Ehresach

Wär dr Fäährymaa kennt, waiss, dass är jo kurz vor dr Wiehnachte pensioniert worden isch.

Kennt het men en natyyrlig no allewyl in dr ganze Schtadt.

Won är wider emol in dr Fischere bym Oobe-Schebbeli gsässen isch, isch e junge Burscht uffen zuekho, isch zuenem aanegsässe und het aifach esoo afoo verzelle.

Ä syg dr Sohn vom Babbe und dr Babbe syg by de Rhyy-Baad-Gwaggli dä wo mit em Traggtoor dr Waage deeg zieh. Aber jetzt kurz vor dr Fasnacht syg em Babbe sy Härz am Käschperlis mache und är derf nimmy hinters Schtyyrrad. Eb ächt dr Fäährymaa e Leesyg wurd wisse?

Dr Fäährymaa, sälber jo aggtyve Schnitzelbänggler, het kurz iberleggt und gfunde, dass är an de baide Cortege-Nomydääg kennt yyschpringe.

Dr Bueb het no welle wisse, was är denne fir dä Dienscht wurd verlange. Doodrvoo het aber dr Fäährymaa nyt welle wisse! Ändwäder me hälfy sich uss an dr Fanacht – das syg Ehresach! - oder me sell grad uff Adelboode uff dr Schyypyschte go d Sau uuselooh!

D Fasnacht isch kho und die baide Nomydääg mit de Rhyy-Baad-Gwaggli isch zumene ganz heerlige Erlääbnis worde.

Am Donnschtyg am Morge, noonem Ändschtraich sitzt uffem Schtäägeli bym Fäährymaa dehaim dr Bueb (dä vom Babbe). Är druggt em Fäährymaa d Zugsblaggedde in d Hand und maint bym drvoolauffe: „Die het sunscht amme my Babby bykho. Aber syt hiite am viery khan er se nimmy bruuche.“ und isch drvoozottlet.

Am Mäntyg noonem erschte Bummelsunntyg isch dr Fäährymaa vorem frische Graab gschtande, het fyyrlig d Zugsblaggedde zwische d Blueme gleggt und het gmurmlet: „Y bring dr s näggscht Joohr die näggscht! Ehresach!“