Andrea Bürki (Radio Basilisk)

Hand uffs Härz: wär isch am Sunntig moorge am 6i scho gärn wach? Nachtschwärmr, die wo vom Usgang z’Ziiri retour kemme will Basel jo ab de Mitternacht… (lömmer das), Zytigsdräägr, SVP-Birgrpatrouille vyllicht, odr au hyperaggtivi Hündeler und Eltere mit glaine Binggis. Als Vrdrättr vo dr letschtere Sorte hämmer jetz abr e guete Grund zem wirgligg wach syy, will um die Zyt schaltet me s’Radio a und gheert – die wunderbari, sinnligi, ainzigartig unvrwächslbari Stimm vo dr Andrea Bürki uff Radio Basilisk! Niemer weiss worum d’Andrea praggtisch numme hintr de Kulisse duet wirgge; anderscht wie die eewig-14-jöhrige Moderatoore, wo in ihre Morgeshows Bloggfleete spiile und mega-uffgregt Thermountrhoose ussem 1 € Shop vrloose, list si untr dr Wuche allewyyl numme d’Nochrichte (und wirblet hintr de Kulisse nadyrligg). Also heegschti Zyt ass d’Andra bi de Bâlaari dr vrdient Ehreblatz ibrkunnt und bi uns emol e (betont feministischi) Fasnachts- und Läbnssicht derf vrdrätte – mit ihrer Mainig stoht si bi Goscht nit hinterem Bärg.

Jetz wärdet ihr eych frooge was eso e holdi Daame mit zwai Waggisrueche z’due hett… die Gschicht goht eso: an dr Fasnacht 2011, am Mittwuch nomidaag, hän dr Beni und dr Däni grad e Superblätzli gfunde fir s’Wägeli, diräggt an dr Schiffländi, mit Sicht uff alles und vyyl Passyve zem ahaue, wo bletzligg e grosse Waage au dert hett ahnewelle und d’Sicht abgschnitte hett. Dr Däni hett dr Waage scho widr welle in Cortège uusewingge, do isch us haiterem Himmel (zersch hämmr d’Idee kha diräggt vom Himmel) d’Andrea mit Mikrophoon vor em Beni gstande - und mir hänn ys abr eso richtig ins Züüg gleggt und intrigiert was goht. Dr Andrea isch das nit eso rächt gsi – und bald hämmer au gmerggt worum. Si hett ällewyyl nit zue uns welle abr zue ihrem Maa, em Fahrer vom grosse Waggiswaage, wo an dr Schiffländi Pause gmacht hett… Noch dem glaine Missvrständnis hammer ys schnäll gfunde, d’Waggis vo de Clochards (rychtig, dasch doch die Glygge wo dr Andy Jäggi, Hand uffs Härz Staffle 1, 30 Johr Fasnacht gmacht hett, e glaini Wält) sinn au aabekho und botzdonner hämmir das glatt kha. Und uff aimol sait d’Andrea: “so, und jetz kömmet ihr no uff Sändig – abr syyget nit so luut, im Studio hett d’Kollegin scho usgriefe ab eure dumme Sprüch.” Und bi däm legendäre Interview hett si – me glaubt’s nit - em Däni aifach ans Bei ginggt (numme wil är e harmloosi Bemergigg gmacht hett, also bi Effentligkaitsarbet syge Waggis vo Radio Raurach mit meh Reschpäggt behandlet woorde…).

Und jetz hätte mer d’Andrea als Revanche do bi uns – und zwor nit zem d’Frauequote uffez’kurble, abr hallo, das wär jo no scheener, aifach will se e glatti Zytgnossin isch und will si’s punggto Schlaagfertigkait und Witz mit jedem Waggis kha uffnäh (WOW - was fir e Komplimänt!). Item, mer schalte zu Radio Basilisk, s’Radio fir Bâlaari, und geehn direttissima uff Sändig:

 

 

1. Was isch dy ydriggligschti Fasnachtserinnerig?

I ha nit DIE absolut ydriggligschti Erinnerig, aber jedes Joor wenns heisst "Morgestraich, vorwärts marsch", denn bekummi Hiehnerhuut und verdrugg e baar sentimentali Drääne...

 

2. Was ka dy an dr Fasnacht närve?

Die Lüt wo Masgge statt Larve, Umzug statt Cortège und Abzeiche statt Blaggedde sage

 

3. Welli drey Wörtr falle dir zem Begriff “Waggis“ spontan ii?

glatti Kärli, Zoggeli, Mimösli

 

4. Sell d’Waggis-Naaselengi vom Fasnachts-Comité reguliert wärde? (falls jo, uff wie lang maximal?)

e unerhörti  Froog

 

5. Basel ohni Fasnacht isch wie …. ?

... rot ohni blau

 

6. Was bringt di so richtig uff’d Palme?

Ungrächtigkeit

 

7. … und ibr was kasch dy eso richtig froie?

über gaaaanz viil,  bsunders nodürlig wenn mi Dochter glügglig isch

 

8. E liebs Familiemitgliid schänggt dir zem Geburtsdaag e FCZ-Saisonabo – was machsch?

das macht e "liebs" Familiemitglied vo mir ganz sicher nit

 

9. Wenn Ziiri ‚Downtown Switzerland’ isch, no isch Basel… ?

Ziiri soll bitte was si????

 

10. Was isch fir di dr scheenschti Ort z’Basel?

d'Altstadt, d'Pfalz und d'Münschter Fähri

 

11. Was wurdsch an Basel - odr an dr Schwiz - sofort ändere?

das die Fraue wo schaffe, und das trotz Familie, nit schreeg agluegt wärde

 

12. Mit wellem Mensch (ob lebändig odr nit) wottsch du gärn emol znacht ässe?  

mit dr Mamme Helvetia

 

13. … und was wurdsch du die Person ganz sicher frooge?

ob sie sich das eso vorgstellt het wies jetzt isch

 

14. Was isch fir di dr Maximallohn wo-n-e Mensch pro Johr derft verdiene, egal wo und wievyyl är/sie schafft?

also konkreti zahle z'nenne findi schwierig, eins isch aber sicher: vili mitarbeiter vo dr teppig-etage bekömme viil z'viil

 

15. Was nimmsch mit uff e-n-ainsami Insle?

Mi Maa, mi Dochter und d'Ruggflugtigget

 

16. Wär odr was bringt di sofort zem lache?

e guete Schnitzelbangg

 

17. Letschti Froog, Hand uff’s Härz: wäm wurdsch du die Frooge am liebschte zem beantworte gäh?

Ganz sicher ere Frau, d'Frauequote uff dr Balaari-Site vo de Befrogte isch nämlig e bitz miis... Wie wärs mit dr Caroline Rasser?!