sie schafft?
Verdiene darf wäge mir jede Mensch soviel er wott - aber kriege sott er numme soviel wie n'er zu me guete und a'gmässene Läbe bruucht.
15. Was nimmsch mit uff e-n-ainsami Insle?
Mi Familie.
16. Wär odr was bringt di sofort zem lache?
E Schwizer dä partout druf bestoht mit mir Hochdütsch z'schwätze :-)
17. Letschti Froog, Hand uff’s Härz: wäm wurdsch du die Frooge am liebschte zem beantworte gäh?
En gueti Froog - vielliecht unserer OB Gudrun Heute-Bluhm verbunde mit ere diebische Vorfreud uf ihri Antworte im Dialekt ...