Dr Dambuur vom Grienfäld
Dr Dambuur vom Grienfäld, odr dr Drummelhund, isch eso bikannt und prominent in unsrer gliebte Stadt ass me sy Name uff so-n-ere profaane Syyte nit derf nenne (also versuecht wär y jo als Waggis scho…). Sy grossi Lyydeschaft isch, näbe-n-em Mäntigsschutte uff dr hailige Matte, allewyyl s’drummle (ruesse derf me nit saage, susch wird är rot im Gsicht und riehrt Schleegel umenand); dr Dambuur hett sich dr Frau Fasnacht vrschriibe und isch sit vylne Johre mit Lyyb und Seel innere agsehene Basler Stammclique (Froog 1). Und wenn är nit an d’Fasnacht dänggt, also in de räschtlige 10 Minute vom Johr, no isch är e Alphatier binere Schwizer Grossbangg (Froog 14).
Ainewäg hett är e gross Härz fir Waggis (Foti) und isch dr läbigi Bewyys ass es mitenander besser goht. Är hett dr Bâlaari sit dr Afangszyt unterstützt, fählt an kaim Apéro odr Bâlaa-B-Q und isch fir jedi bissigi Bemerkigg ibr d’Waggis z’ha…
1. Was isch dy ydriggligschti Fasnachtserinnerig?
Wo-n-i als glaine Binggis mit em Bappe an d Fasnacht gange bi, sin die Alte Stainlemer am Mittwuch zObe in dr Stänzlergass in Richtig Merkurstube duuregloffe. S'Moos isch vo de Dächer abekoh, so het das dätscht! Do han i gwüsst "dasch e Clique - das isch mi Clique!".
2. Was ka di an dr Fasnacht närve?
Me isch eso tolerant. Aber Punkt vieri am Donnschtig am Morge isch denn fertig luschtig. Wenn denn e Clique nach em Latärneabgäh d Frächheit bsitzt, zäh Minute zum Zmorgereschtaurant z drummle und z pfyffe, wird pfiffe (mit de Finger) und Plastikbächer voller Bier fliege. Für mi nid nochvollziehbar.
3. Welli drey Wörtr falle dir zem Begriff "Waggis" spontan y?
Frisch, fräch und liebenswürdig.
4. Sell d'Waggis-Naaselengi vom Fasnachts-Comité reguliert wärde? (falls jo, uff wie lang maximal?)
Aber das isch jo klar. I bi e absolute Verfächter vo Regulatorie. In däm Fall miesst me d Körperlängi, abzüglich em Gwicht, d Summe durch 13.72 mol d Wurzle vo Pi rächne. Nid zvergässe sin denn aber s'Drzuezelle vo 3,5 Centimeter am Schluss. Sünsch passts nämlig nümme zu de Zockeli und dr Saublootere.
5. Basel ohni Fasnacht isch wie .... ?
Züri ohni Zug nach Basel, Italie ohni s Meer, e Schwoob ohni grossi Schnuure, also aifach undänggbar.
6. Was bringt di so richtig uff'd Palme?
Wenn e FCB-Spiel färnsehtechnisch uf e Fasnachtsmäntig am Morge am Vieri feschtglegt wird.
7. ... und ibr was kasch dy eso richtig froie?
Amene sunnige Fasnachtszyschtig am Nomidaag aifach neume aanesitze und de glaine und grosse Kinder zueluege, wie si d Fasnacht gniesse.
8. E liebs Familiemitgliid schänggt dir zem Geburtsdaag e FCZ-Saisonabo - was machsch?
Sottigi Familiemitglieder han i nid. Aber wenn, denn han i sie spötischtens denn nümme.
9. Wenn Ziiri 'Downtown Switzerland' isch, denn isch Basel... ?
Dr Himmel uf Aerde!
10. Was isch fir di dr scheenschti Ort z'Basel?
S Käppelijoch am Fasnachts Mäntig gege Obe...
11. Was wurdsch an Basel - odr an dr Schwiz - sofort ändere?
I wurd GC finanziell unterstütze, will dä Club doch wirklich dr liebscht Konkurränt vom FCB isch. Denn wurd i e sogenannti Fasnachtsbolizei yfiehre. Die würde denn alli Waggisnase uf d Längi kontrolliere und wäre zuedäm verantwortlich, das d Fasnachtstoleranz au wirklich bim Hinterscht und Letschte am Donnschtig am Morge, Punkt vieri, verlore goht. Es gäbt do sicher no vieli anderi Ufgoobe.
12. Mit wellem Mensch (ob lebändig odr nit) wottsch du gärn emol znachtässe?
I wurdi gärn emol mit em Balaari und sinere Sippe go Znachtässe. Das wird sich im 2011 sicher emol ergäh.
13. ... und was wurdsch du die Person ganz sicher frooge?
Ka me Waggis-si lehre oder isch me das vo Geburt us?
14. Was isch fir di dr Maximallohn wo-n-e Mensch pro Johr derft verdiene, egal wo und wievyyl är/sie schafft?
So gege die fufzig Millione, also ebbe zäh Prozänt me als ich.
15. Was nimmsch mit uff e-n-ainsami Insle?
E Waggis. Do wirds mir sicher nid langwielig.
16. Wär odr was bringt di sofort zem lache?
E Interview mit em Gilbert am Schwizer Färnseh. Eso viel Eleganz gepaart mit eme absolute Fachwüsse über dr Wältfuessball, das gits jo gar nid.
17. Letschti Froog, Hand uff's Härz: wäm wurdsch du die Frooge am liebschte zem beantworte gäh?
Wie wärs mit eme Mensch, wo nüd am Huet het mit Fasnacht, GC- und Zäd-Fän isch, im Golfe nur mässig mit Talänt gsägnet, sünsch aber e sauglatte Kärli isch? Ok, do muesch halt e chli recherchiere. Aber es git sicher eso eine uf dere Wält.