Dr mjps (geboore 1962 z Basel als Martin Josef Pascal Schwitter) isch bikannt woorde fir syni kurze abr feyne „Fäährymaa-Gschichte", wo-n-är allzu baslerischs us dr Perschpeggtyve vom Fährimaa uff e Punggt bringt und als au e chli duur e Gaggo zyeht. Drzue vrfasst är Tegscht fir Vorfasnachtsverastaltige wie s Pfyfferli, isch syt bald 30 Joor Schnitzelbängglr (als Antiquierte, zämme mit sym kongeniaale Helgedräägr) und schrybt fir me wie 20 Glygge Fasnachts-Zeedel (abr nit fir d Bâlaari - nit ass mr en Ahnig hätte drvoo, abr mr sinn eifach z stolz zem das zuegäh).
Als Initiant vom Schwarze Duume, duur syni unreglmässig abottene Gratis-Schnitzelbanggkürs und emmene Fonds fir d Unterstitzig vo junge AutoorInne isch em mjps d Basler (Dialäggt-)Literatur allewyyl e grosses Aliige. Uff Wikipedia wird är als "der Undercover-Aktivist in Basels Kultur-Geschehen!" briise (dunggt ys e chli gaagelaari-mässig, abr lömmrs eso stoh).
Dr mjps und d Bâlaari hänn e grossi fasnächtligi Vrbundeheit. 2012 isch är dr grossi Ibrraschigsgascht gsi zem dritte Geburtsdaag vo dr Bâlaarisyyte, 2013 hämmr dr Schlussoobe vo de wilde freye Bängg moderiert und im glyche Joor sinn d Bâlaari und die Antiquierte zämme am wilde Zyschtig uff d Gass und zem Karli in d Saffere und dr mjps s grosse Bâlaari-Speciâl duuregfiehrt (e Stadtfiehrig). Item, do hett är sy ganz exgglusyvi Syyte meh wie vrdient. Wenn's em drnoo isch, no schrybt är Fährymaa-Gschichte ibr dr Waggis - und die gitt's numme do, bi uns.
Bitte reschpeggtieret em mjps sy Copyright und dient nit kopiere und paschtiere. Kaufet gschyydr syni Biechr, merci.