Christoph Blocher
„Dr Christoph Blocher kunnt uff d’Bâlaarisyyte“ (2 Sekunde Pause)
„Jä, ebbe dä Christoph Blocher?“
„Das gitt’s nit.“
„Das glaub y nit.“
„Hesch widr z’dief ins Glas gluegt?“
„Jo und an Wiehnachte kunnt dr Oschterhaas.“
No nie hänn mer eso vyyli ebbis nit glaubt (odr dänggt es syg e Marketing Gag - als wurde mer das bruche, abr hallo!). Dr Christoph Blocher und dr Bâlaari, Herrlibärg und Gundeli, SVP-Grande und Waggisrueche, Alt-Bundesroot und Fasnacht vo unde… jä wie bim hailige Bimbam goht das zämme?
Also, zersch emol: är es isch es wirgligg und dr Christoph hett die Frooge hegschtperseenligg beantwortet. Es isch e langi Gschicht wie’s ze däre spezielle Hand uffem Härz koh isch, die Waggis-Maischterlaischtig verzell y en andermol, abr ych erklär eych gärn worum e rächt wohlhabende Ziircher SVP-ler, nit grad s’Zyylpublikum vommene Waggis *wurd me maine*, uff dr Bâlaarisyyte glandet isch. Meegligi Grind: Nöchi zer SVP? Also das hett mer no niemer ungstrooft untrstellt. Gältigsdrang und billigi Publicity? Das hänn weder dr Bâlaari no dr Christoph neetig, merci vyylmol. Sympathie fir Basel und dr Waggis? Scho ender (Antwoorte 1 und 5) und wemme gseht wie hüffig dr Alt-Bundesroot do z’Basel isch (an dr Première vom Pfyfferli zem Byspyyl), no muess me bi ihm aifach e gwissi Neechi zue unsrer gliebte Stadt vrmuete, eventuell au zu dene Papierfötzel wo mir do ganz gfitzt als „Zytig“ vrkaufe (abr das isch my Spekulatioon). Odr isch är ächtsch in Dunschtkrais vo dr Frau Fasnacht groote will är sälbr scho Fasnacht gmacht hett? Hmmmm…
Jetz wird’s interessant, wie immr wenn d’Wohrhet ans Liecht kunnt. Dr Christoph isch scho mänggi mol an dr Fasnacht gsi (als Passive) und aimol, bitte aanehogge, au als Aggtive. Und die Gschicht goht eso: e befrindete SVP-noche Basler Baizer (blybt anonym) hett ihn yglaade und ihm e Goschdym, e Laarve und Reggwisite drzue organisiert. Und als Laarve hett är sich ebbis glatts loh yfalle: dr Kopf vom Alt-Bundesroot Adolf Ogi… Jetz lauft dr Christoph also als aggtive Fasnächtler dur Basel, goschdymiert als Ogi, e paar Waggis wänn mit ihm intrigiere und aine sait „He Ogi, jetz zieh-n-emol di Laarve ab y vrstand di nit.“ Und in dr lange Gschicht vo dr Fasnacht sinn Waggis no nie so still gsi wie wo die Laarve denn ewägg gsi isch… no nie isch „gäll de kennsch mi nit“ aggtuellr gsi.
Also, dr Christoph isch aifach do drby will är au scho aggtiv z’Basel Fasnacht gmacht hett (was au erklärt worum är e kai Angscht hett vorem Waggis) … und ibrigens: wisst ihr wär sich em Christoph sy Hand uffs Härz gwunsche hett, wärdeliwär? Dr Schorsch vom Haafebeggi II.
Also, do wäre syni Antwoorte:
1. Was isch dy ydriggligschti Fasnachtserinnerig?
De Waggis seit zu mir: "Sedo, häsch es Tääfeli, chasch au nyt drfyr das d'uusgsesch wie de Blocher."
2. Was ka dy an dr Fasnacht närve?
Das d'Fasnacht au no es Zentralkomittee brucht.
3. Welli drey Wörtr falle dir zem Begriff „Waggis“ spontan y?
Luschtig, geischtrich, e chly ällei
4. Sell d’Waggis-Naaselengi vom Fasnachts-Comité reguliert wärde? (falls jo, uff wie lang maximal?)
Ja, minimum nünzg Santimeter, maximal ein Meter zäh.
5. Basel ohni Fasnacht isch wie …. ?
.... de Dezember ohni Wiehnacht.
6. Was bringt di so richtig uff’d Palme?
Mich bringt nüt uf Palme, mir händ dihei nur Tanne.
7. … und ibr was kasch dy eso richtig froie?
E gueti Schnitzelbank, wie die vom Schorsch vom Haafebeggi II.
8. E liebs Familiemitgliid schänggt dir zem Geburtsdaag e FCZ-Saisonabo – was machsch?
Ich schänk's mim Enkel.
9. Wenn Ziiri ‚Downtown Switzerland’ isch, no isch Basel… ?
.... de Vorort vo Züri.
10. Was isch fir di dr scheenschti Ort z’Basel?
S'Münster.
11. Was wurdsch an Basel - odr an dr Schwiz - sofort ändere?
Z'Basel weniger Linggi und i de Schwiiz meh Rächti
[Amerggig vo dr Redaggtioon: dr Christoph hett e offeni Ylaadig zem Fondue im Schoofegg (und zem Apéro nadyrligg au), do unterhalte mer ys gärn emol binnere Fläsche Wysse odr zwai driber.]
12. Mit wellem Mensch (ob lebändig odr nit) wottsch du gärn emol znacht ässe?
Mit emene echte Elsässer Waggis.
13. … und was wurdsch du die Person ganz sicher frooge?
Chunsch gern uf Basel?
14. Was isch fir di dr Maximallohn wo-n-e Mensch pro Johr derft verdiene, egal wo und wievyyl är/sie schafft?
E soviel wie n'em irgenden Dummchopf wott zahle.
15. Was nimmsch mit uff e-n-ainsami Insle?
Niemert, susch wär ich ja nüme einsam.
16. Wär odr was bringt di sofort zem lache?
En guete Schnitzelbänkler, aber det erscht nach de Schlusszyle.
17. Letschti Froog, Hand uff’s Härz: wäm wurdsch du die Frooge am liebschte zem beantworte gäh?
Em Dimitri, de redt ja nöd.
Dr Dimitri vrsuech y nadyrligg ainewääg z’ibrrede (au wenn y nit waiss ob sy Ziiridytsch so guet isch…. abr vyllicht antwortet är jo uff italiänisch odr grad pantomimisch)