Christoph Brutschin
d Bâlaari hänn jo e gwüssi Affinität zue unsere Polytiggr (Waggiswahlkampftschegg 2011, Ylaadig vo dr Anita Fetz ins Bundeshuus 2012) – aber wie mr uff dr mag. et lic. rer. pol./Betriebsökonom HWV Christoph Brutschin, Vorsteher vom Department für Wirtschaft, Soziaals und Umwält, kho sinn, dasch nomol e ganz en anderi Gschicht.
Basel, Herbscht 2012: es herrscht Wahlkampf! Und das am Vater-Tochtr-Taag. Also goht dr Däni S. mit synere eltere Tochtr ammene Mittwuch morge ins Büro, ass si au weiss wo-n-är schafft (odr, wemme s genau nimmt, ass si weiss ass är übrhaupt schafft). Die zwei fahre mit em 15er an Bahnhof und wo si am Tellplatz usstiige, do stoht dr Regierigsroot Christoph Brutschin scho parat, mit rote Serviette und früsche Gipfeli und d Tochtr isch hin und weg. Also wie dr Babbe das gschafft hett, dä fründligi Herr mit dr runde Brülle uffzbiete zem ere s Zmorge am Tellplatz z serviere!
Drei Dääg spötr, widr am Tellplatz: dasmol kunnt dr Däni S. mit syne Binggis vo de Kommissioone retour und lauft zmitts in e Infostand vo dr SP. Und wär stoht dört? Widr dä fründligi Maa mit dr runde Brülle. Dasmol gits Windreedli, d Kindrauge lüchte und me schwätzt e chli mit de Grossrööt und Parteignosse etc., und nadürlig au mit em Herr Regierigsroot (me kennt sich jo jetz). Und uffs mol frogt d Tochtr ob dä lieb Herr wo ihre allewyyl Gschänggli git am Tellplatz wohnt. Nei, nei, meint e fründlige Grossroot, abr s gfallt em halt schampaar guet im Gundeli. Und dr Däni S. hett widr mol d Waggisgrangget (Schnuure uff, Hirni ab) und seit: „Weisch Schätzeli, es isch Wahlkampf – nimm jetz gschyydr was är dir git, drnoo gsehmr en 4 Joor nüm.“ Und es wird still am Infostand, d Grossrööt und Hälfr wärde bleich. Und dr Christoph? Ruggt sich d Brülle zrächt, luegt dr Däni S. a und foht afo lache – eso lut ass die Herre uffem Bänggli uffhööre übr dr Silvio Berlusconi z diskutiere und am andere Ändi vom Tellplatz d Tuube wägfliege...
Und syni Antworte hett är im Fall noch saage und schreibe 28 Minute ygreicht – schnällr isch numme eine gsi (richtig, dr Christian Miesch vo dr SVP am Waggiswahlkampftschegg 2011 – do söll nomol ein saage, die syyge nit volggsnoch).
1. Was isch dy ydriggligschti Fasnachtserinnerig?
Als glaine Knirps uff de Schultere vom Bappe
2. Was ka dy an dr Fasnacht närve?
Dass sie so schnäll verbi isch..!
3. Welli drey Wörtr falle dir zem Begriff „Waggis“ spontan ii?
Räppli, Orangsche, Mimösli
4. Sell d’Waggis-Naaselengi vom Fasnachts-Comité reguliert wärde? (falls jo, uff wie lang maximal?)
Sicher nit!
5. Basel ohni Fasnacht isch wie …. ?
Telebasel ohni Dany vo Wattewyl
6. Was bringt di so richtig uff’d Palme?
Lütt wo nit d' Woohret saage
7. … und ibr was kasch dy eso richtig froie?
ä Cortege bi Suuneschiin
8. Beschryyb ys bitte emol d’Fasnacht in dyne schlimmschte Alpträum.
Ich schloof traumlos - wenigstens bis hütt!
9. Was wär dr Menschheit vrloore gange wenn’s di nit gäbti?
ä baar blödi Sprüch...
10. … und was bitte wär dr Menschheit erspaart woorde wenn’s di nit gäbti?
au ä baar blödi Sprüch...
11. Was wurdsch an Basel - odr an dr Schwyz - sofort ändere?
Abschaffig vo allne Bedenggeträäger (s'hoggt hinter jedem Stai mindestens ein - dunggts mi wenigschtens)
12. Mit wellem Mensch (ob lebändig odr nit) wottsch du gärn emol znacht ässe?
Mit äm Didier Drogba
13. … und was wurdsch du die Person ganz sicher frooge?
Wie me soo guet kha schuutte und derbi so bös luuege.
14. Was isch fir di dr Maximallohn wo-n-e Mensch pro Johr derft verdiene, egal wo und wievyyl är/sie schafft?
Verdiene isch's einti, bikoh s'anderi..! Also, punggto verdiene sott ä Kischte doch eigentlich auch für die ganz Guete länge, nit?
15. Worum sött e Waggis Stadtpresidänt wäärde?
Also, ich bi zfriede mit unserem - aber villiecht kann er selber Waggis wärde, was meinsch?
16. Wär odr was bringt di sofort zem lache?
Dr Gerhard Polt
17. Letschti Froog, Hand uff’s Härz: wäm wurdsch du die Frooge am liebschte zem beantworte gäh?
Äm Isaac Reber, das isch ä Glatte.