S isch e ganz und gar ungattlige Daag ändy Jänner gsi, wo dr Fäährymaa uff sym Schlabbe ghegglet isch.
Dunggelgrauy Wulgge hän zwar Scheeflogge iber dr Bach loo gheye... Aber dr Wind wo gwaiht het, het dä Winterzauber nid wirgglig unterschtitzt... S isch ehnder ungmyetlig gsi!
Dr Fäährymaa het grad iberleggt, ebb är sell d Zuegäng zu dr Fäähry schliesse, wo am Glaibasler-Ufer d Glogge aagschlaage het: Me het e Iiberfahrt gwunsche!
Am Rhyywäg isch e glai verhutzlet Männli gschtande und het e Fahrt ibere Rhyy welle.
„Jä guet, mache mr die Wälle no. Denn mach y scho nyt Dimmers!
- Ych bi jo berait drzue!“ het dr Fäährymaa zu sich sälber brummlet.
Während dr Faahrt het das Männli nie nyt gsayt. Erscht bym Ussschtyyge unterem Minschter het är mit synere Pyypslischtimm gmaint:
„Scheen hesch Du Dir Zyt gnoh fir mi, liebe Fäährymaa! Daas will ych Dir ryych beloohne!“
Dr Fäährymaa het numme dänggt, dass är grad gar kai Interässe an sottygem Gschnuur haig!
Drey Dääg schpeeter isch e Heer mit Gravatte zum Fäährymaa kho und het em e Banggeschegg iber 1'000 Frangge gäh.
Das syg vom Herr Aenishaenslin säälyg, wo vor drey Dääg noonere Fäähryfahrt friidlig haig kenne schtärbe, noodäm dä im Claraschpittel uss dr Onkologyyabtailyg abghaue syg und erscht äähne am Bach doot gfunde worde syg.
Vo däm Momänt aa het dr Fäährymaa gwisst, dass me au an wulggeverhangene, ungattlige Dääg emmene Mensch kha sy letschte Lääbenswunsch erfille! - Me muess aifach numme berait syy drzue!