Christoph Bürgin, Obmaa Fasnachts-Comité

 

1. Was isch dy ydriggligschti Fasnachtserinnerig?

My Geburt

 

2. Was ka dy an dr Fasnacht närve?

Betrunggeni und aggressivi Zivilischte, vor allem vor em Morgestraich.

 

3. Welli drey Wörtr falle dir zem Begriff „Waggis“ spontan ii?

E feyns Gedrängg (s dörfe jo nit me als drei Wort sii)

 

4. Sell d’Waggis-Naaselengi vom Fasnachts-Comité reguliert wärde? (falls jo, uff wie lang maximal?)

Mr diskutiere das all Joor und wärde bald drüber entscheide. Es hängt no ab, ab weller Lengi d Larve vom Kopf fallt. Für das lauft e Uftrag bim physikalische Institut.

 

5. Basel ohni Fasnacht isch wie …. ?

E Fuessballmatch ohni Balle.

 

6. Was bringt di so richtig uff’d Palme?

E wilds Tier, wo mr nochrennt.

 

7. … und ibr was kasch dy eso richtig froie?

E unfallfreii, sunnigi und fridligi Fasnacht, mit e huffe tolle Begegnige und alli saage – nägscht Joor wider.

 

8. Beschryyb ys bitte emol d’Fasnacht in dyne schlimmschte Alpträum.

E Fasnacht, wo am Morgestraich us Sicherheitsgründ s Liecht nit dörf abgmacht wärde.

 

9. Was wär dr Menschheit vrloore gange wenn’s di nit gäbti?

Dr 11. Obma vom Comité wurd anders heisse, vilicht wärs denn die erschti Obfrau gsi.

 

10. … und was bitte wär dr Menschheit erspaart woorde wenn’s di nit gäbti?

Das muess me die frooge, wo dääglig mit mir z due hän.

 

11. Was wurdsch an Basel - odr an dr Schwyz - sofort ändere?

I wurd all die ewige Nörgeler, bruefsmässige Stänkerer und prinzipielle Neisager, wo nie konstruktivi Vorschlag hän, an d Gränze stelle (frogt sich nur an welli).

 

12. Mit wellem Mensch (ob lebändig odr nit) wottsch du gärn emol znacht ässe?

Mit em Obama.

 

13. … und was wurdsch du die Person ganz sicher frooge?

Wie kam e bi dääne Probleem, won er sött lööse, no schloofe?

 

14. Was isch fir di dr Maximallohn wo-n-e Mensch pro Johr derft verdiene, egal wo und wievyyl är/sie schafft?

Das losst sich nit beziffere. Leider könne die, wo so übermässigsauvyyl verdiene, wohrschynlig sehr guet schloofe.

 

15. Worum sött e Waggis Stadtpresidänt wäärde?

Will er könnt witzigi Reede halte.

 

16. Wär oder was bringt di sofort zem lache?

Dr Simon Enzler im Tabourettli.

 

17. Letschti Froog, Hand uff’s Härz: wäm wurdsch du die Frooge am liebschte zem beantworte gäh?

Öberem wo Zyt het und sich die au nimmt.