d'Schlyffstai

 

  - bi Schnitzelbängg gitt's in dr Regl e kai Rahmeteggschtli -

 

Grund: mir hänn d'Erfaahrig gmacht ass Schnitzelbängglr, mit ganz weni Usnahme (siehe Staffle 2), ihri Privaatsphääre wänn bewahre (si sinn au e rächti Herusforderig zem ussfindig mache und kontaggtiere).

Mir reschpeggtiere das, Ehresach, und saage eifach eso Danggerscheen!

 

 

 

1. Was isch dy ydriggligschti Fasnachtserinnerig?

Do git's natirlig einigi. Wunderscheen isch emolle en Uftritt im Primidoofe-Käller gsy, wo aifach ALLES gschtimmt het. Am Schluss hän alli nomolle welle dr eint Värs höre und hän zum Teil schon kenne mitsinge. Gigantisch! 

2. Was ka dy an dr Fasnacht närve?

Im Grundsatz finde mir alles super. Fir uns als Bangg isch es halt alben e bitz ergerlich, wenn mir grad am Singe sin, und dusse wärmt sich e Guggen-yy. 

3. Welli drey Wörtr falle dir zem Begriff „Waggis“ spontan y?

Waage, Elsass und Rotwyy 

4. Sell d’Waggis-Naaselengi vom Fasnachts-Comité reguliert wärde? (falls jo, uff wie lang maximal?)

Uf gar kai Fall. Denn nur so kenne mir sicherstelle, as mir dr Luzärner Fasnacht immer e Naselengi wärde vorus sy. 

5. Basel ohni Fasnacht isch wie …. ?

E megaspannende Fuessballmatch oni Gool. Es isch immer no e vollgeili Sach, aber dr ultimativi Adrenalinpush hett denn halt doch gfählt. 

6. Was bringt di so richtig uff’d Palme?

Rassismus, Sexismus und Xenophobie an der Fasnacht.  

7. … und ibr was kasch dy eso richtig froie?

Iber jede, wo kunnt und sait, as ihm e Zwüschepointe oder e näbesächligs Wortspiil am beschte gfalle het. 

8. Beschriib ys bitte emol d’Fasnacht in dyne schlimmschte Alpträum.

E Fasnacht oni Schnitzelbangg-Kultur. 

9. Was wär dr Menschheit vrloore gange wenn’s di nit gäbti?

Dr eint oder anderi saugueti Värs, hoffe mir, natirlig ;-) 

 

10. … und was bitte wär dr Menschheit erspaart woorde wenn’s di nit gäbti?

Dr eint oder anderi obermiisi Värs, laider! ;-)

 

11. Was wurdsch an Basel - odr an dr Schwyz - sofort ändere?

In Basel: Alli Regierigsgwalt de Schlyffstai.
In der Schwyz: Obligatorische Värslibrunz-Unterricht für alli Schieleri bis ins Gymi.

12. Mit wellem Mensch (ob lebändig odr nit) wottsch du gärn emol znacht ässe?

Mit em Mani Matter - will är schlicht dr beschti vo allne Värslibrinzler gsi isch. RIP, liebe Mani. 

13. … und was wurdsch du die Person ganz sicher frooge?

Gar nyt frooge. Nur aifach bewundernd zuelose. 

14. Was isch fir di dr Maximallohn wo-n-e Mensch pro Johr derft verdiene, egal wo und wievyyl är/sie schafft?

Eppe 500'000 Frangge für alli im Bangge, Versicherigs- und ähnligem Gwärb, und e Million fir alli andere Lytt. 

15. Worum sött e Waggis Stadtpresidänt wäärde?

Är ka problemlos apéröle und drnooch immer no gueti Rede schwinge.... Momänteli emolle... aber das macht unsere Stapi doch eh scho! Isch är ächt am Änd e Waggis incognito?! 

16. Wär odr was bringt di sofort zem lache?

Wenn e Bänker sait, är heigi si Bonus ehr und redlich verdient.

17. Letschti Froog, Hand uff’s Härz: wäm wurdsch du die Frooge am liebschte zem beantworte gäh?

Unserne sibe Regierigsrööt.