Bernhard Heusler

Welches sind die drei wichtigsten Gründe für Erfolg im Leben?

“’Erfolg im Leben’ scheint mir ein sehr relativer Begriff. Insofern ist es unmöglich, Gründe dafür zu nennen. Wenn ich es dennoch versuche: Erfolg resultiert wohl aus der Quadratur von Einsatz, Können, Freude und Glück.”

 

Y ha mi als Waggis grad agsproche gfiehlt wo-n-y em Bernhard sy Antwort im NZZExecutive vom 12. Meerze 2011 glääse ha. Ysatz, Fraid, Kenne und Gligg – genau das bruchsch zem erfolgryych Waggis wärde und dy duuresetze in dr piggelharte Fasnachtswält. Und wo drnoo im Rotblau vom Hornig 2011 33 indiskreeti Frooge an Bernhard Heusler gstellt worde sinn ha-n-y gwüsst, das isch e Draumkandidaat fir Hand uffs Härz.

 

Numme hett’s bi mym hehre Unterfange ai glai Probleem gäh: dr Bernhard isch Vizepresi (syt 2006) und Verwaltigsrootsdelegierte (syt 2009) bim FCB; är laitet dr greescht und beliebtischt Verain vo dr Schwiz mit ibr 160 Agstellte und emmene Budget von 57 Millioone (2010). Wenn’s ihm nit grad langwyylig wird, no isch är Rächtsawalt und Partner innere beditende Wirtschaftskanzley und drzue bi andere Firmene im Vrwaltigsroot. Pro Wuche beantwortet dr Bernhard gschetzti 300 Emails, pro Daag kemme 10 Afrooge vo Agänte wäge FCB-Spilr, neye und alte. Also, ihr mien vrstoh, do hämmer niemer wo dr ganz Daag an sym Blackberry hoggt, nit z'due hett und uff en Email vom Waggis wartet ...  

 

… abr nadyrligg ain wo ainewääg poschtwändend antwoortet und zuesait! Und zwor eso ass y zersch gmaint ha är haig mi verwäggslet und agno är wurd mi kenne, eso vrtraut und härzligg isch sy Antwoort gsi. Do kunnt e langi Email zrugg, aber gärn machi är das au ohni grossi Erfahrig im Baseldytsch schryybe. Drnoo hämmer ys in e paar Emails ustuscht ibr die moralischi Bedytig vo dräggige Siig im Fuessball, dr Märtwärt vo Spiilr und ihri Bedytig fir d’Regioon, ibr ‘bad guys’, Reschpäggt und Bessrwisser in dr scheenschte Näbesach vo dr Wält, ibr Mitmensche wo de aifach nie alles kasch rächt mache (ussr de gwinnsch jede Match 6-1, holsch's Double und d'Champions League en passant) abr au denn no öbbis z'kritisiere hänn: z'vyyl Ussländr, z'weni hoche Sogge, dr Raase z'grien, d'Sunne z'hell... und und und. Es isch e aregendi und spannendi Sach worde – also, wenn y nit sit 1982 scho FCB-Fan wär, no wär y’s spötischtens noch em Hand uffs Härz mit em Bernhard.

Also, do hätte mer d’Antwoorte vom FCB-Vizepresi, uff Baseldytsch au wenn ihm das nit eso vrtraut gsi isch (und är hett so au grad no d’Chance ibrkoh, en Antwoort z’korrigiere wo ihm im Rotblau e chli piinligg gsi isch: e Blackberry mit uff die ainsami Insle… abr he).

Und s’wichtigschte:

MER GRATULIERE ZEM 14. MAISCHTERTITEL, JAWOLL!!!!

 

1. Was isch dy ydriggligschti Fasnachtserinnerig?

“Morgestraich Vorwärts Marsch” vom Dambuurmajor, woni als 8-jöhrige Vorträbler bi de Schnoogekerzli ygschtande bi.

 

2. Was ka dy an dr Fasnacht närve?

Räppli-Wyrf ins Gsicht vo ‘Fasching-Bemoolte’ Halbwüchsige am Zyschtig nomittag.

 

3. Welli drey Wörtr falle dir zem Begriff „Waggis“ spontan y?

Kinderzeichnig, erschti Larve, Saublootere

 

4. Sell d’Waggis-Naaselengi vom Fasnachts-Comité reguliert wärde?

Nei! Was natirligg wachse duet, sell nit au no reglementiert wärde.

 

5. Basel ohni Fasnacht isch wie …. ?

Basel ohni FCB.

 

6. Was bringt di so richtig uff’d Palme?

Allgemein: Arroganz und Intoleranz. Bim FCB: Mensche wo vergässe hänn, dass s’Verliere zum Sport ghört und ihr ‘Fan-Syy’ so verstöhn, dass si bi Sieg vom FCB e grossi und bi Niederlaage e dummi Schnuure ha könne.

 

7. … und ibr was kasch dy eso richtig froie?

Ibr die kollektivi Begeischterig, wo dr FCB in Basel usleese ka.

 

8. E liebs Familiemitgliid schänggt dir zem Geburtsdaag e FCZ-Saisonabo – was machsch?

Im Familiebiechli nocheluege, ob’s sich wirgligg um e Familiemitglied handlet.

 

9. Wenn Ziiri ‚Downtown Switzerland’ isch, no isch Basel… ?

… immer no d’Stadt vo mim Härze.

 

10. Was isch fir di dr scheenschti Ort z’Basel?

S’Joggeli und d’Pfalz.

 

11. Was wurdsch an Basel - odr an dr Schwiz - sofort ändere?

De Grieskrämer, Nyyder und Nörgler en erliechterets Usbirgerigsverfahre abiete.

 

12. Mit wellem Mensch (ob lebändig odr nit) wottsch du gärn emol znacht ässe?

Lionel Messi

 

13. ... und was wurdsch du die Person ganz sicher frooge?

Ob’s die puri Freud am Schutte isch, wo ihn befähigt, so genial und demüetig Fuessball z’schpiile ... und was er mit 30 vorhett (…).

 

14. Was isch fir di dr Maximallohn wo-n-e Mensch pro Johr derft verdiene, egal wo und wievyyl är/sie schafft?

Wenn ein sich dr Lohn nit sälber nimmt, sell er so viil bekoh wie er verdient. Wer ebberem meh git, als er verdient, isch sälber schuld.

 

15. Was nimmsch mit uff e-n-ainsami Insle?

E Boot mit zwei Rueder.

 

16. Wär odr was bringt di sofort zem lache?

D’Grächtigkeitstheorie-Lektioone vom Alex Frei.

 

17. Letschti Froog, Hand uff’s Härz: wäm wurdsch du die Frooge am

Em Markus Steinhöfer. Em schnällscht-integrierte Uslandprofi bim FCB vo allne Zyte: nach 8 Wuche in Basel scho im Vortraab vonere Stammclique.

 

[und em Alex Frei syni Grächtigkaitslektioone vrsuech y nadyrligg in Erfahrig z’bringe….]