d'Striggede

Ibr d’Striggede duet me vyyl schnäädere in unserm Dorf am Rhyy: Schnaabelbryys, Uffdritt bym SVP Parteydaag, Uffdritt bi Giaccobbo Müller, Wahlg(r)ampf („Basler wählen...“) – und drnoo wird ene nadyrligg alles um d’Ohre ghaue wenn’s emol nit lauft („was wott dr Karli z’Bern, dä wähle jo nit emol d’Riechemer“).

Abr ains dunggt ys Waggis scho e chli gspässig. Me kha dängge was me wott, abr mir hänn immr gmaint Fasnacht syg gläbti Toleranz (usser gäge uns Waggis nadyrligg, mir sinn nyt und kenne nyt). Fasnacht isch ämmel die Zyt wo me enander duet zueloose, sich duur e Gaggo zieht und aifach Fraid hett wenn das ebber guet kha, non? Odr aifach gueti Bängg singt, und zwor nit ersch jetz, scho syt dr Fasnacht 1979. Dr Refrain, e Glassiger: “Und yyneschtäche, ummeschloo, duurezieh und aabeloo”, jedes Johr uff hoochem Niveau – was gitt’s drnoo z’schnäädere ass d’Striggede jetz am Färnseh singe und und und? Guet, die Bängg bim Giaccobbo sinn vyyl z’braav gsi, abr so hänn ämmel au die arme Ziircher ebbis zem lache kha – also worum dä Fueternyyd?

Abr isch jo egal. Me kha’s au eso gseh: uffem Olymp vo de Schnitzelbänggler bisch ersch wenn de in andere Schintzelbängg duesch figuriere, ämmel eso:

 

S Blochers kaufe s Basler Läggerlihuus aifach ewägg.

Das wurmt ys zimmlig und mir saage s lutt: We want it bägg.

Mer löön ys au nit lumpen und mir biete s Blochers aa:

Ihr könntet als Ersatz und koschtelos dr Karli Schwyzer haa.

(Bajass Clique, Fasnacht 2008)

 

Am Parteidaag vo dr SVP isch Gott sei Dangg
d Striggede gange als Schnitzelbangg.
Sy hän kaini spezielle Värs miesse mache:
s isch jo doch der Blocher, wo sait, wenn lache.
(Fäärimaa, 2008)

 

Odr isch es vyllicht aifach eso ass mer innere Nyydgsellschaft lääbe und me sich dr Nyyd in unsrem Land muess vrdiene? Mr saage jo, will niemer weiss das besser wie die wo erwiisenermaasse die beschte sinn, also mir Waggis.

Also do wär d’Striggede, mit emmene Bangg wo’s jedem (usserhalb vo Bärn) warm wird ums Härz: dr Bangg-Glassigger zer FCB Maischtrfyyr (ACHTIG: diend bitt uffbasse wie die immr uff e Zeedel luege):

 

 

Also, uff was luege die bittscheen? Die hänn ibr 30 Johr Erfahrig uffem Buggel und sette by Goscht nimmi spigge, odr?

Mir hän beschti Kontäggt in d’Szene und hänn die schaamloos azapft. E Kolleeg (muess anonym blyybe) hett mit sym Iphone e gleine Schnabbschuss kenne mache, wo aidytig bewyyst was uff däm Zeedel vo dr Striggede stoht – s’Resultaat hett ys umghaue.... abr zersch loose mer no was dr Karli und dr Ricky z’saage hänn by Hand uffs Härz, d'Uffleesig vom Spiggzeedel folgt drnoo.

 

Und zewei…

 

1. Was isch dy ydriggligschti Fasnachtserinnerig?

KARLI: E wohry und fir my yydrüggligi Hyylgschicht :Am Samstig vor dr Fasnacht 1986 han ich e Delifon griegt von ere Dame, wo het welle mit em Banggchef vo dr Striggede rede. Ich ha nid gwisst um was es goht. Do sait sie: "Loose sie ich ha e speziells Aaliege. My Ma liggt im Kantonsspital am Stärbe und är het mir hit am Morge gsait, ass är jetzt viellicht jo nid emool meh d Striggede an dr Fasnacht heere kennt..! Isch das unverschämt, wenn ich Sie bitt, ihm viellicht s letschd Mool am Spitalbett e Fraid zmache und dr Bangg z singe?" Spontan hän mir zuegsait und sin am Sunndig Nomidag vor dr Fasnacht an das Spitalbett koo, won e Ma an Schlych ghange und im Bett glägen isch. Mer hän ihm im Bysii vo einige Frind und verwandte unsre Bangg gsunge. S isch e komischi und fascht morbidi Stimmig gsih in däm Zimmer, aber schynbar hän sich alli irgendwie in däre schwierige Situation doch sehr gfrait !  Dr Ma im Bett het nimm gross kenne reagiere. Aer isch ruehig dert glääge. No sin mir wieder abzottlet mit eme grosse Danggerscheen vo dr Frau, wo mir aaglytte het. Am Fasnachtsmittwuch isch denn d Doodesaazaig in dr Zyttig gsih!

E wohri und yydrüggligi Schmunzelgschicht: Am Fasnachtsmittwuch 2009 bin ich mit aim vo myne andere Kollege ebbe am halber elfi znacht iber die Mittler Brugg gloffe. Die andere zwai sin scho voruss gange, denn mir hän am elfi znacht in dr Saffere miesse im Saal singe. Do pletzlig stoht e 6 jehrige Bueb in ere Waggisbluse an dr Hand vo dr Grossmamme mit em Grossbabbe und synere Mamme vor mir. Dr Bueb streggt d Handuus und rieft : "Stop, gäll, Ihr sin d Striggede?" No han ich gsait, jä wohär waisch denn Du das ? Do sait är: "Jä, dasch aifach, Euch kenn ich scho syt i ka laufe." Denn han ich gsait: "Jä kasch Du denn au dä Refrain singe?" Und är sait:"Klar !". No han ich gsait, also, zieht jetzt emool my Larven aa und sing mir en vor!" Dr Bueb het das gmacht und het gligglig glacht. Druffaabe han ich gsait: "Du aber loos, jetzt isch es aber scho spoot, do gib ich Dir no e paar Blagedde, Zeedel und e paar Däfeli, die het mir hit zooben e Waggis gäh ! Ich winsch Euch alle non e scheeni Fasnacht!" Mer hän ys no zuegwungge, bis mir ys in dr Mängi nimm gseh hän und mir sin in d Saffere. Noch ebbe aim Joor kunnt my domols 7-jehrigi Dochter uss dr Schuel haim und sait:"Papa, loos, bi mir isch e Bueb in dr Klass, dä het mir gsait, är kennt Dy als Striggede vo dr Fasnacht ! S isch genau dä Bueb vo dr Mittlere Brugg gsih !  

RICKY: Vor drey Joor zieht mer am Barfi e glaine Bueb am Rockzipfel, woni aigentlig fascht nid gseh hät unterem Goschdym. Är het mer e Dääfi gä und gsait: Ihr sin no guet, i ha euch geschtern am Färnseh gseh…Das het mi dermasse griert, ass em grad spontan e Kindervärs ha miesse singe…

 

2. Was ka dy an dr Fasnacht närve?

KARLI: Alli die, wo kai Spass verstehn !

RICKY: Zvyyl Regle!!! Nyyd und Missgunscht isch au unfasnächtlig

 

3. Welli drey Wörtr falle dir zem Begriff „Waggis“ spontan ii?

KARLI: Schnuure, Räppli, Rätsche !

RICKY: Blauwissi Hemli, Naase, Dääfeli und stopfe

 

4. Sell d’Waggis-Naaselengi vom Fasnachts-Comité reguliert wärde? (falls jo, uff wie lang maximal?)

KARLI: Uff jede Fall.... Z langi Nase sin e Sicherhaitsproblem....
RICKY: Uff alli Fäll. Am Beschte in Zoll oder inches, ass gar Kain me drusskunnt.

 

5. Basel ohni Fasnacht isch wie …. ?

KARLI: S Lääbe ohni Liebi ....

RICKY: Vanillecrème ohni Öpfelstrudel…

 

6. Was bringt di so richtig uff’d Palme?

KARLI: Wenn my ebber aaliegt oder my menschlig entdyscht !

RICKY: E Gfühl vo Machtlosigkait. Wenn de muesch zueluege, ass alles in d Hose goht und nüd drgäge khasch mache…

 

7. … und ibr was kasch dy eso richtig froie?

KARLI: Ich frai my an dr Fasnacht bsunder an glungene Costym und tolle Sujets vo Clique, gaischtryyche Waggis und Bombebängg !
RICKY: Über e 8 zu 0 gege dr FCZ!

 

8. E liebs Familiemitgliid schänggt dir zem Geburtsdaag e FCZ-Saisonabo – was machsch?

KARLI: Ich gang an d Mätsch und sag Danggerscheen !

RICKY: Enterbe und s Abo zruggää!

 

9. Wenn Ziiri ‚Downtown Switzerland’ isch, no isch Basel… ?

KARLI: Top of the roof !

RICKY: Dr Späckgürtel, wo dr Gschmagg drinn isch…

 

10. Was isch fir di dr scheenschti Ort z’Basel?

KARLI: S Dreyeck Spalebärg – Schnydergass - Rümmelinsplatz ! 

RICKY: Am Schaffhuser-Rhywäg bi Sunneschyyn oder uff dr Terrasse vom 3 Keenig!!

 

11. Was wurdsch an Basel - odr an dr Schwiz - sofort ändere?

KARLI: D Styyre sängge, d Verwaltig reduziere uff s absolut neetigschti und Rauche und s Nidrauche in de Baize suuber reegle, ass baides meeglig isch!

RICKY: E baar gueti Kepf in dr Regierig wurde nid schaade, und s rauche wurdi wider erlaube…

 

12. Mit wellem Mensch (ob lebändig odr nit) wottsch du gärn emol znacht ässe?

KARLI: Mit dr Michelle Hunziker und dr Nubya am beschte grad zämme !

RICKY: Mitem Nostradamus, damit emol waiss, was dä für Droge gno het…

 

13. ... und was wurdsch du die Person ganz sicher frooge?

KARLI: Alles, aber nid s Geburtsdatum....
RICKY: Wie isch das mit dr Fasnacht 2013…gits aini?

 

14. Was isch fir di dr Maximallohn wo-n-e Mensch pro Johr derft verdiene, egal wo und wievyyl är/sie schafft?

KARLI: Zahlemässig wott ich my nid feschtleege. Aer muess sich durch d Laischtig rächtfertige loo und sott in ere gsunde Relation zem Unternähmenserfolg stoh. Aer darf doderby hoch aber nid völlig überdriebe und au dodermit wohrschiins nid grächtfertiget sii !
RICKY: Soviel, ass är kai schlächts Gwisse miesst ha. S Problem isch, ass me ab eme gwüsse Zytpunggt kai Gwüsse me het…

 

15. Was nimmsch mit uff e-n-ainsami Insle?

KARLI: My Frau und myni Kinder !

RICKY: E Boot, mi Familie und vyyl Sunnecrème

 

16. Wär odr was bringt di sofort zem lache?

KARLI: Guete und gaischtryyche Humor. 
RICKY: Dick und Doof, dr Harald Schmidt, wenner in Form isch…

 

17. Letschti Froog, Hand uff’s Härz: wäm wurdsch du die Frooge am liebschte zem beantworte gäh?

KARLI: Myne liebe Mit-Striggede-Frind André, Ueli, Hannes und Ricky. 

RICKY: Em Kim Jong Un!

 

 

Also danggerscheen, liebi Karli und Ricky, und do wär no wie vrsproche dr Spiggzeedel:

 

 

Hejo drnoo – nobody is perfect, nit emol wenn se vorem Blocher und em Giaccobbo derfe singe!