Anna Rossinelli

 

Was kennt me nit alles schryybe ibr d’Anna? Stroossemusikantin, grandioosi Usstrahligg und tolli Stimm, drey Dääg vor Abgabeschluss agmolde fir dr Grand Prix Eurovision, sensationell gwunne, Halbfinaal, Finaal, das gschafft wo dr DJ Bobo numme draime kha drvoo, neyi Blatte ”Bon voyage” – abr das stoht jo alles in dr Schwizr Iluschtrierte, dasch jo nim spannend.

Vyyl spannendr isch, was d’Bâlaari mit dr Anna vrbindet, will naimeduure simmer aigentligg numme wäge dr Anna kompletti Waggis. Richtig, d’Anna hett ys dr letschti Schliff gäh. Wie das setti go, duet’s eych gwundere? Also, die Gschicht goht eso: wo dr Beni und dr Däni agfange hänn zämme Fasnacht mache, do hett em Beni sy Nonna, d’Rosamaria, ys zue sich yglaade. Noch acht Espresso in ihrer 2-Zimmrwohnig am Bläsiring hett si uns tanti auguri gwunsche und in d’Egge vom Wohnzimmer zaigt, wo-n-e grosse (10kg) Sagg Räppli paraat gstande-n-isch, rosa, als Gschängg fir unseri erschte drey Dääg. ”Grazie, nonna”, hett dr Beni gsait, bacio bacio bacio, ”sei il nostro angelo, senza di te non siamo niente!” Und drnoo simmer gange und wo mer an dr Fäldbärgstroos uff s’Drämmli gwartet hänn, do hämmer ys gfrogt was mer mit däm Glump mache selle. Keine hett Bschaid gwisst. Mer hänn d’Räppli an d’Fasnacht mitgno, will me das eso macht als Waggis, s’isch au no heiss gsi und ys isch dr Schwaiss aabegloffe, und mer hänn nit gwisst wo ahne mit däm Guggus. Und immr wemmer hänn welle intrigiere, sinn alli aifach abgsegglet. Drey Dääg simmer mit em Sagg duur d’Stadt zooge, mer hänn’s in jede Källr miesse mitschlaigge, und noch em Ändstraich hämmer au no Lämpe ibrkho will wär hätt en s’ganze Johr sette laagere… So isch das gange Johr fir Johr. Immr widr hänn d’Myysli giggst ”achtig, die wänn di stopfe!”, mer hänn mit niemerem kenne schwätze - und mer sinn aifach nit druss kho und hänn’s nit tscheggt. ”Stopfe” - Was setti das ächtsch syy? Noch fimf Johr Fasnacht hämmer immr noni gwisst was mache mit däm Sagg.

Und drnoo hett d’Anna d’Antwoorte fir Hand uffs Hrz ygschiggt, und bi Froog 1 „Was isch dy ydriggligschti Fasnachtserinnerig?“ sait se „Ich wird öfter mol gstopft“. Mir sinn aifach numme bedupft gsi. Mer hänn ys agluegt und dr Beni hett gan langsaam gsait: „Du, Däni, ych glaub d’Anna waiss was stopfe isch – froog se doch emol, vyllicht sait si uns jo was mer selle mache mit däm?“ Und dr Däni hett dr ganz Muet zämme gno und schych agfrogt, und am 28.12.11, 19.02h, isch die erleesendi Email kho:

 

< Stopfe isch wen me vo de waggis voll räppli beschmisse gstopft wird. Chunsch drus? Liebs griessli anna >

 

Und drnoo isch s’Räppli kheit, und mir hänn’s tscheggt: Me nimmt Räppli in d’Hand und schiesst se umme odr STOPFT se ebberem in Graage, hejo mann! Und mer hänn gwisst, ass ys genau das no gfählt hett zem kompletti Waggis wäärde … botzdonner. Jetz simmer unschlaagbar.

Und wäge däm saage mir aifach numme ”Grazie, Anna”, bacio bacio bacio, ” sei il nostro angelo, senza di te non siamo niente!” Mer dangge dir fir dy Hilf, gäll saisch es niemerem, es wär ys scho e glai pyynligg, und mer fraaie-n-ys, dy am Apero uff dr Brugg z’gseh – mer zaige dir gärn was mir scho alles glehrt hänn!

 

 

1. Was isch dy ydriggligschti Fasnachtserinnerig?

Ich wird öfter mol gstopft

 

2. Was ka dy an dr Fasnacht närve?

Das es amigs äfach zkalt isch und de ganzi Matsch am Bode

 

3. Welli drey Wörtr falle dir zem Begriff „Waggis“ spontan ii?

Räppli, Larve und Wisswhy

 

4. Sell d’Waggis-Naaselengi vom Fasnachts-Comité reguliert wärde? (falls jo, uff wie lang maximal?)

-

 

5. Basel ohni Fasnacht isch wie …. ?

Fondue ohni Kääs

 

6. Was bringt di so richtig uff’d Palme?

Wenn dLüt aim im Trämmli nid ustige lön

 

7. … und ibr was kasch dy eso richtig froie?

Über e schöne warme Summertag

 

8. E liebs Familiemitgliid schänggt dir zem Geburtsdaag e FCZ-Saisonabo – was machsch?

Ich würds wohrschinlich mim Gitarischt - em Manuel - schänke

 

9. Wenn Ziiri ‚Downtown Switzerland’ isch, denn isch Basel… ?

-

 

10. Was isch fir di dr scheenschti Ort z’Basel?

Natürlich am Rhy

 

11. Was wurdsch an Basel - odr an dr Schwiz - sofort ändere?

Das me im Trämmli wider ässe cha und sRauchverbot wieder e bitz lockere

 

12. Mit wellem Mensch (ob lebändig odr nit) wottsch du gärn emol znacht ässe?

Mit em Freddy Mercury

 

13. … und was wurdsch du die Person ganz sicher frooge?

Alles über si Läbe

 

14. Was isch fir di dr Maximallohn wo-n-e Mensch pro Johr derft verdiene, egal wo und wievyyl är/sie schafft?

Ich fänd e agmässene Mindestlohn de besseri Asatz

 

15. Was nimmsch mit uff e-n-ainsami Insle?

Natürlich de Georg

 

16. Wär odr was bringt di sofort zem lache?

Lüt wo guet chöne anderi Dialäkt nochemache

 

17. Letschti Froog, Hand uff’s Härz: wäm wurdsch du die Frooge am liebschte zem beantworte gäh?

-