Anita Fetz

D’Anita isch uff allne Kanääl omnipresänt und me weiss vyyl übr se: dr Babbe hett e Elektrogschäft kha und dr gleine Anita ihr kauffrauischs Talänt gäh, drnoo Studium (wo dr Babbe ersch sy Placet gä hett wo-n-är ghört ass es (fasch) nüt koschtet), Kampf gege s’AKW Kaiseraugscht, POB-POCH und Frieh-Ikone vom Basler Feminismus, eigeni Buude und drnoo Widrystiig in d’SP, Ständeröötin – wo si mit ihre politische Gegner macht was se wott (das erklärt eventuell worum gstandeni Männr gryydebleich woorde sinn wo mr gseit hänn ass mr mit dr Anita Fetz eine gönn go näh).

 

Also die Gschichte sinn bekannt und mr vrzelle do e ganz en anderi: wie kunnt’s eigentligg ass usgrächnet d’Bâlaari eso guet mit dr Anita Fetz uskömme ass se ins Bundeshuus yglaade worde sinn? Unghobleti Waggisrueche und charmanti (abr piggelharti) Ständeröötin – wie hett das bitte agfange?

 

Also hätte mr do vorwiehnachtlig s’Määrli vo dr Anita und de Bâlaari:

 

Liebi uff en erschte Bligg ...

 

 

 

 

 

isch öbbis anders.

 

Im Friehlig 2011 hänn d’Bâlaari widr emol eini vo ihre gspunnene Ideee kha. E grosse Waggiswahlkampftschegg mit allne amtierende Nationaal- und Ständerööt/enne beider Basel (mit wältbewegende Frooge wie: „was isch dy wichtigschte Interpellation gsi für Waggis?“, „Worum sölle Waggis dy wähle – in eim Satz“). Und si hänn mitgmacht (dr Christian Miesch hett syni Antwoorte no 15 Minuute ygschiggt!), alli alli alli – numme eini nit; d’Anita hett unseri Emails eifach ignoriert. Und will d’Anita halt nit niemer isch, hänn d’Bâlaari alli Heebel in Beweegig gsetzt und se bi andere stadtbikannte Bolytiggr vrpfiffe. Und d’Antwoort isch gsi: „Was, d’Anita hett do nit mitgmacht? Das kha-n-y fasch nit glaube – y muess se grad emol frooge“ (genau so wie mir das hänn wölle, Plaan uffgange).

Was drnoo bassiert isch wüsse mr nit, abr si hett sich immr noni gmolde. Und drnoo hämmr e letschte Vrsuech gstartet und nomol gschriibe. Duur e Kopierfählr hämmr d’Anita abr mit „Frau Nationalröötin“ agschriibe und no am glyche Daag isch e Replik kho wo eso gsalze gsi isch („ihr wänne eso-n-e guggus Umfroog mache und wüsset nit emol was e STÄNDERÖÖTIN isch?!“) ass unsre Computer grad e Systemabsturz kha hett.

Und drnoo sinn die (ächt glatte) Antwoorte abr prestissimo kho; d’Anita hett dr Tschegg dörfe eröffne und es hett ere so gfalle ass se’s uff Facebook gstellt hett (no hütt hämmr Bsuechr uff dr Bâlaarisyyte wo diräggt vo dr Anita kömme). Mr hänn me Emails ustuscht und d’Anita au an Apéro uff dr Brugg yglaade. Ihri Antwoort (no am glyche Daag): es giengi nit, am Mäntig syg si in dr Sessioon abr si kämi eifach am Mittwuch ein mit uns go näh... und mir hänn zem eschte mol in dr lange Gschicht vo de Bâlaari en Apéro privé organisiert (uffem Märtplatz, vorem Delifoon bim Globus), am Mittwuch am 8i. Mr hänn abem intrigiere d’Zyyt vrgässe und sinn am 5 vor 8 no in dr Rhyygass gsi, mit Sirene und ohni Vrluscht übere ins Grossbasel... und am 2 ab 8i hett d’Anita ihre Uffwartig gmacht und mr hänn e schampaar guete Oobe kha, ei zwey drey Gleesli gno, si hett s’halbe Wäägeli als Bhaltis mitgno (fasch e ganze Bluemelaade), Passyvi sinn stoh bliibe, hänn d’Köpf zämmegsteggt und sich Soorge gmacht, e baar sinn kho und hänn gseit wie si se bewundere etc. Und ALLI hänn ys agluegt und sich gfrogt was die topschigg aglegti Feminischtin und Frau Ständeröötin mit so Waggisrueche macht.

Und dr Räscht isch Gschicht: d’Bâlaari sinn im Juni 2012 als erschti Waggisglygge ins Bundeshuus yglaade worde, d’Anita hett ys e Fiehrig gäh und bim 2-stündige (!) Zmittag e Gratiscrashkurs in Schwyzr Bolitygg. Und im Bundeshuus hänn ys d’Lüt widr fasch eso gspässig agluegt wie uffem Märtplatz...

 

Also: noch harzigem Start simmer hütte e Härz und e Seel und für d’Anita simmer ihri „Bâlaari Boys“ – si isch die einzigi wo-n-ys ungstrooft eso dörf saage.

 

 

1. Was isch dy ydriggligschti Fasnachtserinnerig?

Woni vor 30 Joor mit mym hüttige Maa e Nacht lang duurepfyffe und -gflörtet ha.

 

2. Was ka dy an dr Fasnacht närve?

Nüt.

 

3. Welli drey Wörtr falle dir zem Begriff „Waggis“ spontan ii?

Räppli, Söiblootere, fräch.

 

4. Sell d’Waggis-Naaselengi vom Fasnachts-Comité reguliert wärde? (falls jo, uff wie lang maximal?)

Uff kai Fall!

 

5. Basel ohni Fasnacht isch wie …. ?

... e Waggis ohni Nase.

 

6. Was bringt di so richtig uff’d Palme?

Wird leider nit veröffentliggt.

 

7. … und ibr was kasch dy eso richtig froie?

Über tolli Film, dr Humor vo mym Maa, Schoggi und Powerfraue.

 

8. E liebs Familiemitgliid schänggt dir zem Geburtsdaag e FCZ-Saisonabo – was machsch?

I schänggs ere Zürcher Fründin für ihre Binggis.

 

9. Wenn Ziiri ‚Downtown Switzerland’ isch, denn isch Basel… ?

... the Center of Europe.

 

10. Was isch fir di dr scheenschti Ort z’Basel?

Dr Glaibasler Bruggekopf vor Mittlere Brugg mit dr Helvetia vor Bettina Eichin.

 

11. Was wurdsch an Basel - odr an dr Schwiz - sofort ändere?

Zauberdrangg vertaile, wo alli sälbschtbewusst macht, will numme sälbschtbewussti Mensche grosszügig, tolerant und kooperationsfreudig sinn.

 

12. Mit wellem Mensch (ob lebändig odr nit) wottsch du gärn emol znacht ässe?

Hillary Clinton und Barack Obama.

 

13. … und was wurdsch du die Person ganz sicher frooge?

Werum sie Quantanamo - e furchbare Schandflägg für e zivilisiert Land -  immer noni gschlosse hänn.

 

14. Was isch fir di dr Maximallohn wo-n-e Mensch pro Johr derft verdiene, egal wo und wievyyl är/sie schafft?

Öppene Million.

 

15. Was nimmsch mit uff e-n-ainsami Insle?

My Maa.

 

16. Wär odr was bringt di sofort zem lache?

Pink-Panther- und Miss-Marple-Film.

 

17. Letschti Froog, Hand uff’s Härz: wäm wurdsch du die Frooge am liebschte zem beantworte gäh?

Jedem Waggis, wo so ne Wunderfitznase hett. :-)