Zeehn zaige - syt 2009!

syt 2009 sinn d Malefyz-Bâlaari zwai grandioos gschytereti, vrhaltensoriginelli Waggis uff dr eewige Suechi noch emmene Glyggekäller - Fasnacht vo unde, ganz klassisch. Mr bestöhn us em grandioose C.T., em Grandmaster vom Wäägeli wo alles baut und organisiert,

und em Däni S., wo aigentligg nüt eso kha ussr sy Sämf drzue gäh - abr das rächt!

Mr kenne dr Wääg nit vom Zyyl untrschaide, sinn iberall und niene dehaime, stolpere vo ainere Kataschtroofe in die nägschti,

mache absyts vom Cortege Fasnacht und däppele nit braav mit, sinn nit subventioniert,

drfir stolz, unabhängig und vogelfrey im Gaischt, hänn e grossi Schnuure und schampaar vyyl drhintr, odr kurz und knapp:

strukturierti Chaoote wo mit allne intrigiere.

Unseri Abentyyr (vom Basler Untrgrund ins Bärner Bundeshuus und widr zrugg) und vyyl meh sinn do scheen zämmebäschelet,

si non e vero...  Fyhlet eych dehaime wie uff dr Gass, und kai Sorg! Mache mr ys nyt vor, mr wüsse genau wär ihr sinn.

(... und mer hätte nadürlig vollschts Vrständnis sett eych das nullkommanull interessiere:

also ehrlig, wemmer nit genau wurde wüsse wie geniaal mr sinn, no wurde mr ys dä Glump jetz au nit wölle adue).